Ватандалул Вирттаврал кьинилуцIун дархIуну Дагъусттаннай хьунни «Вирттал жущалва буссар» тIисса акция.

Мероприятиялул лагрулий Лениннул комсомолданул цIанийсса паркраву хьунни митинг. Шикку гьуртту хьунни личIи-личIисса ведомстварттал ва жяматийсса организациярдал вакилтал, дяъвилул ва захIматрал ветерантал, оьрчIал жяматийсса цачIушиннарал 600 активист, студентътал, дуклаки оьрчIру.
Митинг тIиртIунни Аьрасатнал Гимнрайну. Хъирив ихтилат бунни Дагъусттаннал кIулшивуртту дулаврил ва элмулул министрнал хъиривчу МахIаммад Аьбидовлул.
– ХIакьину щалагу жула билаятрай кIицI лаглай бур Ватандалул Вирттаврал кьини. Жува дакIнийн бичлай буру билаятрал тархъаншиву ва цашиву дуручлай бивкIми. ЦIанасса никирангу кIулну бикIан аьркинссар ва эбратну хьун аьркинссар жула вирттал. Дунияллул цумур мурцIний бухьурчагу, билаятрал, республикалул цIа бюхттул дуллай бухьурча жула жагьилтал – мугу виричувшиврун ккаллиссар, – увкунни ванал.
Митинграй Дагъусттаннал Десантниктурал союзрал учредитель Арсен Абилаевлул наградартту дуллунни хасъсса аьралий операциялуву гьуртту хьусса дагъусттанлувтуран: Оьмар Оьмаровлун, Кьурбан МахIаммадовлун ва Рашид Рабадановлун. Хъирив Абадул цIарачIа ва Вирттаврал Аллеялий дирхьунни тIутIив. Ва кьини республикалул шагьрурдай ва районнайгу аьралитурал гьайкаллачIа хьунни митингру, дирхьунни тIутIив. Щалагу Аьрасатнаву нанисса «Классная встреча» проектрал лагрулий хьунни Чувшиврул ва дакIнийн бичаврил дарсру. КIулшивуртту дулаврил идарарттай тIиртIунни Дагъус­ттаннаясса Вирттавран хас дур­сса 502 парта.