ЧIяру даннав вил оьрмулул ххаришивуртту Цалчин, жулва даврил уртакь, дус-ихтивар, ГьунчIукьатIрал шяравасса ХIажиева Зинфира Убайдуллагьлул душнищал ванил ххирасса арснан Камиллун арс увсса ххаришиву кIидачIлай, арснал арс хъуна уллай буру. ТалихI бусса, оьрму лахъисса, салихIсса изаннав. Агьлу-тухум лахъа-хъун бувансса чув-адамина хьуннав. Вияту уттигу цимиллагу хъунна-бава хьуннав.
КIилчин, ва шинал дайдихьулий хьусса вил оьрмулул кIива «ххюнния» сакин хьусса юбилейгу барча дуллай, чIа тIий буру вин дакIнийсса мурадру бартлагаву, цIуллусса, лахъисса оьрму, къатлуву нахIу-хIалимшиву, буллугъшиву. Яхъанахъу ва дунияллий талихIрай-тирххандарай. ТачIаввагу чан къахьуннав вин му вилла чумартсса дакIнин лавхьхьусса кьисмат!
ХIалимсса, коллективраву бавкьусса, хIурмат лавайсса жул Зинфирай! Вил ххаришивуртту кIидачIлай, жу дурсса вай дуаьртту Заннал кьамул даннав!
«Илчи» кказитрал коллектив
———————————
Барча уллай буру жуна цинявннан ххирасса, кIулсса, хъунасса хIакин, ЧIурттащиял шяравасса Щайхлул арс Хасаев АхIмад «Почетный кардиолог РФ» тIисса бюхттулсса цIанин лайкь шаврищал.
Ва бюхттулсса цIа барча дуллай, чIа тIий буру муниярдагу хъунисса ккаккияртту ва тIайлабацIуртту. Ина хъин бувсса Дагъусттаннал мукьвагу мурцIнийсса агьалинал барчаллагьру буссар му бюхттулсса цIаниву. ХIакин тIисса цIагу муниярдарагу лахъну, сийлий ларсун ачин вихьхьун цIуллушиву дулуннав. Я Аллагь, ина вилва язиминнащал архIал оьрмулул уччиннин итаннав.
Вин хъиншивуртту чIа тIий, виха дуаьлийсса вия пахрулийсса ЧIурттащиял жямат
———————————
ДакIнийхтуну барча буллай буру Гьамиящиял дянивмур даражалул школданий байбихьулул классирттал оьрчIахь дарсру дихьлай 45 шинай зий бивкIсса Дагъусттан Республикалул лайкь хьусса учитель, КIулшиву дулаврил отличник, МахIаммадова Роза Шамсуттиннул душ 70 шинал юбилейращал. ЧIа тIий буру цIакьсса цIуллушиву, дакIнийсса мурадру бартлагаву, талихI-тирхханну. Вай шаммардугу тIайла буклай буру вил юбилейрал савлугъран.
Вил ниттин ва буттан
алжан булуннав,
Пишкаш дурну тIий вин
дуниял, оьрму,
Цалла тIул-тIабиаьт
ва багьу-бизу
ОьрчIаву дирхьуну
кьариртсса шийра.
Вил тIайлашивугу
махънан бусраври,
Буну тIий дакI хъинсса,
хIарачат бусса,
Эбратну зузисса,
оьрчIру ххирасса,
Элмулул ххуллурдайн
ми бичлачисса.
ЗахIматран лавхьхьусса
кьисмат булуннав,
Виява бивзминнал
дард къаккакканнав,
Бутанмур оьрмугу
цIуллусса хьуннав,
РахIат бансса бакъа
хавар къахьуннав.
Дяхтта бивтсса бургъил
гъили булланнав,
Хьхьувай цIурттал парлил
рахIат булланнав,
Мюрщи оьрчIал чIурдал
дакI ххари дуллай
Гъан-маччацириннал
къутай битаннав.
Виха дуаьлийсса вил арсру, душ, оьрчIал оьрчIру,
гъан-маччами цинявппагу
