«КIулшивурттал ччинийн ххуллу ласунтIиссар»

Къимизу-Зунттуй дустуращал

Дагъусттаннал Дуккаврил ва методикалул управлениялул педуниверситетрал хъунама, педагогикалул элмурдал кандидат, профессор, АьбдуллатIиплул арс Ширвани Бакмаевлул цIа дуккаврил аралуву зузиминнан ххуйну кIулссар. Сайки 50 шин дурну дур ванал кIулшивуртту дулаврил ххуллий зий. Ттизаманнул школарттая, вузирдая, дуккаврил системалия хьунни жул ихтилатгу.


– Ширвани Аьбдулла­тIипович, байбихьулий кутIану вила оьрмулул, захIматрал ххуллия бувсун ччива.
– Увссара 1953-ку шинал Лахъирдал шяраву. Мяйва класс на кIий бувккуссар. Ттул ппу Хъунайннал колхозрай бухгалтерну, завферману зий икIайссия. Нину Халисат колхозрал давурттай зий диркIссар. Дяъви байбивхьусса чIумал бу­ттал шамагу уссу дяъвилийн лавгун ур, кIия зана къавхьуну ур. Шамилчинмагу мушакъат хьуну увкIссар. Муная оьрчI къабивзун бур. Мукьагу уссил наслуну на хьуну ура. Ца буттауссил цIа дирзун дур ттун, гаманалсса ттул арснахь дуссар.
1975-ку шинал на къуртал бувссар Дагъусттаннал университетрал математикалул факультет. 1990-ку шинал Санкт-Петербурглив бувккуссар Аьра­сатнал паччахIлугърал педагогикалул университетрал очнай­сса аспирантура. Университет къуртал бувну махъ тIайла ув­ккун, цаппара шиннардий зий уссияв Карашрал къутандалий­сса дянивмур даражалул школалий, мукьра шинай – директорну. 1981-ку шиная хIакьинусса кьинилийн ияннин зий ура Да­гъусттаннал паччахIлугърал педагогикалул университетраву, 15 шинай уссияв информатика дишаврил методикалул кафедралул каялувчину, 12 шинай – физикалул ва математикалул факультетрал деканну. ЦIанасса чIумал Дуккаврил ва методикалул управлениялул хъунаману ва ректорнал кумагчину ура.

– Математикалул учитель хьунсса пикри цукун багьуна?
– ТIайламур бусан, ттун учительну зунсса пикри бакъассия. На уссияв кIива курс буккайхту строительнайлувун перевод ласунна тIий. Таний университетраву буссия строительный факультетгу. Яла му личIи бувна. Физикалул ва математикалул факультет язи бувгьу­ссия, ттунна вай дарсру ххира­сса дуну, вайннул бюхъу бусса уну. Жул щала тухум математикалул бюхъу буссаннун ккаллину буссар шяраваллил агьулданул дянив.
Школалий зун ивкIун махъ ттун учительнал пиша ххуй бивзуна.

ш. Лахъир

– ЧIярусса шиннардий му сфералий зузи­сса аьлимчу хIисаврай, ци учинна совет заманнул ва цIанасса кIулшивуртту дулаврил системардая, луттирдая арх бувцун, технологиярттайн бучIав­рия?
– Совет заманалул чIумал дуклакимигу, зузимигу жаваблувшинна дусса бия. Дуккаврил сий хъуннасса дия, учительнал кьимат бия. Учительтал хьун ччи­ссагу чIявусса бия. Жунна кIулсса 90-ку шиннардий вай гьарзат даххана хьуна. Учительтал итабакьайсса вузру ккалли-санну бакъая, цивппа учительталгу итталу ба­къая. Утти цIунилгу кIулшивуртту дулаврил дунияллий тагьар ххуй хъанай дур. Жул институтравун бухлахимигу ялу-ялун чIяву хъанай бур. Шиккува кIицI лаган, цIусса ректор ивтния шийннай (ва ивтун шин шавай дур) жучIа чIалансса дахханашивуртту хьунни. Хъунмасса тIайлабацIу хьунни ва къуллугърай жула дянивасса, дуккаврил масъалар­тту кIулсса инсан итаву. Нариман Асварович тарихрал факультетрал деканну уссия ва къуллугърай ацIаннин.

ЦIанасса заманнай технологияртту ишлану душиву – му хьхьичIунмай хъит учавур. Ду­ккаврин, кIулшивуртту ласун технологиярттая мюнпат хъунмассар. Жул физикалул ва математикалул факультетрай цIана хьхьичIва-хьхьичI тIивтIуссар хъуннасса каши дусса ххаллил­сса технопарк. Дагъусттаннай цамур укунсса бакъассар. Ши­кку буссар ххюва лаборатория. Компьютердал техникалул, физикалул, химиялул, генетикалул кIулшивуртту ласун шиккун букIлантIиссар цинявппагу вузирдал студентътал, 600-ннийн бивсса дуклаки оьрчIру. Ши­кку жуща лавайну хIадур буллан хьунтIиссар учительтал.

– Ттун дакIнийссаксса, математикалул факультетрайн буххан ччисса хьхьичIва чIявусса къа­бикIайва, ци тагьар дур цIана?
– Ва захIматсса факультетран ккаллиссар. Шикку дуклан гьарнаща къашайссар. Мунияту щалагу республикалий 200-нния ливчусса физикалул, математикалул учительтал биялну ба­къар. Директортурал тавакъю буллай, жу 4-мур, 5-мур курсирдал студентътал гьан буллан бикIару школарттайн.

