ГьунчIукьатIрая ва Жанайхъал Аьбидлуя ца-кIива махъ

ЛакрачIагу, вайми Да­гъус­ттаннал халкьунначIагу цIа дурксса лакрал щархъавух Гьун­чIукьатIрал шяравалугу, жяматгу бур… Ва жяматрая личIи-личIисса иширттаву бусравсса кIантту бувгьусса ва чIявучин кIул хьуну цалла цIа дуккан дурсса тамансса инсантал бивзун бур. Вайннавух ххалли-ххаллилсса аьлим­тал, кару мусил­сса усттартал-пишакартал, цIанихсса вирттал, паччахIлугърал ва жяматрал давурттаву итххявхсса гьурттучитал ва чялишсса ишккаккулт, хIакьсса захIматчитал чан­сса бакъар.

Халкьуннаву ва тарихраву «ГьунчIукьатIан» тIисса цIанилу машгьурсса, бусурман диндалул ххуллурдая, эбадатирттая, гьарцагу бусурманчунан ва бусурманщарнин бан ялувмуния хъинну тамну ва бувчIинну чивчусса лу ГьунчIукьатIрал Кьурбан-Аьлил (ва мунал арснал Нурул-Исламлул) чивчусса лури. Му луттирал цIанил му шяраваллил цIагу абад дурссар. Жула ххаллилсса чичу, шаэр, цIусса заманалул цIаний талай ивкIсса Ибрагьим-Халилгу Кьурван-Аьлил арсъя.
Ибрагьим-Халиллущал архIал лакрал литература дудуллай ва гьаз дуллай ГьунчIукьатIрал Аьлил Аммаевгу ва цува цала оьрмулийва лак­рал литературалул классик хьусса Абакар Мудуновгу бивкIссар.
Цалла давриву цинявннан эбрат­рансса давуртту хIакьсса муаьллим Дандамаев Аьбдулкьадирдул ва цIанихсса багъманчи, ЗахIматрал виричунал Хьинчалов Гъазил дур­ссар.
Ва шяраваллил цIа Граждан дяъвилул шиннардий хъинну машгьур хьуссар – вайннал ятIул партизантурал цивппа хIакьсса вирттал бушиву тай шиннардий кка­ккан бувссар, шяравун душмантал буххан къабивтссар, ва жяматран ЯтIул ттугълил орден дуркссар. ГьунчIукьатIи Дагъусттаннай цIусса шагьрулул – Каспийскаллал (Двигательстройрал) гьану бивз­миннавух хьуссар, тиккусса заводирттай зий, Дагъусттаннал зунттал агьалиная хьусса ттизаманнул даражалийсса зузалтрал кьюкьлуву цалчинминнавух бивкIссар.
ПаччахIлугърал хъуни-хъунисса ва жаваб дулайсса къуллугъирттай зий икIайссия ГьунчIукьатIрал Феодаев Загьиди. Хъинну бусраврай бикIайва цIа дурксса инженертал – уссурвал Чавтараевхъул. Таман­сса бия ва ттигу бур чIявуссаннал цалва хьурдай учинсса, итххявхсса ва лагма-ялттуминнан бусравсса личIи-личIисса касму-пишардал инженертал. Дуккаву, цалла давриву магьиршиву ккаккан даву, хIакьсса захIматчишиву ГьунчIукьатIрал оьттувун ва ттурчIавун дагьсса хасият дур.
