Июньдалул 28-нний Дагъусттаннал Чичултрал союзрал къатраву хьунни жагьилсса чичултран хас бувсса форум. Форум сакин бувну бия кIира ятIапрая.

Форум тIитIлай, Дагъусттаннал Чичултрал союзрал хъунама МахIаммад АхIмадовлул чIа увкунни жагьилсса чичултран илкинсса ххуллу ва тIайлабацIу.
– Гьарцагу миллатрал буссар цанна хасъсса поэзия, цирив ца ляличIишиву дусса, зул буржри зула ниттил мазурдий му ляличIишиву ядаву ва хъирив нанисса никирангу чIалачIи даву, – увкунни МахIаммад АхIмадовлул.
Дагъусттаннал Чичултрал союзрал хъунаманал хъиривчу, шаэр, таржумачи Марина АхIмадовал бувсунни ялун нанисса чичултрансса хIаллихшиннардая: Президентнал программарттая, конкурсирдая, Дагъусттаннал БакIчинал чулухасса стипендиялия ва мукунна цаймигу.
Махъру лавхъунни мукунма Аьрасатнал Чичултрал союзрал вакилтурал, Дагъусттаннал чичултрал союзрал секциярттал каялувчитурал, вичIи дирхьунни жагьилсса чичултрал мурадирттах.
Форумрал 2-мур ятIап хьунни Поэзиялул къатраву. БавтIцириннал тIутIив дирхьунни Александр Пушкиннул ва Расул ХIамзатовлул гьайкаллачIа. Хъирив жагьилсса чичултрал дурккунни цала чирчусса назмурду.
Жагьилсса чичултрал форум гьашину 3-мур бур. Ванил агьаммур мурадгу жула миллатирттал мазру ябаву ва ялун нанисса чичултрал чIарав бацIаву хъанай дур.

Ася ХIусайнова, журналистикалул
3-мур курсрал студентка