[dropcap]М[/dropcap]айрал 5-нний Ваччиял шяраву шадлугърал тагьарданий тIиртIунни «Аьпалул вахта – 2023» тIисса акция. Ваний гьурттушиву дунни райондалул администрациялул, Хъунисриннал советрал члентурал, ясли-садрал ва дуклаки оьрчIал, жяматийсса сакиншиннардал, райондалул идарарттал ва культуралул къатрал зузалтрал.

Акциялул дайдихьу хьуна, Ххувшаврил ттугъгу лавсун, СССР-данул кIийла Виричу АхIмад-Хан Султаннул гьайкалдануцI бавтIцириннал тIутIив дишаврийну. Хъирив Халкьуннал аслийсса культуралул центрданий махъру лавхъуна райондалул бакIчинал хъиривчу А. Давдиевлул, Хъунисриннал советрал председатель Т. Абакаровлул, Жяматийсса сакиншиндарал председатель Щ. Хизриевлул. Вайннал бусраврай кIицI лавгуна Буттал КIанттул цIанийсса Хъун дяъвилий халкьуннал тархъаншиврухлу жанну дуллусса ветерантал, барчаллагь увкуна акциялул сиптачитурахь.

ЧIяйннал ва Ваччиял школарттал поисковиктурал кьюкьрал ккаккан бувна дяъвилун хасъсса сценкарду, дурккуна назмурду.
Ахирданий баян бувна ца дакьикьалийсса пахъ багьаву.