ЦIанакулсса ГьунчIукьатIрал жяматраву мунил ца яргсса ва хIакьсса вакилнан на Жаруллагь Керимов ккалли ара. Адаминал-инсаннал тIул-тIабиаьтраву дикIайсса цинярдагу яла ххаллилми хасиятру ваначIа дур: личIи-личIисса касму-пишардаву кару мусилсса усттаршиву, личIи-личIисса элмурду дурккуну, хIакьсса аьлимчу ушиву ва элмулул ва публицистикалул луттирду чичин бюхъайсса бюхъу ва гьунар бушиву, дунияллул тарихгу, литературагу кIулшиву, хъинну пагьму бусса чичул кьаламрал заллушиву, аьмсса культуралул ва инсаншиврул бюхттулсса даража, гьарцагу цалла дуллалисса давриву дакIнийхтуну, уххаву къакIулну захIмат буллан ххирашиву. Ванищала архIал, Буттал кIанттух, лявхъу кIанттух дазу-зума дакъасса ччаву ва му ххирашиву, жяматрал гьарцагу дард, буруккин цаламиннуяр хьхьичIун ласаву. Махъ бакъа, укунсса ххаллилсса тIул-тIабиаьтрал ирсирайшиву ванал арснайн Кьурбан-МахIаммадлуйнгу дурккун дур – му жула архитектортураву хъинну хIурмат лавайсса ва цалва гьунар иширайну ккаккан бувсса аьлимчугу, архитекторгу ур. Зунттаву, Аьндархъиял аьрщарай, Дагъусттаннал халкьуннал Надиршагь ххит аврин цIа куну дурсса «Ватан» тIисса гьайкал Кьурбан-МахIаммадлул давури.
ГьунчIукьатIрая ихтилат най бухьувкун, ттун шикку хасну­ва кIицI бан ччива дунияллийх цIа дурксса хъуниcса аьлимтал – ГьунчIукьатIралгу, Лакку кIанттулгу, Дагъусттанналгу, Аьрасатналгу, СССР-данулгу пахруну хьусса Амир Аммаев ва МахIаммад Дандамаев.
Амир Аммаев дунияллий бур увкусса атомщиктураясса цари, элмурдал доктор ва профессорди. Му 1963-ку шиналва Дагъус­ттаннай хьхьичIа-хьхьичI Лениннул премиялул лауреат хьуссия, Р. ХIамзатовлуяр чансса хьхьичI. Мяйжанссар, Амирдул ва мунащал лауреатътал хьусса атомщиктурал цIарду кьюлтIсса сияхIрай диркIссар. Ва тара шинал лауреат хьусса Р. ХIамзатовлул, Амиргу лауреат хьушиву кIул хьувкун, хъярчирай «ва иширавугу лаккучу жуярва хьхьичIун увккун ур» куну бур. ЦIанасса жулва жагьилтуран, жуятува бизлазиминнан Амир Аммаев мудан эбрат ласавансса инсанни.
Цала элмулул агьулдануву – жулва билаятрайгу, дазул кьатIувгу – ца яла гужма машрикьлахьхьун (востоковеднан) МахIаммад Дандамаев ккаллину уссар. Ваниннин шаназарда-мукьазарда шинал хьхьичIва бивкIсса ва тава заманнайва бухлавгсса халкьуннал тарихгу, мазругу кIул бувну, ми мазурдил чичрурду дуккинсса кIулагу ляркъуну, дунияллул элмулуву хъунисса давуртту дурсса ва ца яла бусравсса кIантту бувгьусса аьлимчу МахIаммадри. Ца ххуллухь, 1973-ку шинал КIапIкIайлив (цIанасса Владикавказрай) та чIумалсса Щалагу Союзрал элмийсса конференциялий элмулул агьулданучIа хъинну сий дусса ва махъ нанисса аьлим­чунал В.И. Абаевлул, жула аьлимчуная укунсса махъру увкуна: «ЦIанакулсса машрикьлахьхьултраву бухмур Ираннал тарихгу, мазругу, культурагу кIул дуллалисса элмулуву МахIаммадлущал архIал ацIан ан бюхъайсса цама акъа­ссар», — куну.
ГьунчIукьатIрал агьулданучIа дуккаврил ва элмулул чулухунмай­сса гъира, миннун лавайсса кьадру-кьимат бушиву ирсирайх кунна нанисса дур, му иширангу жямат­рал оьрмулуву циннасса шартIру хIасул хьуну, аьдатравун дагьну, никирая никирайн бутIурай дук­лай диркIун дур. Ва бусравсса давриха чялишну зий бивкIсса инсанталгу ГьунчIукьатIув тамансса бивкIун бур.
