Ккуллал райондалий буттахъал аьдатирттах хъунмасса ургъил бур, ми ядаврих, гихуннай дачин даврих. Гьарца даврил, касмулул цилла-цилла хIалурду, тIалавшиннарду духьувкун, хъунмасса кIану бугьлай бур ми аьдатру лахьхьин дуллалиманалгу. Райондалул культуралул управлениялул хъунмурну Марина Ибрагьимова бивтния шиннай буттахъал аслисса аьдатру уттасса ххуллийн дурккунни.
Ва хъамитайпалул, цила канилусса культуралул инсантал зузи баврищал, сакин бувну бур Ваччиял шяравусса ххисса кIулшиву дулайсса ОьрчIал творчествалул къатлуву «Бартукь» оьрчIал ансамбль. Вара цIанилусса ансамбль бур оьрмулул бугьараминналгу.
Марину Ибрагьимова буслай бур:
— Ва оьрчIал ансамбльдануву уссар 28 оьрчI. Вайннан на лахьхьин дувара лакрал, яла щалвагу Дагъусттаннал миллатирттал къавтIавуртту. Балайрдугу учайссар вайннал. «Бартукь» ансамбль гьуртту шайссар райондалийсса культуралул циняв иширттавух, буккайссар хъамаллурал хьхьичIун. Гьуртту хьуссар ва ансамбль «Горцы» фестивальданийгу. Шикку вайннал ккаккан дурссар, «Поэзия народного костюма» номинациялуву, къавтIиний лаххайсса янна. Вайннал лавсъссар цимивагу дипломру ва грамотартту.
Ялун нанисса никиран лахьхьин булларча жунма кIулмур, личIлачIиссару жува жунна хасъсса аьдатирттал ва культуралул инсанталну, — увкунни ванил.
Гьакссагу тIайласса махъру бур. Жувагу чIа учинну ва ансамбльданун хъуни-хъунисса хьхьичIуннайшивуртту.
