ЦIуссалакрал райондалиясса делегация гьуртту хьунни Москавлив декабрь зурул 9-10-нний хьусса Ватандалул Вирттаврал кьинилун хас дурсса мероприятиярттай.
Дайдихьу хьуна Москавуллал Аьралий гужирдал ва дяъвилул ветерантурал къатраву тIиртIусса вирттавран хас дурсса выставкалийну.
Му выставкалий 80 виричунал сияхIраву дия ЦIуссалакрал райондалул ЦIуссаккуллал 2-мур школалун цIа дирзсса Совет Союзрал кIийла Виричу АхIмад-Хан Султаннул, Гьамиящиял шяраву гьайкал дацIан дурсса Виричу Ханпаша Нурадиловлул, ЦIуссалакрал гимназиялун цIа дирзсса Аьрасатнал Виричу Мутай Исяевлул, Шушиннал школалун цIа дирзсса Аьрасатнал Виричу Серков Дмитровлул, ЦIуссачIурттащиял 2-мур школалун цIа дирзсса Аьрасатнал Виричу Алексей Козиннул цIарду.
Выставкалия махъ ЦIуссалакрал райондалиясса делегациялийн оьвкуна байрандалун хас дурсса концертрайн.
Ва мажлисрайн бувкIун бия Совет Союзрал ва Аьрасатнал Вирттал ва вирттаврал нину-ппу, гъан-маччами.
ЦIуссалакрал райондалул бакIчи МахIаммад-ХIажи Айдиевлул байрандалул сакиншинначи Михаил Сердюковлун пиш-каш дунни Дагъусттаннаясса бахшишру: варси, къуттакьяпа ва ххаржан.
Махъунмай зана хьун хьхьичI ЦIуссалакрал райондалиясса делегация бивунни АхIмад-Хан Султаннул, Дмитрий Серковлул, Тимофей Хрюкиннул гьаттардийн ва Вирттаврал гьаттай дирхьунни тIутIив.
