Тарихрал язисса лишан — «Ххувшаврил Ттугъ»

Каспийск шагьрулий шадлугърал даражалий хьунни «Ххувшаврил Ттугъ» тIисса акция. ДР-лул БакIчи Сергей Меликовлул сипталийнусса акциялул мероприятияртту лахъа-хъунну бартдиргьунни республикалул цинявппагу шагьрурдай ва районнай.

Акциялул парадрай гьуртту хьунни ДР-лул ХIукуматрал председатель Рамазан ЖахIпаров, ДР-лул Халкьуннал Мажлисрал председательнал хъиривчу Юрий Левицкий, вице-спикертал СайгидахIмад АхIмадов ва Камил Давдиев, депутат Заур Расулов, Хъун дяъвилул ветерантал, Украиннал аьрщарай нанисса хасъсса операциялуву гьуртту хъана­хъисса аьралитал, юнармейцы, кадетътал, ТОКС-рал следопытътал, властьрал органнал вакилтал, жагьилтурал ва студентътурал жяматийсса вакилтал.
Бусравсса хъамаллуравух бия Каспийск шагьрулул бакIчи Борис Гонцов, Шагьрулул Мажлисрал председатель АьвдулвахIид Жаватов, генерал-майор Герман Кириленко, контр-адмирал, Кас­пийскаллал флотилиялул каялувчи Александр Пешков.|

Парад дайдирхьуна шагьурулул майданнив Кутузовлул 2-мур даражалул Ордендалул 150-мур Идрицкий стрелковый дивизиялул Ттугъ гьаз баврийну. Му гьаз бувна Къучагъшиврул ордендалул кавалер, хасъсса аьралий операциялул гьурттучи Абсултан Абсултановлул ва Дагъус­ттаннал «Юнармиялул» активист ХIамзат Аьбдуллаевлул.
Шагьрулул майданнив кьюкьрай бавцIуну бия личIи-личIисса аьралитурал подразделенияртту: кадетътал, юнармейцы.
ДР-лул БакIчинал чулуха Ххувшаврил байрандалущал цинявппа барча буллалисса ихтилат бувна Рамазан ЖахIпаровлул.

– Аьдатравун багьсса куццуй, жула тарихрал ца лишанну хъанахъисса Ххувшаврил Ттугъру машинарттайн лачIлай, къатрал, идарарттал хьхьичIун лахълай, Георгиевский лентарду бахIлай, байран лахъа-хъун дуллай бур агьали. Мунил исват буллай бур агьалиначIа Ххувшаврил байрандалул кьимат лавайсса бушиву. Щалагу билаятрай кунма, Дагъусттаннайгу нажагьсса бухьунссар Хъун дяъвилул щавщи къабивсса кулпат. Та дяъвилийн лавгун ур сайки 180 азара да­гъусттанлув. Жула вирттаврал ккаккан дурссар ва дуллайнма буссар къучагъшивуртту. Миннавасса ур Рейхстаграй Ттугъ бивщусса АьбдулхIаким Исмяилов. ЦIанагу хасъсса операциялуву гьуртту хъанахъи­сса аьралитал ва миннал чIарав бацIлацIисса инсантал умуд бивхьуну бур, Хъун дяъвилий бу­ттахъал кунна, Ххувшавугу ларсун, Аьрасатнал Ттугъ бюхттулну гьаз баншиврийн, – увкунни Рамазан ЖахIпаровлул.

Хъирив ихтилат бунни Украиннал аьрщарайсса хасъсса операциялуву шамагу арс гьуртту хъанахъисса ниттил Зубайжат ХIамзалаевал.
Ва кьинисса шадлугърал сий гьаз дунни «Лезгинка» ансамбльданул, Къизлардал «Терский» ансамбльданул ва МахIачкъала шагьрулул администрациялул Культуралул управлениялул творчествалул коллективирдал.