Ялун нанисса никиран чаннасса ххуллу баврил цIаний дакIнийхтуну захIмат бихьлай бивкIсса гьунчIукьатIравух лайкьсса кIану Жанайхъал Аьбидлул (1878-1919) бувгьуну бур. (Ванал оьрмулул шиннугу 1886-ку шинал Дагъусттаннай дурсса «Кулпатир­ттал сияхIрайхчIин» кIул дан бювхъунни). Аьбидлул бусравсса цIа дакIний дитаву, хъамакъаритаву жуйвасса адаврал буржри.
Ларгмур аьсрулул дайдихьулий, хаснува 10-ку шиннардий, ГьунчIукьатIрал жяматраву, чантI увкусса ва заманалуха лавхьхьуну къуццу тIутIисса чиваркIуннавух, хьхьичIирглий, махъ бакъа, Жанайхъал Аьбидгу кIицI ан аьркинни. Му ур ххаллилсса мусил усттар, жяматрал иширттавух чялишну гьуртту хъанахъисса инсан. Жула та заманнайсса усттартал-пишакартал куна, мугу хIалтIилухун лавгун, мусил усттаршиву дуллай ивкIун ур Дянив Азиянаву — Бухарнаву. Цала давриха акъассагу, му халкь чантI учин баврил, халкьуннавух дуккаву ппив даврил цIанийсса иширттавух гьуртту хьуну ур. Цувагу дунияллул иширттая, хъанахъимуния хъинну хавар бусса ва хавар ласайсса инсан ивкIссар. Цанмагу оьрус, турк, татар, узбакI мазру кIулну бивкIун бур. (Учин мукъун, ванал 1918-ку шинал Ф. Ходжаевлуйн узбакI мазрай чивчусса чагъар УзбакIнал архивраву яхьуну бур, мунил копиягу Ж. КеримовлучIа бур).
Та чIумал Аьрасайлив буклай бивкIсса бусурманнал кказитру «Таржуман» (татар мазрай Бахчисарайлив итабакьлай ивкIссар Исмаил-бей Гаспринкий), жула машгьурсса Саэд Габиевлул Петербурглив 1912-1914-ку шиннардий итабакьлай ивкIсса «Мусульманская газета» ва лакку кказит «Да­гъусттаннал ххяххабаргъ» бучIан байсса бивкIссар Аьбидлул, вайннущала архIал, Саэд Габиевлул итабакьлай ивкIсса кказитругу. Халкьуннавух, хаснува Дянив Азиянал халкьуннавух ва тийхсса жула лакравух машгьур баврин цащава шайсса ка-кумаг буллай икIссар. Укун чантI увкусса ва тIайламунил, аьдлулул ххуллу язи бувгьусса Аьбид Бухарнаву хъанахъисса иширттавух хIала увхссар. Бухарнавусса амирдул зулмулул низамрайн 1917-18 шиннардий къаршину дурксса, Файзулла Ходжаев бакIчисса, «Жагьил бухарлувтал» тIисса партиялун кумаг буллай ивкIссар, цувагу Ф. Ходжаевлул хьхьичIунсса ва вихшала­сса дус ивкIссар. Ф.Ходжаев амирдул хъиривбизултрал, ясустурал канихьхьун агьан къаивтун, кьюлтIну шагьрулува увцуну, Аьбидлул му хIакьсса бивкIулуща ххассал ув­ссар. Вай иширттая «Бухарнал революциялул тарихраясса» луттираву Ф. Ходжаевлул 20-ку шиннардийва бувсъссар. (Учин мукъун, ванал 1918-ку шинал Ф. Ходжаевлуйн узбакI мазрай чивчусса ча­гъар узбакIнал архивраву яхьуну бур). Аьбидлул ванащал 1918-ку шинал цачIу ларсъсса суратгу дур).
Аьбид 1919-ку шинал Дагъус­ттаннайн увкIсса чIумал, къашай хьуну, оьрмулул 40 шинаву ивкIуссар. (Шиккува бусан, му хъинну циняв дуккин бан ччисса, цинявннан кIулшиву дулун ччи­сса инсан ушиврул барашин, цува бивкIулул шанийсса чIумалгума, «Ттуща ттула оьрчIал хьхьичI ттуйвасса бурж лахъан къавхьунни – ми дуккин бан къавхьунува ва дунияллия най ура» тIий, хъинну цала цува кьуцIу уллай, хIасратрай ивкIун ур. Ва хавар жухь мунал ссил арснал, халкьуннаву хъинну бусравну ивкIсса ГьунчIукьатIрал Аьлихъал Аьлил (Насиятхъал Аьлил) бувсуна).
