Мартрал 22-нний Вихьуллал жямат, цала ва шяраваллил администрациялул сипталийну, бувккунни Хъун хIатталлив субботник дуван. Багьсса кIялабарзру чулий бацIан бунни, бюруврацIа марцI бунни ляхсса кIанттурду. ХIатталлил лагмасса зия хьусса чапарданувух бувххун, ятту-гъаттарал дурсса хъутру марцI дунни. ЧIаравсса ратIув, баклашкартту дартIун, марцIшиву дунни. Зия хьусса чапар, сварка дурну, ятту-гъаттара къабуххансса кьяйдалий дакьин дунни.

ХIажимурад ХIусайнов
Субботникрай гьуртту хьунни шяраваллил жагьилтал, дук­лаки оьрчIру, оьрмулул бугьарами. Шиккура икьрал дунни, щил-бухьурчагу, цукунчIав ятту-гъаттара хIатталлив буххан къабитан. Икьрал дунни инсантал лагайсса хьунив ххуллийхгума къазанан вания тинмай..
Ттул чIаххуврай яхъана­хъисса, байбихьулул классирттаву дуклакисса оьрчIал цала хъунбавахь увкуну бия: «Хъунбавай, жува школалийн наниний хIатталлийх хъанай бурухха. Му бунагь бунува, циванну заназисса?» — куну. Вана кIулну ялун нанисса никиран инсаннал хасиятраву дуруччин аьркинмур. Нанияра вичIидишиннуча ттул чIаххувоьрчIах.
Субботникрай зузиминнан кадуххалларан бувну бия хьхьахьхьари, бачIлай бия нацIу-кьацIусса цадакьартту.
Субботникрал ахирданий Вихьуллал шяраваллил бакIчи ХIусайнов МахIаммадлул хъунмасса барчаллагь увкуна гьуртту хьуминнахь.