Жижара

Жавраиллул душ ЦIаххаева Написат

Жуятува батIул хьунни чIярусса шиннардий Каспийскаллал 2-мур школалий цал учительну, яла зувирахъул шиннардий завучну зий бивкIсса ЦIаххаева Написат Жавраиллул душ.
Написат бувну бур 1938-ку шинал февраль зурул 26-нний Хъювхъиялшяраву. Школа къуртал бувну махъ Написат дуклан бувххун бур МахIачкъалалив Пединститутравун. Му къуртал бувну махъ зий бивкIун бур хьхьичI Ккуллал, яла Къяннал школарттай оьрус мазрал ва литературалул дарс дихьлай. Щар хьуну махъ зий бивкIун бур Каспийскаллал 2-мур школалий. Мунил щалва оьрму хас бувну бия ялун нанисса ник тарбия даврин ва кIулшиву дулаврин.

Хъинну цила даврил гьунар бусса, даву ххирану, дакI марцIну захIмат буллалисса, лагма-ялттунал чIарав бацIан хIадурсса инсан бия Написат. Цув лайкь хьуну бур хIукуматрал бахшиширттан, барчаллагьрал чагъардан.

Написат Жабраиловна тачIав дакIния къабуккантIиссар даврил уртакьтуран, ванил дарс дирхьуминнан, миннал нитти-буттан.
Хъуннасса кьурчIишиву кIидачIлай буру ванил душвавращал Снежанащал, Гульнаращал.
Написатлул аьпа баннав! Алжаннул ххари баннав! Махъминнал оьрмурду лахъи баннав!

Каспийскаллал
2-мур школалул коллектив


Жул муси кунасса уссай

Къяниятусса Аьвдуллагьлул арс Шихамиров Исмяил ххуйну кIулссия жула инсантуран, лакрал щархъава шагьрулийн маршруткалий пассажиртал ххилаххисса адав-инсан дусса щупирну.
Ва икIайва хъинну хIал бавкьусса, пассажиртуран ххирасса. Ци бави, ккуру ларгунни щаллусса шин ина жул дянива лавгун. Вил пиш-пиш тIийннасса симангу, аьчухсса дакIгу жул дакIурдива тIакIуй къагьантIиссар.

ЧIунгу чIарах дурккунни, аьрщигу ларунни, зунттал мугьалтту кунна, аьратталнура дур мачча-гъаннал дакIру, жул муси кунасса, аьзизсса уссай.
Чув луглай занаву утти жу вих. Акъассарав ина, мурад бартбигьуй, цинявннан бусрав­сса ххуй дакIнил заллуй.
Вин хъунасса Заннал алжан булуннав тIий, дуаьлий буру ссурвал Аммия, Умажат,
уссурвал АхIмад, Шихамир, Шипауттин, Зайнуллагь


Хъуннасса кьурчIишивугу кIидачIлай, дакIнийхтунусса жижара буллай буру жула даврил уртакь Зулайхат Тахакьаевахь, ванил аьзизсса нину
Заварият
жуятува батIул шаврийн бувну.
Цил гьав нурданул дуцIиннав, бунагьирттал аьпа баннав, махънал оьрмурдай барачат бишиннав!
«Илчи» кказитрал коллектив


Хъуннасса кьурчIишиву кIидачIлай, дакIнийхтунусса жижара буллай буру Зулайхат Тахакьаевахь, ванил аьзизсса нину
Заварият
жуятува батIул шаврийн бувну.
Завариятлул рухI хъинний дишиннав, алжаннул ххари баннав, махъ ливчIминнал оьрмурду лахъи баннав!
Лакрал театрданул коллектив


ДакIнийхтуну жижара буллай буру Зулайхат Тахакьаевахь, ванил аьзизсса нину
Заварият
аьпалухьхьун лагаврийн бувну. КъадурхIухьунссар цIакьсса зунттал хъамитайпалул къюкIлил душнил арснан Украиннал аьрщарай нясив хьусса бивкIулул кьурчIисса къюву. Аллагьнал арх баннав гьарцагу ниттихъаяту укунсса бала.
Зулайхат, зухьхьунна цIуллушиву дулуннав, вания гихунмай ххарисса бакъа хавар къабаяннав. Нинугу имандалий ларгун лякъиннав, алжаннул ххари даннав.
 «Дараччи» хъаннил фондрал цинявгу вакилтурал цIанияту Гульшан Хасаева


Хъинну бювххунни

Хъинну къащи хьунни, бювххунни, 1-мур ЦIувкIратусса аьлимчу, экономист, профессор, РАНХИГС-раву кьатIаллил билаятирттал студентътуращал зий ивкIсса, ттущала школалий ца классраву дуклай ивкIсса МахIаммадлул арс Сайпуллаев Бадруттин дунияллия лавгсса хавар баяйхту.

