Имам Шамиллул цIанийсса Ухссавнил Ккавкказуллал чIяру профиллал гуманитар колледжраву хьунни Дагъусттаннал миллатирттал культура, багьу-бизу, аьдатру ккаккан дуллалисса майданну. Цивппа майданнугу, художествалул программарттугу хIадур дурну дия колледжрал преподавательтурал ва студентътурал.
Шикку гьуртту хьунни гьарицагу миллатрал чулухасса бусравсса вакилтал. Лакрал миллатрал чулуха бия ихтияр дуруччай органнал ветеран Абакар Айгунов, Дагъусттаннал миллатрал политикалул ва диндалул иширттал министрнал хъиривчу Гьарун Давыдов, «ЦIубарз» журналданул редактор Хизри Илиясов, Ниттил мазрал дарсирдал ассоциациялул хъунмур ПатIимат Аьлиева.
Мероприятиялул мажлис тIивтIунни колледжрал балайлул ва къавтIаврил «Сияние Кавказа» т1исса ансамбльданул щаллу бувсса нашидирттайну.
Хъирив ихтилат бунни колледжрал учредитель, ДР-лул лайкь хьусса юрист, юридий элмурдал кандидат Тавлу Казакбиевлул.
– Укунсса майданнал жула миллатирттал дянивсса дусшиву цIакь дан аьркинссар, жува лагма лаган бан аьркинссар. Жу дувару вай байранну, кувннал культуралущал кув кIул баву, студентътурал дянивсса дусшиврул арарду цIакь даву мурадрай. Колледж тIивтIуния шийнмай укунсса байранну жучIа аьдатравун дагьну дуссар. Шиная шинайн вай хъиннура гурну, гьарта-гьарзану лагай, – увкунни Тавлу Казакбиевлул.
Ванал дуллунни наградартту хьхьичIунсса ккаккияртту хьун дурсса колледжрал преподавательтуран ва мероприятиялул хъамаллуран.
Цалла-цалла программа ккаккан дунни даргиял, къумукьнал, нугъайнал, лакрал, яруссаннал, агъуллал, табасараннал, татарнал, рутуллал, оьруснал, лазгиял.
Байрандалул мажлис хъиннува лахъа-хъун бунни Дагъусттаннал артистътурал. Лакрал майдан хъун бан бувкIун бия Рашид Багатаев, Ризван Оьмариев. Авадансса, чIюлусса ссупра тIивтIуну бия лакрал майданнив. Яла-яла бусравну бия гьурттучитуран колледжрал преподаватель Ибрагьимов Тимурдул чайлул стол. НикIалай самовар дирзсса чайлул столданул циняв кIункIу буллай бия. Вай чайгу ванал цала лабораториялуву дурсса, уртту-тIутIал кьанкь нанисса нахIура-нахIусса дия.
Колледжрал лайкьшивурттая бусласисса, вайннахь барчаллагь тIутIисса ихтилатру бунни хъамаллурал.
