ЦIуссалакрал райондалия повесткартту дуркIсса цинявппа призывниктал лавгунни аьралуннаву къуллугъ бан. Интнил призыврал кампания най дур цила нирхирай.
Райондалул бакIчинан кIанайсса Сулайман Рамазанов цува гьарица шяравун иллай, шяраваллал бакIчитуращал, жяматрал вакилтуращал, призывниктуращал ва миннал нитти-буттащал хьунаакьлай икIаврийнугу призыврал кампаниялул хIасиллу райондалий ххуйсса хьунни. Райондалул бакIчинал бувчIин бунни призыврай аьралуннавун бувцуми хасъсса аьралий операциялий гьуртту къахьунтIишиву, мукунма миннал Аьрасатнал цIусса регионнай къуллугъ къабуллантIишиву.
Вай гьантрай аьралуннаву къуллугъ бан лавгунни ХIамзатлул арс Атиев Муса. Ва тIайла уклай бия цалчинсса гьантрая шихунмай, контракт чирчуну, хасъсса аьралий операциялий гьуртту хъанахъисса кIиягу уссу. Вай кIиягу личIи-личIисса наградарттан лайкь хьусса ур. Аьралуннаву къуллугъ бан лавгсса Мусал ппу Авгъан дяъвилул гьурттучи ур.