Бадруттин Сайпуллаев уссия цала жямат ххирасса, дакI хъун дакъасса, ххаллилсса зунтталчу. ЧIярусса шиннардий къаккавккун, махъ шяравун увкIсса ппурттуву ттуна къаувчIунугу, мунан нава бувчIунав, гъан хьуну дакIнийхтунусса, уссушиврийсса ихтилат бувна.

Бадруттин дунияллия лагаврил хъуннасса кьурчIишиву кIидачIлай, жижара буллай бура мунал мачча-гъаннахь, душваврахь, щалагу 1-мур ЦIувкIуллал жяматрахь.
Имандалий лавгун лякъиннав, алжаннул ххари аннав, гьав нурданун лахъаннав, махъминнал оьрмурдай барачат бишиннав!

Муслимова Нурижат


Буттаясса аьпалул махъ

Уттигъанну оьрмулул 93 шинаву аьпалухьхьун лавгунни жул тухумдалул ттарцI, цинявннан эбратну ивкIсса ппу ва жул оьрчIан хъинну ххирасса ттатта, МахIаммадов Ризван Ибрагьимхалиллул арс.

Увссар Ризван ЧIяйннал шяраву 1929-ку шинал.
Буттаясса аьпалул мукъувугу кIицI лаган ччай бур ванал бувтшиву къабигьасса захIматрал ххуллу. Кулпатраву хъуна-хъу­нама ухьукун, хъунмур хъаргу, вихшалагу ванацIунсса диркIун дур. Хъун дяъви нанисса шиннардий дуклай ивкIссар Каспийскалийсса Ремесленный училищалуву. Дуккаву къуртал хьу­сса шинал увххун, ряхцIаллийсса шинну дурссар буттал «Дагдизель» заводрай зий.

Ванал къушлий хъуни хьу­ссар мукьва оьрчI. Ххуйсса тарбиягу дуллуну, цащава шаймургу бувну, нитти-буттал хъунмасса захIмат бивхьуну бия жуяту бавкьусса ва хъунмасса кулпат буван. Жунгу, жул оьрчIангу эбратну оьрму бувтсса, 60 шинай цаннащал ца бавкьусса нину-ппу бикIайва.

Жяматрангу, уссур-ссу­ннангу, чIахху-чIарахнангу ппу кIулссия захIмат ххира­сса, дакIнил хъинсса ва тя­хъасса инсанну. Заводрай зузи­ссаксса хIаллай ва лайкь хьуссар хIукуматрал чулухасса чIярусса наградарттан ва барчаллагьрал чагъардан ва ЗахIматрал ветерангуя.
Жул дакIурдиву буттал аьпа мудангу личIантIиссар, ванал бивхьусса захIмат жул оьрчIалгу буруччинтIиссар.
ОьрчIру, оьрчIал оьрчIру, вайнная бивзсса наслу
ва цинявгу уссур-ссу


Жунгу бусравссия ХIамид

Июньдалул 21-нний хар-хавар бакъа дунияллия лавгунни ГьунчIукьатIрал шяраватусса Дандамахъал ХIамид Манаплул арс.
ХIамид аьпалухьхьун лагаву бювххунни жул Вихьуллал жяматрангу – ва жул бусравсса куявъя. Бусравсса ва кьадрулийсса ия ва цала жяматрал дянивгу, Лакрал райондалийгу. Дурагу ххюцIаллий цара шинаву, ххаллилсса кулпатгу щащарну кьабивтун, кIия арс ва ца душгу цаятува махIрум бувну, личIи хьунни жуятува ХIамид. Ванал чIавама арс ивкIссар Украиннай, гай яла кIирисса даъвилул гьантрай хIатталлийн учIансса бувккунни ванангу, цува учIаврия ххарисса пишгу буттал симандалий ххал къавхьунува ливчIунни арс. Туну, ци банссар, вин ххуймур му дунияллий Заннал чивчуну лякъиннав.

Вихьуллал жямат