Ларгсса нюжмаркьини Лакрал театрдануву лайкьсса даражалий хьунни хIакьсса лакку мукъул кьадру-кьимат кIулми ссавур дакъа ялугьлай бивкIсса, унгу-унгусса лакку шеърилугърал байрандалун ккалли бансса иш – лакрал миллатралгу, дагъусттанналгу хъунасса шаэр Мирза МахIанмадов дунияллийн увккун 100 шин там шаврин хас бувсса аьпалул мажлис.
Ва кьини шаэр дакIнийн утан бувкIминнал дянив нажагьссавагу акъахьунссия ванал шеърирду дакIних къакIулсса тIисса пикри хIасул хъанай бия, театрданул жанахIраву инсантал кувннахь кув шеърирду ккалай ккавккукун. ТIайлану увкуну бакъаривла, туну: «ХIакьсса шаэрнан бивкIу бакъассар, ми жуятува батIул хьурчагу, дакIурдия батIул къашайссар», – куну.
Мирза МахIанмадовлул шеърилугърал ляличIисса дунияллий чIявуссар ттула дакIнивун, аькьлу-кIулшилувун куртIну бувхсса шеърирду. Миннувагу хIакьсса зунтталчунал яхIлил ва къириятрал гимну хIисав бансса «Буттал гьаттай» ва «Ниттил аманат» тIисса шеърирду. ЧIапIив хъахъи ларгун дур столданий бишай жужну хьусса Мирзал шеърирдавасса, ттунна яла асар хьуми калимартту чирчусса блокнотралгу. Миннул ттуву ниттил мазрахссагу, буттал улклухссагу ччаву лещан къаритан, дуруччин кабакьу буллалиссар.
Мирза МахIанмадов жуятува батIул хьуния шийннай ларгун дур 52 шин, шаэрнал цала дунияллий бувтсса оьрмулуяргу ххисса. Лавгун бур дунияллия шаэр гъанну кIулми, мунащал щябикIан-бизан, жап учин бахтти хьуми. Амма Мирзал бюхттулсса поэзиялул кьимат кIулми жула дянив бушиву – мугу бахттир. АцIансса кIану бакъа бувцIуну бия ва кьини Лакрал театрданул зал.
![](https://ilchi.info/wp-content/uploads/2022/11/0001-e1667562107454.jpg)
Шаэр дакIнийн утан бувкIун бия политикалул ва жяматрал, магьирлугърал ишккаккулт, ванал творчество ххирами, шяравучутал, гъан-маччами.
«Оьрмулий цалли ник рирщусса, – увкуну бур Мирзал – мугу душманнайн ккулла битаншиврул». Дяъвилий гьуртту хьусса инсаннал цамур хасият дикIангу къабюхъайссия.
ХIасил, Мирзая буслай бия, ва миллатрал къюкIливу ливчIсса поэзиялул бусала, миллатрал бусала, мазрал ва балайлул бусала хIисаврай. Бусалардаву личIаву бакъарив шаэрнал яла хъунмур талихI.
Шаэрнал оьрмулул ххуллия бувсуна ДР-лул Халкьуннал Мажлисрал хъунаманал хъиривчу Камил Давдиевлул.
ДНЦ РАН-далул элмийсса зузала МахIаммад МахIаммадов:
– ХIакьину, ниттил мазру ссуссукьу хъанахъисса заманнай, ва куццуй щапI куну зал бувцIуну ххал шайхту, дачIи ттуршукулул хьхьичIва жуятува батIул хьусса шаэрнал назмурду тIалавсса миллатрал мазран бивкIу бакъашиврийнсса вихшала дирхьунни дакIниву.
Мирза МахIанмадовлул творчествалия гъалгъа тIун бивкIукуннив, кIицI бан ччива, цув ивкIун ур цала заманнул шаэр, совет заманнул шаэр, соцреализмалул хIуччарду буручлачисса шаэр, амма цува халкьуннал дакIурдиву ливчIун ур шаэр-лирик хIисаврай. Ванал назмурду чIяруми балайрдайн кIура дарну душиврулгу буслай бур му мукун бушиву. Дунияллий бувтсса оьрму кутIасса бивкIхьурчагу, бивкIу бакъасса бур Мирзал шеърирдал оьрму.
Руслан Башаев, «Илчи» кказитрал хъунама редактор:
– Цуксса хIайпнугу, Мирза МахIанмадовлущал оьрмулуву хьунаакьинсса кьисмат ттун нясив бувну бакъая. Амма, ккаккансса, ихтилат бансса бахтти тIайла къабацIарчагу, ванал цIанил бияла манзилданий асар хъанахъисса бия. Ванал назмурдал, назмурдахун чирчусса макьаннал цуппа гьава бувцIуну бусса куннасса тагьар дикIайва.
Яла махъ, нава, чан-кьанну тIиссакссагу, литературалухун ххаахлан ивкIсса чIумал, ттун исватну бувчIуна ванал творчество цирив ца, цайминнал дакъасса, гьулусаншиврул, гьалакшиврул видурцIусса душиву, ванал язи-язими назмурду халкьуннал дакIния щин хIарчIун чирчусса душиву.
