ЦIуссалакрал райондалул КIулшивуртту дулаврил управлениялул ва дуккаврил идарарттал зузалтран Барчаллагьрал чагъарду буллунни СВО-лий гьуртту хъанахъисса аьралитуран гуманитар кумаг баврихлу.
«70-мур мотострелковый полкрал чулуха хъунмасса барчаллагь баян буллай буру жула подразделениялун гуманитар кумаг баврихлу. ХIакьину Украиннал аьрщарай нанисса хасъсса операциялуву гьуртту хъанахъисса аьралитурал чIарав бацIаву мурадрай, зу дуллалисса ихIсандалул давурттан багьа бакъассар. Жула махъ мукунсса инсантал буссаксса, Ххувшаву ласунсса вихшалагу ххишала хъанай дур», — тIий чивчуну бур Барчаллагьрал чагъарданий.
Аьралий частьрал командирнал чулухасса Барчаллагьрал чагъарду буллунни ЦIуссалакрал райондалул КIулшивуртту дулаврил управлениялул хъунмур Светлана Къудаеван, ТIюхчардал 1-мур школалул директор ЩайхахIмад Дадаевлун ва Гьамиящиял 1-мур школалул директор Руслан ХIусайновлун.
Му бакъассагу, ялув кIицI лавгсса идарарттал каялувчитуран ДГПУ-лул ректорналгу Барчаллагь баян бунни СВО-лийсса аьралитурансса ва Херсоннал областьрай инсантурансса гуманитар акциялувух чялишсса гьурттушинна даврихлу.
