ЦIуссалакрал райондалийсса 2-мур ЦIуссачIурттащиял школалий ларгунни «Жу террорданийн къаршиссару» тIисса акция. Ва акциялул сиптачи хьунни школалул директор ПатIимат Аьбдулмуслимова.

Цила ихтилатраву ванил бувсунни дуклаки оьрчIал тIул­дакъашивуртту къадан, аьркин бакъасса иширттавух хIала къахьун школалул учительтурал цуксса даву дуллай буссарив. Ва кьинисса акциялий гьур­ттушинна дан бувкIун бия шанна никирал вакилтал. Школалул хIаятравун бавтIун бия дуклаки оьрчIру ва учительтал, бусрав­сса хъамал. Шикку ихтилатру бунни ЦIуссалакрал райондалул депутатътурал мажлисрал председатель Мавлидин Исламаьлиевлул, райондалул администрациялул бакIчинал хъиривчу Гайирбаг Мусаевлул, райондалул Жяматий­сса советрал председатель Магьди Оьмаровлул, Жагьилтурал политикалул комитетрал председатель Заур МахIаммадовлул, ЦIуссачIурттащиял шяраваллил администрациялул бакIчинал бигарду чIумуйсса щаллу буллалисса НурмахIаммад Нур­махIаммадовлул, шяраваллил мизитрал имам Саид Мухидиновлул. Цалва ихтилатирттаву вайннал кIицI лавгунни терроризмалул ва экстремизмалул иширттащалсса, мукунма цаймигу журалул тахсиркаршивурттащалсса талатаву гужлан дан аьркиншиву, жагьилтал мяърипат, духIи-дуцин дуну тарбия бан аьркиншиву. Жагьилтуран мюнпатсса насихIатру бунни цалва ихтилат­раву чIярусса шиннардий шяраваллил хозяйствалул аралуву каялувчинал къуллугъирттай зий ивкIсса Магьди Оьмаровлул. «Жу террорданийн къаршиссару» тIисса акциялуву гьуртту хьун мукунма бувкIун бия захIматрал ветерантал МахIаммад ХIамидов, Вали Исламаьлиев, МахIаммад Жабиров, оьрчIал нину-ппу.
Ихтилатру къуртал хьуну махъ школалул директорнал хъиривчутал ПатIимат Кьадировал ва Загьра Муртузалиевал марцIну ххювардай дуклакисса оьрчIан буллунни цIа кусса бугьансса мурхьру. Яла баян бунни акциялул кIилчинмур бутIа, школалул участокрай «Бяълилул багъ» бугьаврил даву, дайдирхьушиву. Цалчинсса мурхьру бугьан вихшала бунни бусравсса хъамаллурайн. Вайннал ватандалухасса балайрдахун дургьунни цалчин­сса кьюкьа кьурчIи бяълилул мурхьирдал.
Хъирив дуклаки оьрчIалгу бувгьунни биялсса мурхьру. Аьмну школалул участокрай бувгьунни 71 мурхь, Хъунмасса Бу­ттал КIанттул цIанийсса дяъвилий Ххувшаву ларсун 71 шин хъана­хъаврил савлугъран. КIицI къабувну къабучIир, бяълилул багъ бугьаврил давурттаву гьуртту хьун бувкIун бия щаллусса кулпатру. Ва ххаллилсса даву дунни хъуниминналгу, дуклаки оьрчIалгу балайрду тIий, къавтIий, хъуннасса дялахъругу дурну.
Муниннин хьхьичI вайннал школалул хIаят ва лагма-ялттусса кIанттурду марцI бувну бия. Акциялуву гьурттушинна дан бувкIми ва хъамал барчаллагь тIий бия школалул администрациялухь, учительтурахь ва дуклаки оьрчIахь.
«Бяълилул багърал» гьану бивзун махъ хьунни «ккуркки стол». Микку ихтилат хьунни укуннасса даву райондалул цайми школардайгу дуллан аьркиншиврия.
ХIадур бувссар
А. Аьбдуллаевал