1920-ку шинал Бухарнаву, амиргу экьиувтун, цIусса низам дирхьувкун, Ф. Ходжаевлул Бухарнаву революциялул ххуллий гужсса гьурттушин дурсса, цувагу амирдул ясустурахьхьун ириян къаивтун, бивкIулуща ххассал увсса, цалла дакI тIайласса дуснал лаккучунал Аьбидлул кулпатран пенсиягу бишин бувну, мунал оьрчIругу Москавлив дуккин гьан бувссар. Ф. Ходжаев УзбакIнал Совнаркомрал хъунама ва СССР-данул ЦИК-рал хъуниминнаясса ца ивкIссар. 1937-ку шинал зулмулул нигьир­тталун агьссар.
ХIакьинусса кьининин Аьбид­лул гъанминначIа цаппара мунал шаппай гьан бувсса ча­гъарду яхьуну бур. Ми чагъардал та чIумалсса жулва оьрмулия, маэшатрая, халкьуннал ахIвал-тагьардания биял­сса, хIисавравун ласун бюхъайсса хавар баян буллай бур, му чагъар чивчуманал тIул-тIабиаьтрая, хасиятрая буслай бур. Миннул жулва хьхьичIавасса ча­гъар чичаврил кьяйдалия (эпистоляр чичрулуя) буслай бур. Яла-яла кIицI бан багьлагьисса задгу – ми ча­гъарду марцIну цала гьунчIукьатIрал лугъатрай (сурат ларсъсса кунма) чивчуну бушиву дур. Ва иширал лакку маз тарихийну ххал бигьавриву, лугъатру элмийну ла­хьхьавриву хъуннасса агьамшиву дуссар, микку жунна та чIумалсса ца лакку лугъатрал сурат яргну ва даххана къадурну сахла дурну ду­ссар. Яъни, вай чагъардаву бумур, анжагъ цавайннал ичIаллицIун бавхIуну бакъассагу, жяматрал лавгмуницIун, муния тIайласса хавар ласаврицIун бавхIуну буссар. Чагъарду Аьбидлул гъанчунал, чIявучин кIулсса хIакьсса лаккучунал ва гьунчIукьатIиричунал, Керимов Жаруллагьлул мюхчанну ябувну бур. Мунихлуну ванахь, укунсса, жулва лавгмунил хIакьсса чIапIивну хъанахъисса чагъардах къулагъасгу дурну, ми паналу­хьхьун гьан къабивтун тIий, хъунмасса барчаллагь учинну..
Лавай кIицI лавгмургу хIисав­равун лавсун, вай сайки 100 шинал хьхьичIва ГьунчIукьатIрал Жанайхъал Аьбидлул Бухарнава ша­ппай гьан бувсса чагъарду дунияллийн буккан баву лайкьсса давуну чIалай, кказитрай бищун маслихIат хьунни.
Чагъарду хьхьичIавасса аьраб (аьжам) хатIлия тти­сса ла­кку хIарпирдайн Э. Аьбдуллаев­лул (Явюбукухъал Эсал) бувцу­ссар.. Цаппара букъавчIайсса кIанттурду, ягу букъавчIайсса махъру ккуртравун лавсун ягу чIяву кIунтIру бивхьуну буллуну буссар. Ца-кIива тик­рал хъана­хъисса махъ: ссаламир­ттал хъирив бикIай «бяъда» куну. Ванил мяънагу «вания гихунмай», яъни «ча­гъарданулмур мурад вари» тIиссар. Афандимлар (узб.) «агъатал, хъуними, хIурматлувтал» тIиссар.

