Май зурул 24-нний Москавлив «Октябрь» киноцентрданий хьунни « Аманат» киносуратрал премьера.
Цалчинми тамашачитуравух бия Дагъусттаннал БакIчи Сергей Меликов, Аьрасатнал Президентнал Администрациялул хъунаманал хъиривчу МахIаммадссалам МахIаммадов, Миллатирттал иширтталсса буллалисса федерал агентствалул хъунама Игорь Баринов, ПаччахIлугърал Думалул депутат Султан Хамзаев, Дагъусттаннал культуралул министр Зарема Буттаева, «Дом Народов России» ФГБУ-лул директор Анна Полежаева ва машгьурсса цаймигу политиктал ва актёртал. Дагъусттаннал хъунаманал актертурахь барчаллагь увкунни дюрхъуну дурсса даврихлу, бувсунни киносурат щаллагу дунияллий машгьур хъанай душиву, Азирбижаннаву тIайлабацIу буну ккаккан дуршиву.
– Ва картиналул гьанумур мяъна-мурад, дяъви, талатавуртту ккаккан буваву бакъарча, ватандалухсса ччаву ва иш багьний ватандалул цIаний талан хIадурну бушиву ккаккан бувавур, – увкунни Сергей Меликовлул. Ванал наградартту дуллунни хьхьичIунсса актертуран. Сценарист ва генеральный продюсер, ЧIурттащиял шяравасса язисса арснан Шамил Жаппаровлун дуллунни «Дагъусттаннал магьирлугърал лайкь хьусса ишккакку» тIисса цIа. Вара цIа дуллунни режиссер-постановщик Антон Сиверслунгу. Аьрасатнал лайкь хьусса артистка Екатерина Гусеван дуллунни АхIмад-Хан Султаннул цIанийсса медаль «За вклад в патриотическое воспитание молодёжи».
Дагъусттаннал лайкь хьусса артистътурал цIарду дуллунни Аьрасатнал халкьуннал артист Андрей Соколовлун, Аьрасатнал лайкь хьусса артист Фархад МахIмудовлун ва актертуран Арслан Мурзабековлун, Даниил Страховлун ва Амин Хуратовлун. Киносуратрал хIакъираву Игорь Бариновлул укун увкунни : – Киносуратрал идея ххуй бивзуна Аьрасатнал Президент Владимир Путиннунгу. УрчIра шинавусса яруоьрчI, дагъусттанчунал, зунтталчунал хасиятругу ядурну, ххаллилсса оьрус хIаписар хъанай ур. Ва цала гъан-маччами мукIру буллай ур Ккавкказуллал бучIантIимур АьрасатнацIун бавхIусса бикIан аьркиншиву, Ккавкказуллал ва Аьрасатнал миллатру бавкьуну, уссурвалну яхъанан аьркиншиврий.
МахIаммадссалам МахIаммадовлулгу, киносуратран кьимат бишлай, кIицI лавгунни ва киносурат Аьрасатнал Президентнал культуралул ирс-ххазиналул шинну баян бувсса ппурттуву дунияллийн дуккавривугу ца мяъна душиву, ванил чIалачIи бувантIишиву халкьуннал дянивсса дусшиву цукун ххирану дарцIуссарив. МаслихIат бунни ва киносурат жагьилтурал ххал дуван, ванил лахьхьин буллай буну тIий инсантурал кувннал кувннащалсса арарду цукунсса дикIан аьркинссарив. Хъунмур героинял роль усттарну дургьусса актриса Екатерина Гусевал бувсунни ва тарихийсса киносуратрал бюджет хъунмасса бивкIшиву, миллатирттал лаххиярттан, гьарзатран чIярусса арцу харж дуван багьшиву ва ми цимур-цаннулсса буван бакIрайнласу бувшиву ххаллилсса продюсер Шамил Жаппаровлул.
