18_2023_ilchi_int 
[dropcap]М[/dropcap]ай барз бур аьрщараха зузиминнал ка цIаравусса зурдардивасса ца. Гьарцагу хъузалал цалла-цалла планну духьунссар ва зуруцIунсса. Амма дур цинявннан аьмсса, ва зуруй биттур дуван аьркинсса давурттугу, дукъаргьумур, тIутIив тIий, цамур тIий, дугьансса, дургьумур щинал дуччин дувансса, цIинцIурттуцIа марцI дувансса.
Анаварну бувайсса кюнтIуллив
ТIутIал бикIу, цамунил бикIу, гьанна бугьаву дур чара бакъа аьркинсса, амма анаварну дуван къашайсса, хIатта цал-цал бизарссагума даву. Гьанна бичинсса кюнтIуллив бигьану буван хьунтIиссар ттучанная машан лавсъсса ккунукру бивкIсса лотокру ишла бувну.
Ахънил ярагъ –
ххялаххуйн
Аьрщараха зузийни аьркин бувайсса мюрш ярагъ циняв ца кIанай бикIан мюнпат хьунтIиссар ишла къадуллай лирчIсса ххялаххуя.
Найрду кьюнукьул къатIрайн батIланшиврул
ТIутIайх бивчусса кьюнукьуцIа мурхьру тIутIайх бивчусса чIумал куннасса кьанкь къадикIай, мунияту шиккун найрдугу чIявусса ва чIявуссалийла къабучIай. Кьюнукьул тIутIайн найрду лехлахи баншиврул дуван бучIиссар ва хIилла: щинал 1 литралуву дассан дурну качарданул 400 грамм, хIала дурну, вайннувун кьюнукьул къатIуясса ца-кIира тIутIигу дирчуну, кIюрххицIун нацIу щин пурх дуван кьюнукьул къатIрайн.
ТIутIайх бичлачийни щин мадутIаванни
Интнил махъва-махъсса зуруй чIявуми мурхьру ва къатIри тIутIайх бичай. Ва чIумал вайннун аьркинссар къачансса гуж ва гихунмай ххяхлахаврин чара бакъа аьркинсса элементру. Мунияту вай цанна-цанна дакьайсса оьргъашиврул буччин бувну хъинссар. Амма мурхьру тIутIайх бичлачийни вайннуйн щин дихьлан къабучIиссар. Ми
къупру хъячиннинва буччин буван аьркинссар щинал.