Мирза МахIанмадовлул шеърирду цахлува цивппа гъалгъа тIисса бур, цайнува цивппа ялапар хъанахъисса бур. Вай ялапар хъанай личIантIиссар тIийгу ура хъинну лахъисса манзилданий, дунияллий, миллат хIисаврай, лакгу, лакку мазгу уттавану буссаксса.
«Зунттал хъами» журналданул редактор Аьжа АьбдурахIмановал бувсуна шаэртурал къатлуву ялапар хъанай бивкIсса Ххаппалаевхъал ва Мирза МахIанмадовлул кулпатирттал дянив цIакьсса дусшиву ва хIалашиву диркIшиву. ДакIнийн бувтуна ряхра шинал оьрмулувусса цина цалчин ккавксса Мирза дакIний ливчIун ивкIшиву ганал дакIнийхтунусса чанипарсса пишлийну ва цIаран лавхъсса яруннайну. Гукун дакIнийхтунусса, аьчухсса ивкIшиву чIивинащалгу, хъунанащалгу.
– Мирзал творчествалия усттарну гъалгъа бан ттуща къахьунссар, аммарив кIицI къабувну кьабитан къахьунссар ганал творчествалун кьимат бишлашисса ва чIивисса мисал. Журналданий бищун лавсун бувкIсса шеърирду на буттан, Дагъусттаннал шаэр Юсуп Ххаппалаевлун, ккаккан байссия, бищун бучIисса бурив, бакъарив ккаккан. Ца кьинирдал кьини буттал ттухь увкунни: «Ласича, Мирзал луттирду букки. Вин Тютчев кIуллив? Мирзагу кIулну икIан аьркинссар, га лакрал Тютчеври. Мирзал асарду бувккуну махъ вища вищавагу бюхъавантIиссар цайми шаэртурал шеърирдал кьимат бищун», – куну.
![](https://ilchi.info/wp-content/uploads/2022/11/IMG_3977-e1667562001841.jpg)
Шаэрнал творчествалия ихтилатру бувна Дагъусттаннал Чичултрал союзрал Лакралмур секциялул хъунама Илияс МахIаммадовлул, «ЦIубарз» журналданул редактор Хизри Илиясовлул, Мирзал гъанчу Басттамин МахIаммадовлул, Хъусращиял шяраваллил бакIчи Арсен Аьлларазуевлул.
Экрандалия бавунни Мирзал творчествалия кусса Ширвани Чаллаевлул, Расул ХIамзатовлул, Фазу Аьлиевал, Юсуп Ххаппалаевлул, Сибирбаг Кьасумовлул махъру.
Шаэрнал дюххансса назмурдугу ккалай, мажлис бачин бувну бия Дагъусттаннал халкьуннал артист Аслан МахIаммадов ва артистка Мариян Шихамирова. ВичIи дирхьуминнайн асар биянну назмурду дурккуна Шамсуттин Къаплановлул, Аьбдул Мурадовлул, Адам ХIайдаевлул.
![](https://ilchi.info/wp-content/uploads/2022/11/photo_5406648881569186617_y-e1667561927453.jpg)
Халкьуннал балайрдал кIану бувгьусса шаэрнал мукъурттий балайрду увкуна Арслан Шагьмардановлул, Луиза Шагьдиловал, Халисат Батирбековал, Шамсуттин Къаплановлул, Лариса ХIажиевал, Нурианна Къаллаевал, Шагьалай МахIаммадовал, Марианнал, Карин ва Диана Кьадинаевхъал, Жанна Кьурбановал.
Шаэрнал душваврал оьрчIал оьрчIал дурккуна оьрус мазрайсса назмурду.
Гьарцагу шеъри бувккунан, балай увкунан тIутIал кацIру буллай, аьпалул мажлис сакин бувсса Лакрал театрданул коллективрахьгу, ппу дакIнийн утан бувкIцириннахьгу барчаллагь тIий бия Мирзал ххаллилсса душру – Фиалка, Людмила, Эльмира ва Жамила.
Мажлис шанна ва дачIи ссятрай лахъи лагарчагу, мякь къаливххунма ливчIшиву кIицI лаглай бия тамашачитал.
Га мажлисраясса ттула макьала къуртал дуллай, бищун ччай бур гиккун бавтIсса сайки цума-цанналагу зума-мазрай тикрал хъанай бивкIсса ва шеъри, цилгу шаэрнал хасият ва гражданшиврул хIучча жунма аьч буллалисса.
Ник рирщуну бивтуссар
На душмантурайн ккулла,
Тти лахIан къаданшиврул
ЩилчIав хьхьичI никру ттулла.
Ттуплил цIалцIилул бувкьссар
БакIрая муххал кьяпа,
Тти гьич къабукьаншиврул
Зурданул хьхьичI на кьяпа.