Дяъви – му тачIаввагу, чувчIаввагу хьуну ччисса зат бакъар, щилчIаввагу хьурдай чайсса зат бакъар. Амма гьарца дяъви гьарцагу дяъвилуха лавхьхьуссагу къабикIайхьунссар, къабикIайссар.
Ттисса заманнай сукку хъанахъимур дяъвилуцIун бавхIумур вас-ццахгу, цайми заманнай хъанай бивкIсса дяъвирдацIун бавхIумургу цанничIа ца бишин, цанниха ца лащан бан хъанайгу бакъахьунссар – цан бакъарча, уттимур вас-ццах сакин хъанахъисса буну тIий щалларагу дуниял ца базилух духлаган дан бюхъайсса ярагъунницIун бавхIусса пикрирдай. Къанясив баннав Заннал!
Амма, мугу мукун бургала куну, му кIанттугу цIакьлин бувгьуну, цилла цурда гегемондалун ккалли дурсса дуллалисса ца паччахIлугърал, ягу мунилва амбициярттал биялалий сакин дурсса, паччахIлугъирттал лагерьданул цайми-цайми билаятирттал, цайми-цайми халкьуннал ялув цаллами низамрал кьанунну къадурхIуну къаританну тIисса чIумал къалявкъуну къабикIан аьркинссар «цахъи тинайну ацIу» учинсса чувшиврул гужгу.
Мукунсса гужну махъсса ацIра-кьура шинал мутталий хьуну бур хъунмурчIин Аьрасатнал улча, мунин сивсуну бацIан багьну бур цихлува цуппагу, цайминнахлугу. Му мукун шаврил ца яла хъунмур багьана-сававгу, ттул пикрилий, аьнтну дархIусса дур Аьрасатнал паччахIлугърал БакIчину бакI бусса инсан тIайла ацIаврицIун. БакIракъунтталий дагьну най диркIсса паччахIлугъ, чIирисса чIумул мутталий ччаннай дацIангу дурну, ччимур даражалий цилва интересру буруччин шайсса кIанттайн лахъан дурунни ванал. Му мурчIинангума къачIалай бакъахьунссар!
Му мукун бушиву лялиян бан къхъанахъисса гужругу хъиннува ялун ливчуну, Аьрасат цумур чулуха цукун лахIан бан шайрив ххал буллай, хъанан бакъашивугу пIякь бивкIун чIалай, оьцIуцIаврил цIавцIлай бур, сайки цIан-чани хъамадиртун.
Утти ца-кIива махъ вай гьантрай хIасул хьусса тагьардануцIун бавхIунугу. Президентнал (Главнокомандующийнал) хIукмулийн бувну баян бувну бур, Украиннай нанисса операциялуцIун бавхIуну, чан-кьансса мобилизация дуллалишиву. Микку мукссава къабувчIинссагу цичIав бакъар: Аьрасатнайн данди бавцIусса Украиннал (НАТО-лул яругъуннилгу балгусса) территория – та чIири-кьирисса территория дакъар, дазуцIухсса мюхчаншиврунмагу аьркин багьай бухьунсса ххишаласса инсантал, аьралитал. Мугу личIину махIаттал бизансса, циванни, цукунни тIий, рязи бакъа сукку хъанансса зат бакъар. Амма чансса духьурчагу жяматийсса ва политикийсса тагьар, паччахIлугърал ягу мунил субъектрал ккаклакисса ишру чIири-хъунсса паракьатIшивруцIа хъанан бивкIсса чIумал, чара бакъа ялун личай, щурун бикIай муниннин цалва мурадру лабивхьуну бивкIсса, деструктурнайнсса иширттах мюхтажшин дусну бивкIсса «гьалмахтал». Жула бур ва иширацIун бавкьусса ххаллилсса учала: «ИвкIусса Муттин – аьтIун ччисса АтIа», — тIисса.
БайкъалитIайсса дяъви къабикIайссар. Дяъви – му давран бакъар. Инша Аллагь, цуксса захIматну бунугу, та дяъвилул дазу-зумагу хьуну, арсругу цала-цала ниттихъачIан сагъну-саламатну зана бивкIун, Залгу жува тIиний авцIуну лякъиннав! ЗахIматсса чIумалли цаннал цаннахсса ччаву хъиннура цIакьну дуруччин аьркинссагу.
Р. Башаев
