Ва нюжмардий, итни кьини, ЦIуссалакрал райондалул администрациялул къатраву ДР-лул Халкьуннал Мажлисрал депутат Зайнуллагь Мирзоевлул райондалул агьали кьамул бунни. Ванащал архIал агьалинащал хьунабакьин, миннал буруккин­ттах вичIидишин бувкIун бия депутатнал кумагчитал Шамил Акаев ва Амир ГъалбацIов, кIанттул отделениялул исполкомрал каялувчи, «Единая Россия» партиялул приемныйлул каялувчи МахIанмадшяпи Сулайманов.
Шикку гьаз хьусса агьамми масъаларттугу бия райондалул агьали цIусса миналийн бизаврицIун бавхIусса, цIусса миналий агьалинан аьрщи дулаврил, бизан бувминнал сияхIравун багьаврил ва бизан бувминнал статус ласаврил хIакъиравусса. Мукунма гьаз хьунни кьадиртсса къатрах компенсация булаврил хIакъиравусса ва цаймигу масъалартту.
Ва кьини депутатначIан бувкIсса жагьилминнал тавакъю бия даврил дузал баврил ва цIусса миналий жагьилсса кулпатирттан къатри дулаврил хIакъиравусса. Зайнуллагь Мирзоевлул ва кьини кьамул унни 30 инсан. Цаппара масъаларттал хIакъираву ми­ккува бувчIин бавуртту дунни, цаппарассаннул ялув республикалул къуллугъчитурайн уккансса хIукму бунни.
Зайнуллагь Мирзоевлул махъ буллунни райондалул бакIчинащал ва ДР-лул хIукуматрал структурардащал цачIу шикку гьаз хьусса масъалартту щаллу бансса чаран ля­къин.