Октябрьданул 2-нний «ХIакьикьат» кказитрал редакциялий хьунни Дагъусттаннал аьралий комиссар Дайтбаг Мустапаевлул ссуттилсса призыврал хIакъиравусса пресс-конференция. Ссуттилсса призыв дайдирхьуссар ноябрь зурул 1-нний.
Щалагу билаятрай аьралуннаву къуллугъ бан уцин тIий ур 120 азара инсан. Вай ларгсса шинал вара чIумулнияр 7,5 азара инсан чанну хъанай бур. Военкомнал бусласимунийн бувну, уттинин октябрь зуруй дайдишайсса ссуттилсса призыв махъун дагьну дур частичная мобилизациялуцIун бавхIуну аьралий комиссариатирттал зузалтрал даву щарчуну душиврийн бувну.
Дагъусттанная ссуттил аьралуннаву къуллугъ бан уцин тIий ур 3,5 азара инсан. Вай къуллугъ буллан тIий бур билаятрал личIи-личIисса кIанттурдай, Луганскаллал, Донецкаллал Халкьуннал республикардай, Херсоннал ва Запорожуллал областирдай личIаннин. Аьралуннаву къуллугъ бан хьхьичIва-хьхьичI буцинтIиссар, личIи-личIисса багьана-сававрттайн бувну, уттинин къуллугъ бан къалавгсса оьрмулул хъунисса жагьилтал, ларайсса ва дянивсса пишалул кIулшивуртту думи, мукунма военно-учетный пиша буми.
Дайтбаг Мустапаевлул бувсунни республикалул ва районнал военкоматру призыврал кампаниялийн хIадурну бушиву, призыврал мероприятияртту дан циняв шартIру дузал дурну душиву. Ванал кIицI лавгунни республикалул военкоматрай зий душиву «Горячая линия», призывниктураща ва миннал нитти-буттаща, оьвкуну, призыврал хIакъираву цIухху-бусу бан бюхъантIишиву.
Повесткалийн бувну военкоматрайн къабувкIсса жагьилтал Аьрасатнал законодательствалийн бувну жавабрайн буцинтIиссар.
Р.S. Октябрь зурул 28-нний Аьрасатнал обороналул министр Сергей Шойгул баян бунни Аьрасатнал Президентнайн частичная мобилизация къуртал хьушиву.
Аьрасатнал Генштабрал кIицI лавгунни ссуттил аьралуннаву къуллугъ бан буцлацисса срочниктал хасъсса аьралий операциялуву гьуртту къахьунтIишиву.