ГьунчIукьатIрал Жанайхъал Аьбидлул 1917-1918-ку шиннардий Бухарнава шаппай гьан бувсса чагъарду
(Чагъарду Аьбидлул бланкирттай бур. Миннуйгу укунсса чичру дур: Ювелир и гравер Абид Убайдуллаевич Жанаев. Стар. Бухара)

Цалчинмур чагъар
Октябрьданул 29, 1917 г.

ЧIявусса салам хьундав Аьбидлуяту, Аьлилдуяту, Аьбдул-Аьзизлуяту ва махъминдаяту циняндайнбагу Аллагьнал цIими архIалсса. Ссалам хьундав Багьауддиндуйн, аьзизсса ниттийн Рабиятлуйн, Сакийнатлуйн, Насиятлуйн. ПатIиматлуйн, Савдатлуйн, Аьйшатлуйн, Айбавайн. ХIажи-МухIаммадлуйн, МухIаммад-Каримдуйн, Савдатлуйн, Анварпашанайн, Оьмардуйн. МухIадлуйн, Аьлийн, Увайслуйн, СултIандуйн, Щайх-Апандинайн, ТIалхIатлуйн, Зубайрдуйн, Асиятлуйн, Нажибатлуйн, (?) ПатIимат – Шагьукьдуйн), ПатIиматлуйн, Ибрагьимдуйн, ПатIиматлуйн, ва махъсса на цIуххайцириндайн цаняндайнбагу. Бяъда [(“Вания мукьах”)].. Зу ттул ахIвалдаяту хабар ласурча, АлхIамдулиллагь, цIуллуну (ура). Шаппату бувккун, ацIния цалку кьини Бухарливн бивру. Утти ттул мурадрал хъуммур – зул цIуллу-сагъшивури, Аллагьу Тааьланал зугу зулва дакIурдийсса мурадирттайн биян бавури. Амин! Я амин! (Бяъда) . Афандимлар! На Бухарнавунгу ийрда, алхIамдулиллагь, Аллагьнайн шукрур. Жулвами циняппагу цIуллуну-сагънугу буру жуятува тIайла хьуну. Цамур личIисса цIу бансса хабардугу бакъари. ЦIусса хабар мури, на зун чухъри дансса ппал гьан дав 3 гилавкаксса (?), ххал дара, агар хъинду дахлай духьурча, мугьлат бакъа я ххал рищара, я чагъар гьан бара, ххал рищайсса иш бухьурча, суручнай куну рищара. Махъми ххалду ччяни диллай дакъари. Агар вай ппал жулда лакку ппалуял, дурчIуну яла ххуйминдаяту цал ттун чухъа. Ялагу хабар: Гъумукун лавгун, Гъумуксса Багьауддинхъал базаллубусса ттучанчиначIа байка дуссая, накI мукьра къурушран тIийча, духьурча кIиба гьухъунсса ласи, ца гъели-гьухъа бурув­ххуну гьан ба. Вамур гъели гьухъун лях лаххаван. Мумур гьухъунсса ритира шарда ца кьини дуккандин. Ялагу Дялла-ПIиллахъал ттучандалийн лавгун, мюрщисса чилди (?) дуссар ттиркьукьал кьуртти бусса, вий хIисилугу (?) дусса, ттул чилдаха лархьхьусса ххюра къурушран тIий. КьасунхъачIан увкIсса гуржиричуналгу ларсун дуяча, духьурча мигу ласи, цими духьурчагу. Арцу Багьауддиндухь дула уча. Яла зу ттун ца–кIира ппасилкка 12 ягу карттал (?) картIушкалул гьан дара цукун дурий миккура гьан бувну бувкIсса къуршавун дирчуну дурий, цукун дурий, Хъинсса картIушка жучIа гилавка шамма аьппасилун дурча. Пасилкка бизциннай дурну гьан дара. Амма дикI гилавка ца къурушран дур. Жу ца-кIива хIайван биххан ччай буру дикI кьакьан дуван. Яласса хабардугу: Каттахъангу кIинданбагу арсру бан бучIир. Вагу зун хабар. Написатгу ххуйну бур. Аьйкьи-мийкьи ттуларуш! КартIушка магьандара. Зул захIматгу ялттусса янда майну ( вай махъру бувчIлай бакъар — И. А.), пасилккалул харжгу хIисав дарча, мува му хъанай бур. Ялагу му шихра кьюркьуну дацIанссар. Аммарий, чилду ххал дувну гьан дува, ца дужин духьурчагу, гьарзану духьурчагу, цими духьурчагу. ЦIанакул цамур личIисса хабардугу бакъари. Ва чагъаргу зун Бухарнавун ияврил (кьабзари (?) — шикку ва махъ ливххун бур, бувчIлай бакъар) . Утти зул чагъарданух ялугьлагьимара на мудам. Нагу зул даимасса дуаьчи Аьбид ал-факьир.
