Дарбантуллал жяматрахь ва циняв дагъусттанлувтурахь барча тIий ура дунияллул цивилизациялул ххазинану хъанахъисса Дарбант шагьрулун 2000 шин шаву. Жува барчаллагьрай буру Аьрасатнал Федерациялул Президент Владимир Путиннуйн, цалва хIукмулийну Дарбантуллал юбилейрал шадлугъру щалла паччахIлугърал лагрулий дантIишиву ккаккан баврихлу.
«Махъ бакъа, Дарбант – инсаниятрал цивилизациялул ляличIисса кIанур ва му лайкьссар хъинну хъуннасса къулагъасран», — увкуссар В. Путиннул.
Юбилейрайн хIадур хъанахъиссаксса хIаллай билаятрал каялувчитурал Дагъусттаннан тамансса кумаг буллай бивкIссар. Хъуннасса даву дурссар Аьрасатнал Федерациялул Ухссавнил Ккавкказуллал иширттал министерствалулгу. Шагьрулий дуллалисса давурттал ялув бацIаву дуллай бивкIссар АьФ-лул ХIукуматрал Председательнал хъиривчу, Дарбантуллал шагьрулун 2000 шин шаврил шадлугъирттал сакиншинналул комитетрал председатель А. Г. Хлопонин ва АьФ-лул Президентнал СКФО-райсса вакил С. А. Меликов.
Юбилей гьарта-гьарзану даврийну жущава бюхълай бур Аьрасатнал ва дунияллул жяматирттал Дагъусттаннахсса къулагъас хъун дан. Жу жущава шаймур барду чIявусса хъамаллуран ккаккан баншиврул хIакьинусса кьини аьвзалзаманнул шагьру-къала цукун яхъанай буссарив.
Махъсса 2000 шинал лахъишиврий Дарбант бивкIссар дунияллул культуралул ва политикийсса иширттал дязаннив, мунил иширттах къулагъас дуллай бивкIссар тарихчитал, чичулт, географтал, ссапарчитал. Дарбантуллан чIявусса ккавкссар, чIявусса бакIрачIан бувкIссар. Ганий тамахI бивхьуну бивкIссар Римуллал империя ва Парфия, Сасанидтурал Иран ва Византия, Хазартурал каганат ва Аьрабнал халифат, сельжукуллал паччахIлугъ ва Золотая орда, сефевидуллал шагьтал ва туркнал султантал.
Дарбант – му тарихрал гьайкалли, га – аьмну лавсъсса инсаниятрал опытрал феноменни.
Дарбантлив дуссар сайки 150 гьайкал, ми цинявннул личIи-личIисса, цанма хасъсса кьимат бур.
Дарбант – шагьру-музейри, жулла республикалул лишанни, щалвагу Аьрасатнал пахрур.
ЦIанасса шадлугъру къуртал хьуну махъгу Дарбантлив дузалшинналул давуртту къуртал къахъанахъиссар. АьФ-лул Президент Владимир Путиннул тапшур бувссар 2018 шинайннин дузалшинналул давуртту лахъи лаган дуван.
На барчаллагь тIий ура ва хъуннасса байран бакIуйн дуккан дан кумаг бувсса цинявннахь.
Цинявннан чIа тIий ура дакьаву, паракьатшиву ва барачат, дузалшинналул иширттаву тIайлабацIуртту Дагъусттаннан ва Аьрасатнан хъиншивурттал цIаний!
Дагъусттан Республикалул БакIчи
Р. АьбдуллатIипов
