![](https://ilchi.info/wp-content/uploads/2022/05/IMG_2629-e1653680201141.jpg)
Итникьини Лакрал театрданул сахIналий хьунни испаннал драматург ва шаэр Федерико Гарсиа Лоркал 1933-ку шиналва чивчусса пьесалийнусса «Оьсса кьадар» тIисса спектакльданул премьера. Пьеса лакку мазрайн бувцуну бур ХIасан КIуруховлул.
![](https://ilchi.info/wp-content/uploads/2022/05/jhli_7-e1653558052344.jpg)
Спектакльданул премьера дебютну (цалчинсса давуну) хьунни ГИТИС къуртал бувсса жагьилсса режиссер Руслан Лариннул. Испаннал гьавасрацIун даркьуну куцциравун дагьну дия яргсса сиппатру МахIаммад Моллакаевлул ссигъасса сценографиялуву; Ширвани Чаллаевлул музыкалухун тIутIисса балайрдаву (хормейстер Мариян Муртазааьлиева); Вера Агошкинал ябацIансса костюмирттаву; Дагъусттаннал, Ингушнал ва Чачаннал республикарттал лайкь хьусса артист Арсен КьурбанмахIаммадовлул дирхьусса къавтIавурттаву.
Спектакльдануву гьурттуну бия личIи-личIисса оьрмулул актертал, режиссернал цала тIийкун, цува карав уцлай бивкIсса артистътуращал (Руслан Ларин Садикь МахIаммадовлул душнил арсри, цувагу, щала кулпат театрдануву зий бухьувкун, гьарца гастроллайнгу уцлай, театрдануву хъуна хьусса) цащала архIал сахIналийн буклай бивкIмигу. Агьамми роллу дургьуну бия Дагъусттаннал халкьуннал артисткахъул Луиза Шагьдилова, Саният Рамазанова, Дагъусттаннал лайкь хьусса артисткахъул Зинаида Чавтараева, Юлиана МахIаммадова, артистътал Ибрагьим Рабаданов, Адам ХIайдаев, Зульфия Архилаева.
![](https://ilchi.info/wp-content/uploads/2022/05/jhli_5.jpg)
ЗахIматсса бухьурчагу, бувчIлай бия тамашачитуран спектакль, испаннал ва ккавкказнал хасиятругу лархьхьусса, кьадардугу аьмсса бухьувкун, ххуйну кьамулгу бувна.
Ахирданий Дагъусттаннал халкьуннал артист Аслан МахIаммадовлул кIицI лавгуна премьера хас буллай бушиву пьеса усттарсса даражалий лакку мазрайн бувцусса шаэр ва журналист ХIасан КIуруховлул аьпалун. Барчаллагь увкуна спектакль ххал бан бувкIсса ганал гъан-маччаминнахь. Руслан Лариннул тIутIал кацI пишкаш бувуна шаэрнал кулпат Зинат КIурухован.
Спектакльданул кIилчинсса премьера буссар майрал 27-нний 18.30 ссятраву. ДикIантIиссар синхрон журалийсса таржума.
Билетру тIалав бан бюхъайссар ва номерданий: 8-928-875-60-10.