Ялагу ссалам буси тIий ур Сиражуттин зухь чIявусса, хIисав да­къасса.
КIилчинмур чагъар

29 нуябир, 1917г.

ЧIявусса салам хьундав Аьбидлуяту, Аьбдул-Аьзизлуяту.ва махъминдаяту аьзизсса ниттийн Рабиятлуйн, Багьауддиндуйн, Сакинатлуйн, Насиятлуйн, ПатIиматлуйн, Савдатлуйн, Аьйшатлуйн, Айбавайн, ХIажи-МухIаммад-луйн, МухIаммад-Каримдуйн, Анварпашанайн, Оьмардуйн, МухIадлуйн. Аьлийн. Увайслуйн, СултIандуйн, Щайх-Апандинайн, Зубайрдуйн, ТIалхIатлуйн, Асиятлуйн, Нажибатлуйн, ПатIиматлуйн, Ибрагьимхъайн ва махъсса на цIуххайцириндайн цаняндайнбагу цIими даимсса салам хьундав. (Бяъда). Ттул ахIвалдаяту хабар ласурча, АлхIамдулиллагь, цIулдушиву даимну дуаьлий икIара. Ттул мурадрал авламур тIурча, зул къума дакIругу гьарта дувну, зул цIуллушиву Аллагьнал даим давури. Амин, я амин! Яла на зухь хабар бусан, зул чагъаргу бувкIунни шамурку кьини. ва зул чагъарданин жавабгy ва за чичав. Ва зул чагъар бучIайсса кьини зущал рагьан дурсса чагъар чичлай, чагъар бачIи-кьачIи хьуну махъ, хъиннува къур хьуну уссаявча, ялагу ссабур дурну, кIа бусса куццуй кутIа бувну, кIа чивчумур чагъар зучIан гьан бувссая. Ца шанда ссятрал махъ зул чагъаргу бувкIун, къиялий игьалавгра. Уссаяв ци банссарий къакIулну. Ци бухьурчагу утти дакI паракьат хьунди. Аллагьнал, я раппий, жуятура паракьатшиву , амниятшиву тачIав ялагу къагьан дувандав, Утти на зухь хабар бусанда. На гьашину хъинну аьйкьуну ура, щак бакъа аьйкьушиву мяйжанссар. Агар ва дуниял вара куццуй личIарча, р,яхба-арулба тумандалийн лачIал пут, мугу ласлаяр михнияр, валлагь, ми оьрчIащал архIал къаригу дурцуну. ттуршва бутIулгу шийх хъина. Иш аьйкьусса хьуну бур, банмур цирий къакIулди. Агар мунияргу лавай лахъарчарий, мий ялапар хьун къахьунссар, чунмай бухьурчагу мия бачин багьанссар. Жул (ш)ийх ца гьухъа шюшинду къуруш- ряхба аьппаси ласлай бур, шюшинмагу мукунгу ляхълай акъари. А гьухъа ба хIажак (….) шикку букансса чxатIри лухIисса (………..) ца-ца гилавка дакъа къадулай (………………………) лавсун зумма ччарча , утти гьан дайсса ппасилккалуву жува кьакьан бувсса лухIи сухари гьан буванда. Туну цивави, на зун арцугу гьан дуванда. Амма Багьауддиннухьгу дула учара. На гьан дурсса ппал дирдий, къадирдий? Цукунсса дур чухъран, дучIи (хьунссарий) ? Ми дахханссарий? Миндул пут ларсъссар мяйба