Июль зурул 19-нний ДР-лул жагьилтурал иширтталсса буллалисса министр Камил Саэдов Ккуллал райондалул хъунама Шамил Рамазановлущал архIал райондалийсса цаппара школарттай капремонтрал даву цукун най дуссарив ххал дан ялтту увккунни. Ванал бувсунни Халид Мурачуевлул цIанийсса 1-мур школалий ремонтрал давуртту 70 процентрал дурну къуртал дуршиву, Т. АхIмадовлул цIанийсса Хъусращиял школалий тIурчарив – 90 процентрал.
– Ремонтрал давуртту школарттай сантирай ва лябуккулий най дия, чIалай бия райондалул хъунама, школарттал директортал ва ремонтраха зузисса подрядрал организация дакI цIуцIаврий даву дуллай бушиву. КIивагу школалий ккаккан дурсса чIумуяргума ччяни ремонт дурну къуртал дувансса бущилий зий бия, – увкунни министрнал.
Шиккува бусанну, Дагъусттаннал БакIчи Сергей Меликовлул август зурул 15-ннийнин школарттай ремонт дурну къуртал дувансса тIалавшинна дуршиву.
