Уттигъанну, сентябрь зуруй, бувксса лакку мазрайсса «Ас-Салам» тIисса кказитрай дия «Даву ляхълай дакъар» тIисса макьала. Буниялагу, ва уттисса жагьилтурал ца буруккинсса ишну хъанан бикIай. Амма, пикри бувсса чIумал, цахъис бухьурчагу, бакIгу зузи бувну, курчIилшивугу къадарча, давурттугу, зунсса кIанттурдугу чан бакъар.

Ва макьала ккалаккийни ттул бакIравун бувххуна ца укунсса иш. Жунма кIулсса кьяйдалий, зунттавусса шяраваллаву яхъанахъисса инсантал чIявуми бугьарасса, пенсиярттайн бувксса бур. Ва иширайн бувну, чIявуну вайннан къатта-къушливусса давуртту дуван кумагчиталгу аьркинну бикIай.

Ттунгу дакIнийн багьунни, хьунссияхха вай гъинттулсса зурдардий даву дакъасса жагьилтураща, зунттавун бувкIун, вай бугьарасса инсантурал ябуллалисса ятту-гъаттаран кIинттул бичлан­сса ххулув буван ка-кумаг буван тIисса пикри. Шикку аьркин­сса затнугу хъанай бур анжагъ ца чIиникI. Вагу шийва ттучаннай кIюйлущал бахлай бикIай. Яхъа­нансса кIанттугу шяраваллаву чансса бакъар. Къатригу кьабивтун, шагьрулийнмай лавгсса заллухъругу чIявур. Дулун­ссия пенсионертурал цанма ххулув бувсса даврихсса арцугу.

Шиккува ца ттунма къаххуй бивзсса затгу кIицI бан ччива. Ший, жучIава зунттаву, чIиртту буллалисса усттартал бур цалла даву цакьнивасса багьраяр сайки кIилийнусса багьри бивщуну дуллай. Нагума вайннахь увкуссия: «Зу зулла кару доллардах машан ласардув? Циван буру мукун, укунмагу мискинсса зунттал инсантал цIиклай?» – куну. Жавабмур ттухьхьун щилчIав къадуллуна. Ва ишгурив къахъинни.
ХIасил, ва на тIутIисса, ххулув баврил, давумур бучIия, бригада хIасул бувну, пенсионертурангу кумаг хьунну, жагьилтурангу къажанжи хьунну дуван.