Июнь зурул 17-нний ЦIуссалакрал райондалул хъунама ХIажи Айдиевлул кьамул бунни 1944 шинайн дияннин дурну диркIсса къатрава бизан буллалисса райондалул агьалий. ХIажи Айдиевлущал агьалий кьамул бан увкIун ия ДР-лул правительствалул бизан баврил масъалартталсса буллалисса управлениялул хъунамаМахIаммадаьли МахIаммадаьлиев. Мукунма агьалий кьамул буллалисса батIаврий гьуртту хьунни ДР-лул Халкьуннал Мажлисрал депутат Зайнуллагь Мирзоев, бизан баврил масъалартталсса буллалисса управлениялул хъунаманал хъиривчу МахIаммад Антаев, райондалул счетный палаталул председатель Аьбдурашид Буттаев, Райондалул Ветерантурал советрал председатель Мизраб Шахмилов.

Мукунма шиккун бучIан бувну бия къатригу тапшур дурну, Новостройрай цIуну дур­сса къатравун агьалий бизан буван аьркинсса шяраваллал бакIчитал. Агьалий кьамул буллай байбишин хьхьичI ЦIуминалийсса шяраваллал бакIчитуран ва райондалул бизан баврил масъалартту щаллу буллалисса управлениялун бувчIин бунни ва ДР-лул правительствалул бивхьусса ва щаллу бан аьркинсса агьамсса масъала бушиву.
— Бизан баврил масъала так ца лакрал ва чачаннал миллатрал бакъар, ва цинявннал аьм­сса ва ччясса мутталий дузал бан аьркинсса масъалар, — увкунни бизан баврил управлениялул хъунама МахIаммадаьли МахIаммадаьлиевлул.
Агьалинан бувчIин бунни июль зурул 1-нийнин бизан буллалиминнал актругу чирчуну къатри тапшур дан аьркиншиву.
ЦIуссалакрал райондалул бакIчинал ва бизан баврил ма­съалартталсса буллалисса управлениялул начальникнал агьалинал буруккинттах вичIигу дирхьуну, ми мяйжан буллали­сса хIуччарду бусса масъалар­тту щаллу бансса чаранну лявкъунни.
Цаппара халкьуннал бия ца хIаятраву чачаннал 1944 шиналнин дурну диркIсса къатри ду­сса ва цалла дурсса цIуну дур­сса къатри дусса масъалартту. Укунсса иширттавугу маслихIат ккавккунни кIивайвагу рязийну масъаларттугу щаллу бувну, къат­ри тапшур дан.
Къатри тапшур дуллалиминнал ва кьамул дуллалиминнал дянив бия куннащал куннал бавкьуну дузал бан аьркинсса, къат­ри тапшур дансса актру чирчуну дунагу, чIумуйну ялапар хьун ихтияр дулара тIисса бястлий­сса кIанттурду. Шиккун бувкIсса райондалул агьалий бия подъемный арцу дулунцIа ялугьлай буру тIий. Мунил хIакъираву миннан бувчIин бунни подъемный арцу так цIусса къатравун бивзун махъ дулайшиву. ХIажи Айдиевлул кIицI лавгунни ва ххуллухь цуксса ччайнугу кьаритлатисса къатри тапшур даврил масъала махъун бутансса пайда бакъашиву.
Ва хьунабакьаврийра къатри тапшур дуллалисса чIяруми акт­ру чирчунни.
Асият Абачараева