Аликлул хъатIи буллалисса кьини рирщусса сурат
Шанма барз шавай бур ттул ялув баргъгу бавщуну, цIурттигу левщун.
Кулпатрава шама арс – кIия уссил, ца ссил Украиннал аьрщарай хасъсса аьрали операциялий гьуртту хьун лавгния шиннай рахIатшиву дакъая, дяъвилул оьсса хъапа жуйхвагу бищунсса дакIнил буслай бухьунссия, вас-ццах чурххава буклай бакъая.
Ттул яла хъунмур хIучI бикIайва макIурдия, ттухьва кIараллил щялмахъ тачIав къабусавай тIий. КIюрххил чаклил чIун хьуннин ссаха-бунугу зий лякъайвав, чаклийн къабивзун къаличIан. Зунзулчаннахь дурмур дуаьри ЗанначIан дияйсса, кьамул дайсса учавай тIий. КIюрххил чак бувну махъ анжагъ бигьалаган чулий багьарча бакъасса, яний я къалавкьуну хьуна шанма ва бачIи барз.
Июнь зурул 11-мур кьини… Агь цанъя га кьини Аллагьнал на кIукIлу бувну шанаши бувну бивкIсса! Къабувну ливчIуна кIюрххилсса чакгу, дуаьрдугу. ХIакьинугу дакI дуссар нара га кьини дуаьрду къадурну лирчIун тIий хьусса кунма га оьзру.
Ххюва гьантлул хьхьичI чивчуну бия махъва-махъ Аликлул ттучIан. На чивчумунин тIурча жуав къадуркIуна. Дурагу дурккуну дия июнь зурул 9-нний. НиттичIан, буттачIан чивчуну бурхха тIий, паракьатну бура. Амма 10-ннил хьхьуну бувну бия ниттихь ва буттахь махъва-махъсса жап.
Алик аьраличу ия оьтту-ттурчIаву, хасиятраву, багьу-бизулуву.
ЩиячIав кьюлтIсса зат бакъар, ца ппурттуву, аьралуннаву къуллугъ буллан къабуциншиврул арцурду дуллай бивкIсса. Муни Аликлул, чIаважагьилнал учайва: «Ттул ниттиуссил дуссарагу аьсившиву чаннал мушакъатсса уну, аьралуннаву къуллугъ буллан къауцавриясса дикIайва. Цукун бюхъайссар чувнаща аьралуннаву къуллугъ баврия махъаллил хьун?» – куну.
«ВицIун даркьусса кьини хьуннав, ниттирссил ххазинай!» – тIий, чичайссия на гьарца кIюрххил АликлучIан. (Га ччя-ччяни связьрай икIайва, уссилми кIира-шанна нюжмардий цал бакъа къабуккайва, Аьрасатнал дазуйн бувкIукун). Къадирну дия ттул смс-ру 11-ннийгу, 12-ннийгу, 13-ннийгу, 14-ннийгу.
Ци-бунугу бивкIссания баянссия, гьай-балики связь дакъасса кIанттай бикIан тIий буру. Шанма-мукьва гьантта хьуну бия жул ссаячIав хаваргу бакъа, зий-занай, шамагу оьрчIал бакIрая цадакьарттугу бачIлай.
14-мур июнь, 16 ссят ва 43 минут – телефон канил дургьуну ватсап тIиртIусса — ссу чичлай бур чIу. ДакIнивун багьунни ххуй бакъасса илгьам, зурзу тIун диркIунни кару.
«ТтучIан ДНК ласун бувкIуннихха, ттул къаттавагу къаччувччурвав?» – бавунни ссил леххаву. Ялагу шанна лахъисса хьхьу хьунни тIар, бакъар тIар тIий, ца чIирисса вихшала къакьукьлай руртсса.
Дяъвилул арсру къабайссар, бумигума зеххайссар – цивппагу язи-язими. Язиминнавагу язисса уссия жулмагу. Ккаркхьунссар зуннагу суратру, дурхха ми хIакьину щала интернетравух ппив хьуну. ЯбацIансса, бакI-чурххал оьвхъусса, симан нурданул лархъсса!
Чичлайнма бур Аликлул дусталгу, Ватандалийн ва аьрали гьалмахтурайн дакI тIайласса чувнацIа хьуну, яхI гъавгъун бушиву буслай. Вайннал чивчумур ккалай хьхьичI ацIлай ур ххюра шинавусса Алик. Тиччара най дунура дия ванаву чумартшивугу, дакI тIайлашивугу.
Ца кьини бувкIунни чIаххув душ ка дургьуну Аликгу увцуну, тталлуцIун авхIуну уну, ттирихIин къаацIлай ия тIар: «Ити на авхIунал ттирихIин, акъарив на ттирихIа тIий, аьтIий ивкIсса ххан бикIайча», – тIий. Щил авхIура, циван авхIура тIий цIухлай, ссихI дуккан ан къавхьунни.
Цаппара гьантрава ниттищал нанисса Алик, канива кагу хъит дурну, гъан хьуну мукьилчин классраву дуклакисса оьрчIачIан, хъазамраха увгьуну кIункIу- хъитгу уллай: «Да пулан, ачу тти рища ттуйх, тталлуцIун авхIуни къаришлай», – тIий ур.
