Апрельданул 30-нний Каспийскаллал хъунмур майданнив шадлугърай тIивтIунни республикалул акция «Ххувшаврил Ттугъ». Муний гьуртту хьунни Дагъусттаннал БакIчи Сергей Меликов, Хъун дяъвилул ветерантал, кадетътал, аьралитал,ТОКС-рал следопытътал, мукунма республикалул властьрал органнал вакилтал, жяматирттал, жагьилтурал ва студентътурал сакиншиннардал вакилтал. Республикалул каялувчинал цинявннахь барча дунни ялун нанисса Бюхттулсса Ххувшаврил байран: «Ва хIакьсса халкьуннал байранни, шадлугърал ва пахрулул, хажалатрал, муницIунна хъинну гъилисса. Ва байран ххирассар республикалийгу, щала билаятрайгу, гьарца кулпатран, мунияту миннал вай гьантрай цIа хъун дуллантIиссар Хъун дяъвилий гьуртту хьу­сса цалва мачча-гъанссаннал, дакIнийн бичинтIиссар Ватандалухлу жанну дуллуми, ятIа-тIар бакъа бат хьуми, байрандалул урцIух щябикIан кьисмат къавхьуми. Амма ми циняв абадул абадлий жущалвар бусса.
Жула халкьуннал Ххувшаврихлу дуллуссар гьарзат. Жунма дакIнийссар аьралитурал гьунардаяр ххишалагу. Бюх­ттул хьуннав зул цIарду, дяъвилул къинттуллух захIмат буллай бивкIми, ччатI ххя­ххан буллай бивкIми, ккулла-янсав буллай бивкIми, щавурду дирми ччаннай бацIан буллай бивкIми, захIматшивуртту духIлай, Ххувшаврийн вихну, ялугьлай бивкIми, – кунни Сергей Меликовлул.
Региондалул каялувчинал дакIнийн бувтунни жула Ватандалул цайми миллатирттащал архIал талай бивкIшиву 180 азаруннаха ливчусса дагъусттанлувталгу. 1945-ку шинал апрельданул 30-нний канийн бувкIсса Берлиннал Рейхстаграй жулва ттугъру бивщуну бивкIшиву. Гьаман муниятур ва кьини байбивхьусса «Ххувшаврил Ттугъ» тIисса акция.
Мероприятиялул хъунмур ишну хьунни шадлугърай Ттугъ гьаз баву. Му гьаз бунни Аьра­сатнал Виричу, «Аьра­сатнал хIаписартал» тIисса Аьра­сатнал аьмсса сакиншиндарал региондалул отделениялул председатель ДибирхIажи МахIаммадовлул, Украиннай сса хасъсса дяъвилул операциялул гьурттучи хъунама сержант Марат Халикьовлул, Авгъаннал дяъвилул иширттал гьурттучи, ва Авгъаннал дяъвилул ишир­ттал инвалидтурал ветерантурал организациярттал Координациялул советрал Дагъусттаннал отделениялул председатель МахIаммад Аьриповлул. Минналва лавхъунни махъругу.
Яла ккаккан дунни байрандалун хасъсса концерт.
«Ххувшаврил Ттугъ» тIисса республикалул акциялул сиптачи хъанахъиссар Сергей Меликов. Акция лахъи лагантIиссар майрал 10-ннийнин циняв шагьрурдай ва районнай.