Августрал 30-нний ДР-лул шяраваллил хозяйствалул ва бакIлахъиялул министрнал цалчинма хъиривчу Шарип Шариповлул каялувшиврий хьунни Дагъусттаннал АПК-лул оператив штабрал батIаву. Муний ххал бивгьунни цаппара агьамсса масъалартту. БакIрай вичIи дирхьунни августрал 12-нния шийнмай сукку хьуну бивкIсса мурчал Къизлардал авлахърай хьусса тагьарданул хIакъиравусса информациялух.
Шарип Шариповлул тIимунийну, аьрщи, хаснура ялувмур къат, кьаркьуну диркIун дур. Мунийн бувну, мунал райондалул Шяраваллил хозяйствалул управлениялул хъуниминнайн ва хозяйстварттал каялувчитурайн тапшур бунни кIул буван циксса лазуни дуссарив ризкьилун хIадурну ялун нанисса кIинтнийн. Мунал мукунма амру бунни лазуни ххишалану хIадур дуван.
Хъиривмур агьамсса масъала бия цила чIумал дугьаву ссуттил хъуру. Дагъусттаннай аьркинну дур дугьан 96 азарда гектарданийсса ссуттил хъуру, миннувату 78 азарда гектарданий бугьан тIий бур ссуттил лачIа. ХIакьинусса кьини гъай куну дур дугьан аьркинну диркIсса хъуруннал 50 %. Аьмну лавсун, бугьансса гьанна щаллуну бур 60 %.
БатIаврил хIасиллу дуллай, Шарип Шариповлул бувсунни цIанасса чIун хъинну агьамсса хъанахъишиву хъузалтран. Мунал тIимунийну, хъинну хIадур хьун аьркинссар ссуттил хъуру дугьаврийн, циняв каширду ва луртанну цачIун дурну. ДР-лул Шяраваллил хозяйствалул министерствалул шайссаксса хIарачат бантIий бур АПК-лул даву лядуккан давриву.
Мунал мукунма бувсунни ялун нанимур шиная тIайла хьуну ЛПХ-рдаща (личные подсобные хозяйства) бюхъантIий бушиву тамахI бишин паччахIлугърал кумаграйнгу.