ЧIаххуоьрчIалъя яла жухь бувсъсса, тIуркIулий буклай буну, пароль буси тIий, оьрчIал, къабусайхьувкун тталлуцIун авхIуну ивкIсса. «Цибан къабувсъссия бабал, инава аттайссарахха жу чIарав бакъаний увкукун»: «КьюлтIмур буслан къабучIиссар. Къааттайссара! Артурдул (цаяра мукьра-ххюра шинал хъунасса чIаххуоьрчI) ттухь тIива цукунчIав щиячIав нигьа маусаванна. Нигьаусарча, ялун бачайссар, гьужум барча цивппа лихъайссар». Укун кьянкьасса ия чIивинува. Дусталгу цаярва оьрмулул хъунисса бикIайва. Чув-ухьурчагу бусравнугу икIайва, хиянатшиву дакъасса ушивруцIун.
Чан бакъая жухь циван гьан битарду оьрчIру Украиннайн тIими. Цукунъя къабитантIисса, аьраличунал пиша цала язи бувгьуну буни.
Хъунама арс армиялий унува контракт чирчуну, тихва авцIуну, чIивиманалгу мукунна армиялияра контракт чичайхту, жул уссил увкуна: «Явара, кIулну бикIияра, контракт чирчусса ссятрая шинмай зу ттул бакъару, зу паччахIлугърал измулийсса инсанталлу», – куну. Аьраличу анжагъ ччатI лякъинсса даву дакъашиву, му билаятрал цIаний жан дулун багьайсса къуллугъ бушиву кIулссия жул шамагу оьрчIан.
Украиннал аьрщарай хасъсса аьрали операция байбишайхту, малагару тихун, тIий леххаву тIисса жухь вай бия: «Контрактрай къуллугъ буллан нанийни жун кIулссия дакьаву дуни аьралитал бучIи къалякъайшиву, ми дяъвилул иширттаву аьркин багьайшиву. Ватандалул ххуллий жан дулун хъагу буллуну, талан багьни лихълахъаву, му чув-адаминан лайкьсса тIул дакъар. Аскишиврий цIа дуккаяр чувшиврий жан дулунну», – тIий.
«Яр, ниттирссий, инания лакку мазрал минахур бура. «Чугу, чувгу Аллагьнал дунияллийн ляхъан бувсса дяъвилул майданнив жан дулуншиврулли, тIисса учала вин тачIав къабавссарив», – учайва Аликлул, тих хъанахъисса иширттая баллай, лихъияра, нанияра шаппай тIисса чIумал.
Алик аьраличу ия оьтту-ттурчIаву, хасиятраву, багьу-бизулуву.
ЩиячIав кьюлтIсса зат бакъар, ца ппурттуву, аьралуннаву къуллугъ буллан къабуциншиврул арцурду дуллай бивкIсса. Муни Аликлул, чIаважагьилнал учайва: «Ттул ниттиуссил дуссарагу аьсившиву чаннал мушакъатсса уну, аьралуннаву къуллугъ буллан къауцавриясса дикIайва. Цукун бюхъайссар чувнаща аьралуннаву къуллугъ баврия махъаллил хьун?» – куну.
2012-2013-ку шиннардий, Дагъусттанная так ларайсса кIулшиву думи бакъасса жагьилтал аьралуннаву къуллугъ буллан къабуцлацисса чIумал, Алик буттауссичIан Калугалийн лавгуна. Тичча увцуна аьралуннаву къуллугъ буллангу. Воронежрай лахъи къалавгун, тIайла увккун ия Наро-Фоминскалийн элитный аьралуннавун. Пахрулий икIайва билаятрай язи бувгьуми жагьилтуравух цувагу къуллугъ буллай ушиврия.
Аьрали бурж лавхъун зана шайхту, тава «УграКерам» заводрай зий манзил къалавгун, аьраличунал рухI-ссихI дусса Аликлул чирчуна контракт цIанихсса Владикавказуллал пехоталуву къуллугъ буллан.
Ччяни итталун агьну ия аьрали частьрал хъуниминнал, бусрав хьуну ия аьрали гьалмахтуран, кьамул хьуну ия дакI хансса аьсатIиннал агьулданун.
Аьрали эксперт, запасрайсса хIаписар Олег Марзоевлул цала Телеграм-каналданий чивчуну бия Алик цала икIайкунсса аьрали профессионал ивкIшиву, ттуршуннал багьасса талатала ивкIшиву.
Ттуршуннал багьасса уссия арсгу — ттуршра ниттил арсну ацIансса. Жул, Аликлул ниттил шанма ссил, цаннилвагу бакъассия оьрчI. Амма му иширая аьсив къабувкссару жу цавагу: Алик ия жул махъсса цIакьва-цIакьсса къала.
«Алик жун гьарца ишираву эбратъя! Ванал жан дуллусса кIанттава жулва бакIру ххассал буллалаву, зунтталчунан яхIлин кьамулсса зат бакъар. ТалантIиссару аьзизсса уссихлу кьисас ласунцIа», – тIий бур, кулпатрава ца бат шаву гьассарча, нанияра шаппай, ххассалхьияра тIий, леххаврийсса жухь уссилми арсру Исмяил ва Тахакьа.
Душнил арснал бивкIулул дард духIан къархьуну, цавагу гьантта цIуцIи шаний къабувну, цилла ччаннай цурда ларгунни Аликлул хъирив жул нину, захIматрал ва захIматшивурттал сасан бувсса, кьянкьава-кьянкьасса зунттал хъамитайпа Заварият.
Къаликканнав щийнчIав жул кулпатрал ялун ливкмур! Зана хьуннав жула жагьилтал цIуллуну-сагъну! Журив хIарачат банну яхIлий лахъан жула бакIрачIан дуркIсса кьини!