тумандалийн. Даххаву зулда ихтиярди, утти зумма ччимур бара, Варанттул ппал ацIба тумандалийн пут дахлай дур оькки-ххуй хIала-ккала. КъакIулли ми цукун даххандиссарий. КанпитIру ацIния ряхва тумандалийн путну. Ми ацIба тумандалийнгума къаласлай буссая. ЖучIа цIанакул личIисса хабардугу бакъари. Гьунттий мужмар кьини кIюрххила лавгун, ккинижккалий мугьругу бищун бувну, гьунттий качар чяй ласун тIий ура, 15 гилавка качарданул, ца гилавка чяй, I5 гилавка иникьаллул, I пут навт, 5 пут саксаул тIаннул, ца бала арцул харж хьунтIиссар. Аммарий яндагу дулундиссар. КъакIулди цукун­сса чухъри дикIандиссарий, дирияймур (……)рий дуванда. Аьлилгу Щурагьун лавгун, Щурагьвар. Утти нагу, Аллагьнал ка бакьирча, чунай-унугу ачин тIий ура. ХIарачат буван жийвар. Дулунгу Аллагь (ххуйри -?). МатIлаб зуятусса: зу чагъарду ччяни гьан бавур. На уттигьинийн ххюйлчинсса чагъарди зучIан гьан бувайсса. ЗучIату дахьа ца чагъар бувкIунди, оьрчIан хIажайк дуя, картIушкагу дуя, аммарий на ххал дан бала бувну бия картIушкалул пасилка гьан дувну. Хабар бусан ялагу зухьва: жул шикку цIусса аьдат дуккан дурну дуссар, хъатIан увкуну махъ, цукIий оьруснал адамина икIу, Бухарналсса икIу арулда ссятраяр тихунай кьатIув уккан къаитайссар, кьатIув увкма увгьуну ацIан уллай чани хьуннн тай (…….). Утти цIана цукIий кьатIув уккан къашайссар. Ссят арулда хьундихха, ухху дуснакьрайн щяикIу, ччарча зузу, ччарча уттуихьу, кундачIан кувгу гьан къабитайссар, гьар надийсса (?) цувалусса адамина ухьурча, вана ва вин дуснакьри. Чара бакъари, чара бухлавгувкун, я зун аьркинни, я ци-бунугу буклан аьркинни. Вана ва хьхьичIа заманнул Бухара хьунур бусса. Вагу зун цIусса хабар. Цуркинтрая нигьачIий ва аьдат дуккан дурунди. ЦIанакул махъ(….) …ссарий къакIулди. Жугу барцIру кумма буру. Жул шийх ружмяр кьини зун ийкIманаяту ацIра къуруш ишттарап ласайссар. Сиражуддиндуягу. Кьурбан (…..) ларсъссар ацI-ацIра къуруш. Вагу зун хабар.. Утти ссятгу кIира хьунди хьхьудяяту. Яругу гиж бикIлан бивкIунни ?) (…………)
Утти зун барчаллагь, хьурду хъинду, увкусса хьусса бухьурча хIалаккала битира. ЧIявусса салам хьундав Аьбидлуяту ПатIиматлуйн. АхIмадлуйн, Ханичайн, Аьишатлуйн, Аьриплуйн, махъминдайн. Гьаза ва салам, нагу зул даимансса дуаьчи Аьбид ал-факьир,
Шамулчинмур чагъар

1918г.

