СПИД-рал ливтIусса инсантурал аьпалун Республикалул Лахъай азардал центрданул сакин бувну бур цаппарасса акцияртту. МахIачкъала шагьрулул КIулшиву дулаврил управлениялущал цачIуну, цуппа идаралийгу, кIулшиву дулаврил идарарттайгу бувккуну бур ва азар ччясса мутталий ялун личин даврийн багьайсса, азар лахъаврия буруччинсса чараннаясса лекцияртту.
ЦIуллу-сагъшиву дуруччаврил даву цIу лаган даврил программалул лагрулий цIусса лабораториялул оборудование дучIаврищал лавай хьуну бур центрданий диагностикалул даража.
«СПИД лахъавриясса нигьачIаву думиннавух жагьилтал бухьувкун, жу хасъсса къулагъас дуллай буру кIулшиву дулаврил идарарттащал уртакьну зузаврих. Баххана хьуну бур хIакьинусса жагьилтурал мурадру, багьу-бизу. Му иш хIисаврайн лавсун, жагьилтуращал зуншиврул, ляхълай буссару миннащал бувчIинсса мазрай гъалгъа тIунсса инсантал», – тIий бур Лахъай азардал центрданул хъунмур пишакар Равганият Мирзаева.
Лахъай азардал ливтIуминнал аьпалул кьини кIицI лагайссар майрал 21-нний. Гьашину ва пашмансса кьини щала дунияллий кIицI ларгунни 40-чин.
Ва кьини гьарца инсаннаща бюхълай бия цала чурххаву иммунодефицитрал вирус бусса-бакъасса ххал бан уква ва кьюлтIну. Укунсса мурадрай МахIачкъалалив Октябрьданул 50 шинал паркраву бивхьуну бия Республикалул Лахъай азардал ва СПИД-рал центрданул кIанттуя кIанттуйн ласайсса лаборатория.
Майрал 15-нния 21-ннийн бияннин Республикалул Лахъай азардал ва СПИД-рал центрданул пишакартурал акциялул лагрулий инсантурайх дарчIуну дур азар лахъавриясса нигьачIаврия ва муния буруччаврия бусласисса 1000-нния лирчусса чIапIив.
Мукунма, СПИД-рал отделениялий гьарца кьини кьамул байсса бур къашайшалт, булайсса бур миннансса даруртту. Отделениялул пишакартурал бусаврийн бувну, вирусрайн къарщисса терапиялул хIасиллу дур ххуйсса. Шиккува ляхълай бур ва азар дусса инсантуран психологический кумаг бансса чаранну.
