МахIачкъалалив, «Труд» стадионналий, хьунни лакрал миллатрал лайкьсса арс, политикийсса ва жяматийсса ишккакку, хъунисса къуллугъирттай зий ивкIсса Амучи Амуттиновлул аьпалун хас дурсса Республикалул боксрал шанна кьинисса турнир.
Дагъусттаннал шагьрурдаясса ва шяраваллавасса ттуршунниха ливчусса чIавасса боксёртал майданнив бувккуна ххувшаврил бахшишру ласун. Ххув хьуминнавух бия МахIачкъалаллал, Каспийскаллал, Сулайман Стальскийл ва Къайтагъуллал районнал спортрал школарттал хIадур бувсса гьурттучитал. Ххув хьуминнан дипломру, кубокру ва грамотарду дуллуна республикалийгу, кьатIувгу ххуйну кIулсса машгьурсса спортсментурал, олимпий чемпионтурал, махъ нанисса инсантурал. Турнирданул хъамаллуравух бия Дагъусттаннал ХIукуматрал хъунаманал хъиривчу Ризван ГъазимахIаммадов, ДР-лул Халкьуннал мажлисрал комитетрал хъунама Камил Давдиев, Ккуллал райондалул хъунама Шамил Рамазанов, Къизилюрт шагьрулул хъунама МахIаммад МахIаммадов, республикалул вице-премьерну ивкIсса Низами Казиев, Амучи Амуттиновлул хьхьичIунсса дус Имампаша Чергизбиев ва республикалул министерствардал ва ведомствардал цаймигу вакилтал, районная бувкIсса хъамал.
Турнирданийн бавтIцири барча буллалисса ихтилатру бувна Камил Давдиевлул, республикалул спортрал министрнал хъиривчу, боксрал олимпий чемпион ХIайдарбаг ХIайдарбаговлул, Аь. Аьлиевлул цIанийсса спортрал школалул (ШВСМ) директор Нажмуттин Аьбдулвагьовлул, республикалул боксрал федерациялул хъунаманал хъиривчу, жяматийсса ишккакку Достали Гейбатовлул, чIярусса шиннардий Амуттиновлущал Пенсиялул фондрай зий ивкIсса политолог, Дагъусттаннал Пенсионертурал союзрал хъунама АьбдурахIман МахIаммадовлул, Амучил уссу, Ростехнадзорданул Ккавкказуллал управлениялул хъунаманал хъиривчу Артур Амуттиновлул. Шиккува кIицI лаганну ва турнирданул сакиншинначиталну ва спонсорталну бушиву Амуттиновхъал кулпат. Турнирданий ххув хьуми барча буллай, Артур Амуттиновлул кIицI лавгунни укунсса соревнованиярттал чIавасса спортсментураву хIарачат буллансса гъира ххи бувайшиву, цIусса цIарду ялун личин дайшиву.
Турнирдануха зий бивкIминнал биялсса хIарачат бувну бия ва лавайсса даражалий щаллу дуван, ххуйсса байран хьун дан. Турнирданул сий хъиннура хъунна дуруна концертрал программалулгу. Мунил гьурттучиталгу бия Лариса ХIажиева, МухIсин Камалов, Карин Кьадинаев, къавтIаврил ансамбль «Дагъусттан».
— Ванийн республикалул лагрулийсса турнир учирчагу, цайми регионная бувкIсса хъамалгу, олимпий чемпионталгу, машгьурсса спортсменталгу бия. Артур Амуттинов бакIчину щалвагу кулпатрал буниялттунгу хъунмасса хIарачат бунни шанма гьантлийсса турнир Амучи Михайловичлул бусравсса цIанин лайкьсса даражалий тIайла дуккан. Чил миллатирттал инсанталгу лагма лаган бувну, жула лайкьсса арсурваврал аьпа уттава буллалисса давуртту дулларча, жулва лавгмунил хIурмат бушивруцIун, бучIантIимунийгу дакIцIуцIаву душиву ккаккан буллалиссару илданун. Яла-яла, ялун нанисса никирахьгу миллатрал тарихраву яргсса цIарду кьариртминная бусласиссару,– тIий ур турнирданий культуралул бутIул хъар цайнна ларсъсса Дагъусттаннал культуралул лайкь хьусса зузала Супиян Оьмаров.
ДакIнийн бутану, Амучи Амуттинов личIи-личIисса шиннардий Дагъусттаннал ПаччахIлугърал Советрал членну, Халкьуннал мажлисрал депутатну, экономикалул министрну, ХIукуматрал хъунаманал хъиривчуну, республикалул Пенсиярттал фондрал каялувчину ивкIшиву. ХьхьичIунсса гьурттушинна дуршиву 1999-ку шиналсса аьралий иширттавух, лакрал миллатрал культура, маз, литература ядаврил ххуллийгу хъуни-хъунисса давуртту дурсса хIакьсса патриот ивкIшиву.
Суратру: Супиян Оьмаровлул