ЧIявусса салам хьундав Аьбидлуяту, Аьлилдуяту, Аттахъаяту ва махъминдаяту, Аьбдул-Аьзизлуяту Багьауддиндуйн, ХIажи-МухIаммадлуйн, МухIаммад-Каримдуйн, Анварпашанайн., Оьмардуйн, МухIадлуйн, Аьлийн, Увайслуйн, СултIандуйн, Зубайрдуйн, Щайх-Апандинайн, ТIалхIатлуйн, Шавкат-пашанайн, аьзизсса ниттийн Рабиятлуйн, Сакинатлуйн, Насиятлуйн, ПатIиматлуйн, Савдатлуйн, Асиятлуйн, Нажибатлуйн, ПатIиматлуйн, (Шагьумдайн ?), чIаххуврайн Ибрагимхъайн ва махъсса жу цIуххайцириндайн цанянлайнбагу. Аллагьнал цIимилул вивату бувцIусса, жавагьирттал чIюлу бувсса ссаламирттал аьнтIикIартту хьундав зул циняндайнбагу, хаснува ттуй дакI цIуцIиминдайн кьиямасса кьини дуккандин кьанкь яла къалагайсса (Бяъда). Зу ттул ахIвалдаяту хабар ласурча, алхIамдулиллагь, цIуллуну, сагъну ура, ттул мурадрал хъуммургу, аввалан, зул цIуллу-сагъшивури., Аллагьу-Тааьланал цалва пазлулийну гьарца апатирттаяту ябандав.. Иншааллагь.. ХIакьину зул кIива чагъаргу бувкIунди ттучIан, ца 17-чиммур январданий чивчусса, цагу Сайпуллагьлухьхьун бувкIунни, миннул ядагран ца цIумугу буя. Амма чагъарданий бияхха, зу хъинну аьбижат ханахъисса ттул чагъар къабучIавай тIий, на зул чагъарданийн чагъар гьан бувссар, ца мукьва-хюва ххишалагу гьан бувссая. Амма гьан баврил ци бави, машинартту, пувчру бавцIуну тамансса хIалду хьунди. Гьаксса навагу къур хьуну ура гьашину зун ккалушру диян дуван къабюхълай, я пасилкартту къаласлай, ласурчагу ппий дуллай хъинну къуману ливчIра. Ялагу майли, жува миндалсса буллай личIандав, жулва бакIру цIуллу бандав. Вай шиндардий бачIва ччандай занарчагу, бачIва бакIурдищал занарчагу. Цикссагу халкь бур рязисса, жува ми кьабитанду, Аллагьнал жунда цIуллушиву дулундав, Аьбидлулгу бакI цIуцллу бандав, зугу учара, нагу тIий урача, жулда усругу, гьухъри цикIий чан къахьундиссар, Аллагьнал цIимигу жулва ялув буссар.
ХIарачат буван жуйва шайсса куцций, дулунгу Аллагьнайри. Аллагьнал ка бакьирча, жува кIанал (….) къабитандиссару. Иншааллагь. Ниттилгу дукIурасса ялуршин на къалархъхьурча. Ялуршин лахъан цурда дучIанда тIар ва мунил на Аьбид сагъну ухьурча, чув-унугу ялугьлай къаикIанссарахха. Мукунсса буруккинттугу ссан аьркинссар мунин? Аллагьнал цIимилияту, нава кунасса арамтураву ялавайну такIий къаикIссара. Иншааллагь, цIуллуну уну ттинияр махъгу бюхъаймур буванссар на. Астагъфируллагьгу увкуну, паракьатну щядикIаву хъинни. Яла жул шийхгу ишру аварану бур, (жума бахъарчагу………. бур). Жугу гьаксса жува кIулну буру. Зуммагу кIул хьунссар, цIаравун нагу къаххяххандишиву. Хиялдал хъю къадугьайссар. Аллагьнал ка бакьирча, рахIатну (….) чIунгу дучIандиссар жунда. Иншааллагь. Ва чагъар бияйхту мугьлат бакъа чагъаргу гьан бара. Малики утти ца Щурагьун учIан багьанссар, кIиха аьркинмургу гьан дуванда. Мичча нанисса ухьурча, мунахьхьун гьан дуванда, чагъар чивчуссар куну. Гирманнал Оьруснащал дакьаву дурссар тIисса тилиграмгу дуркIун дур. Вагу зун хабар. [(Цамур жул цIу…. дакъари цамур дакъари. ХIажи-МухIаммадлунгу кьурбан лагавриял ххуйсса ссайгъат…. . ХIарачат бу…….. — (чIапIул чулух зуманицIух чивчусса вай махъсса кIива хха буккин хъанай бакъар: хатI ливххун бур, бувчIин хъанай бакъар, чагъарданул зумагу ссурссуну хIарпру зия хьуну дур – Я.Э.)
Явюбукухъал Эса