– Шяраваллал школарттан зуя ци кумаг бу­ссар?
– Гьарца кафедралул дуссар школарттащалсса дахIаву, икьраллу. Миннал тIалавшиндарайн бувну жу методикалул чулухасса кумаг байссар. КIантту-кIанттурдайн лавгун, буккай­ссар лекцияртту. КIулшивурттал даража гьаз бан учительтал, ДИРО-лувун кунма, жучIангу бучIайссар. На навагу ДИРО-лул Ученый советрал член хъанахъиссара. Жун кIулссар учительтал цукунсса захIматшивурттащал хьунабакьлай буссарив, миннан ци кумаг аьркинссарив.

– Ци учинна хIакьи­нусса учительтурал кIул­шивурттал даражалия?
– Бур цIанасса учительтураву давриву дакI дирхьуну зузи­сса, гьунар буссагу, бур хьхьара­ссагу, хаснува заочнайну дурккуминнаву. ЧиваркI школарттая лихълай бур. Базардаву, строительствалул давурттай хьунабакьай, учительнал харжирацIух яхьун захIматну бия тIий. Щар хьусса, оьрчIру бусса хъаннингу цайми къайгъурду ххи хъанай бур, цала кIулшивурттал ялув бацIан бюхълай бакъар. КIулшивуртту дусса, цала даража гьаз бавриха зузиссагу чансса бакъар. Хаснува ми чIяву хьунни ЕГЭ-ду дурккун махъ. Ххуйсса учительтал тIалавну бур. Миннаща, репетиторшиву дуллай, оьрчIру ЕГЭ-дайн хIадур буллай, ххишаласса кIапIикI ля­къин бюхълай бур.
– Республикалул цуми школартту кIицI лагавияв хьхьичIунминнувух?
– Шагьрулул школарттаву кIицI лагавияв МахIачкъалаллал 39-мур лицей, физикалух ххишаласса къулагъас дусса 46-мур школа. Ххуйсса кIулшивуртту дусса оьрчIру бикIай Дарбантуллал школарттая. Шиккува бусан, жул факультетрал мяйра шинни Дарбанлив «Пифагор» тIисса математикалул республикалул тIиртIу олимпиада дуллай. Цалчинсса шинал МахIачкъалаллал, Каспийскаллал, Дарбантуллал школартту бакъа гьуртту къавхьуссия. Утти 30 райондалия­сса 1500-ннийн бивсса оьрчIру бучIайссар жул олимпиадалийн. Микку чIалан бикIай учительтурал ва оьрчIал даража. Утти районнаясса оьрчIругу шай олимпиадарттал призертал. КIицI лагавияв Гумбетуллал, Къаякантуллал, Казбековуллал, Дарбантуллал районну.

– Ширвани Аьб­дулла­тIипович, бурив вила оьрчIаву вила ххуллийх лавгсса?
– Ттул кIия арс ур. Хъунама Арсен Педуниверситетрал физикалул ва математикалул факультетрал деканни. ЧIивима Абут1алиб ДГУ-луву зий уссар информациялул технологияр­ттал кафедралул доцентну. КIиягу педагогикалул элмурдал кандидатъталли.
– Буттал шяраваллищалсса дахIаву цукун­сса дур, ияйссарав Ла­ккуйнай?
– Гьай- гьай. Лахъирив ттул циняв шартIру дусса ххуйсса къатри дуссар. Ччя-ччяни лагайссара кIийнай, бихху бан – чара бакъа.
– Буси вила оьрмулуву дакIний ливчIсса, асар хьусса ци-бунугу иширая.

– Аспирантуралуву дуклакисса чIумал ттула элмийсса каялувчи Татьяна Федорова Фириченкол ниттищал (ва Ленинградуллал блокадалуву бивкIсса инсан бия) на лавгссияв Пискаревский хIатталлийн. Ттун хъинну дакIний ливчIуна га аьрххи. Дия 100 метралул лахъишиврийсса, блокадалуву бивкIми бувччусса, уссушиврийсса хIатталу. Та ­оьсса кьини дурксса инсантал бия къалп къавхьусса, ляличIинува аьчухсса. На цамур дуниял ккарксса куна зана хьу­ссияв та аьр­ххилия.
– Ци учинна кIул­ши­вуртту дулаврил ххуллий зузиминнахь, студентътурахь?
Ттун учин ччива: дакIний битияра кIулшивур­ттачIан дир­сса цичIар дакъашиву, кIул­шивур­ттал ччинийн ххуллу ласайшиву.
Нюжмаркьини мизитравун лавгун дарсру кьариртсса студентътуран Кьурандалийсса аят­ру ккаккан дуллай, на икIара: ина хIакьину шикку лахьхьаймур къалавхьхьуну личIарча, вища му яла оьрчIан лахьхьин бан къахьунтIиссар, мурив вий­сса бунагьри тIий.
Ци чулийгу, цIанасса жагьилтал къалахьлахьисса бур учин къахьунссар. Итххявхсса, зат бигьану лаласайсса студентътал чансса бакъар. Жула жагьилтал бажар бусса бур. КIулшивуртту думи тIалавну бур, миннан давурттай бацIан бигьану бур. ЧIун оьнна гьан мадитару. Лахьлахьияра, кIулмур зун та бухьурчагу, чув бухьурчагу бучIи лякъинтIиссар.

Ихтилат бувссар

Андриана Аьбдуллаевал