АГьашинугу апрель зурул 28-нний, МахIачкъалаллал зума-къирагърай цIуну буллалисса Ися Идавсил (аьлайгьи ссалам) цIанийсса РувхIанийсса центрданийн бавтIун бия лакрал агьали.
Ва хъанай дия цIуну буллалисса мизитраву лакрал агьалинал кIилчинсса хъун ифтар. Ваниха зузиминнал биялсса захIматгу бивхьуну бия лайкьсса даражалийсса даву дуван.
Мажлис усттарну бачин бувну бия ННТ телеканалданул директор Султан Трамов ва Азим Давыдов. Дагъусттаннай дин цIакьгу, хьхьичIуннайгу шавриву лакрал аьлимтурал-динчитурал, щайхтурал хъунмасса бутIа бивхьушиврия, рувхIанийсса ирс-ххазина буруччин, исламрал ххуллу-ххуттай цIакьну бацIан, Лакку кIанугу, лакку мазгу ябуван аьркиншиврия, хъунмур никирал агьулданул жагьилтуран мяърипат лахьхьин давриву хъунмасса бияла бушиврия бия ихтилатру.
Агьали барча буллалисса махъру лавхъуна Лакрал райондалул бакIчи Юсуп МахIаммадовлул, Муфтиятрал председатель МухIаммад Майрановлул, муфтинал кумагчи МухIаммадрасул Сааьдуевлул, ЦIуссалакрал райондалул Имамтурал советрал председатель Мансур Хаваевлул, Лакрал Райондалул Имамтурал советрал хъунама МухIаммад Ссаламовлул, Сайпуллагь-Кьади Башларовлул цIанийсса мизитрал имам МухIаммадрасул МахIадовлул ва цаймигу бусравсса динчитурал-аьлимтурал, миллатрал вакилтурал.
Индира Аюбова, МахIачкъала шагьрулул Жагьилтурал центрданул директорнал хъиривчу:
– На гъирарал хъаттирдай бувкIра ва мажлисрай гьуртту хьун. Цанчирча, жула миллат аьмну батIлатIисса иширавух шавкьирай хIала буххан ччан бивкIун тIий. Уттигъанну лакку душваврал ифтарданийгу гьуртту хьуссияв, «Сальва» ресторандалуву дурсса. Тания мукьах гьантри лавгнугу, дакI хIакьинугу чаннасса, тIааьнсса асардал дурцIуну дур. Укунсса мажлисирттал инсантурал дакIру гъан дуллалиссар, миллат цачIун буллалиссар. Ххари хьунна чIявусса мюрщи оьрчIру чIалайгу. ОьрчIансса бялахъансса майдангу хIадур бувну бур ва давриха зузиминнал. БавтIцириннал дакIру тирх учин дувансса программа дия, кIуну бувккун, тIайлабацIу хьума бахшишращал шавай лавгунни. Ва миллат цашиврул ва цачIуншиврул мажлисри, буниялттунгу.
Уммукусум-хIажи Паркьуева:
– Ца тирхханну дур дакIний, цIунилгу махлукьатрая лакку мазрайсса ихтилатру баллалийни. МахIаттал хьура дурсса даврил масштабрал бюхттулшиврий, гьарта-гьарзашиврий. Бивхьуцири захIмат. Хаснува жагьилтал – волонтертал булувкьуну зий бур. Шиннардий къаккаккайсса гъанми, кIулми, дусми инсантуращал хьунабакьлай, хъямала багьлай, ххаришиву кIидачIлай бур. Иттав макь дукIлай дур, пахру багьлай бур. Лак кувннах кув мякь бувккун бушиву тасттикь хъанай бур. Цал ттигу барчаллагь ва даву укун бюхттулсса даражалий сакин дурсса инсантурайн. Зул захIмат Заннан кьамулну лякъиннав. Ва ифтарданул барачат щалвагу миллатрайн бияннав! Ва Центргу, бувну къуртал буван буванугу, агьали цачIунмай бувайсса барачатсса кюру хьунува бур, жулва наслур ва мизитравун чаклийн занантIиссагу. РувхIанийсса ххуттай цIакьну бацIарча, жулва наслулуцIун Аллагьналгу кабакьинтIиссар, барачатгу биянтIиссар. ЯлунчIилгу мажлисру буллансса цIуллушиву дулуннав цинявннахьхьун!
