Сабина Саэдоващал хьунабавкьунни Зарема Буттаева
ЦIа дурксса балайчи, жулва лакку душ Сабина Саэдова (Сабина Корс тIисса псевдонимралу сахIналийн буклакисса) гьуртту хьунни июльданул 16-нний Дарбантлив «Светомузыкальный фонтанный комплекс» тIитIлатIисса шадлугърай. Шиккува кIицI лаган, ва Аьрасатнаву яла хъунмамур комплексну хъанахъиссар. Дазул кьатIув ялапар хъанахъисса балайчинащал, ва тихунмай бачиннин, хьунабавкьуна республикалул культуралул министр Зарема Буттаева.
Сабинал цIа къабавсса нажагьсса бакъа бакъахьунссар, вания жулва кказитрайгу цимилгу чивчуссар, дуссия ванищалсса хъуннасса интервьюгу. Ванил цIа къабавхьурчагума, ванил цилва чивчусса, цилва щаллу буллалисса, цIа дурксса ию ХIабиб НурмахIаммадов ринграйн цихун уккайсса «Дагъусттан» балай къабавссарив оьрмулул я хъуниминнаву, я мюрщиминнаву акъахьунссар.
Хьунабакьаврий министрнал кIицI лавгуна Сабинал гьунар ца жулла республикалий бакъассагу, дазул кьатIувгу тIалавну бушиву.
– «Дагъусттан» тIисса балай бучIир жулла республикалул цин лархьхьусса гимнрангума ккалли буван. Инава чивчусса балайлувасса «Я буду родиной гордиться» тIисса ххуттардийну учин, ватан вияту пахрулий дуссар, – куна Зарема Буттаевал.
Ваччиял шяравасса Сабина Саэдовал цикссагу шиннур США-наву ялапар хъанай. Ва бур Гьарун Саэдовлул уссил Бадавинал арснал арснал душ. Ванил ппу ивкIун ур Саэдовхъал тухумраясса, нину дур МахIачевхъал тухумраясса, кIивайвагу – Ваччатусса. «Дагъусттан» тIисса балай Сабинал чивчуну бур 2008 шинал Москавлив, РУДН-лул 1-мур курсирал студенткасса ппурттуву, билаятрал хъуншагьрулий хъанахъисса шадлугърай Дагъусттаннал чулуха гьуртту хьуншиврул.
Сабинал ппу Саэд ва нину Аьйшат ялапар хъанай бивкIссар Бакуй. Къарабахнаву дяъви сукку хьувкун, арс Аьвдуллагь (цIана дунияллийх цIа дурксса скрипачри) ва душ Сабинагу бувцуну, Москавлив бивзссар. Укун, Сабинал ва ванил уссил школарттугу, вузругу Москавлив бувккуну бур.
Зарема Буттаевал барчаллагь увкунни Сабинахь буттал улклухасса балайрдахлу. Ялун нанисса шинал Расул ХIамзатов увну 100 шин хъанахъишивугу кIицI лавгун, оьвкунни Сабинайнгу шаэрнал юбилейрацIун дархIуну хьунтIисса шадлугъирттайн.
Ахирданий министрнал Сабина Саэдован дуллунни Культуралул министерствалул чулухасса ХIурматрал грамота ва хахливун ларсъсса къайтагъуллал накьичрал сурат.
