Владимир Путин хьунаавкьунни Сергей Меликовлущал

Владимир Путин хьунаавкьунни Сергей Меликовлущал

Апрельданул 6-нний Аьрасатнал Президент Владимир Путин хьунаавкьунни Дагъусттаннал БакIчи Сергей Меликовлущал. Ххал бивгьунни республикалул социал-экономикалул масъалартту.


В.Путин: Сергей Аьлимович, республикалий ци тагьар дур?

С.Меликов: Владимир Владимирович, республикалий тагьар цалий дарцIуну дур. КутIану бусанна коронавирусрал инфекциялуцIун дархIусса тагьардания. ДукIу жу бартдигьарду тамансса давуртту. Мунияту барчаллагь чин ччай бур вице-премьер Голиковал каялувшиврийсса Оператив штабрахьгу, Роспотребнадзорданухьгу, Минздраврахьгу, жун методикалийнусса маслихIатру баврихлу, миннуя хъунмасса кумаг хьунни.
ХIакьину жу бувкру махъун багьну бивкIсса ккаккиярттал тагьарданува, вакцинациялул чулухагу хьунни хъин чулийсса дахханашивуртту. Цаппара районнай вакцинациялул даража 90 процентраяргу лахъ хьуну бур. Жу биявай буру Аьрасатнал дянивсса ккаккиярттачIан. Микку хъунмасса кIану бугьлай бур информациялул дузалшиндаралулгу. Муниха зий бур циняв СМИ. Тамансса кабавкьунни му иширацIун Муфтиятралгу.

В.Путин: ДукIу зул промышленностьрал сурсатир­ттал лябукку Аьрасатнал дянивну дуккан дурмунияр ххишала­сса хьуну бур (16-нниха ливчусса процентирттал), билаятрай бия 3,1процент. Ссайнур ми хьусса ?

С. Меликов: Владимир Владимирович, ттул пикрилий, жу дурну дур тамансса давуртту, ми дуллай айивхьуну уссия Владимир Аьбдуаьлиевич. Та чIумалла чIярусса предприятияртту, миннувух промышленностьралссагу, дуккан дурну диркIссар «ххютула» чаннайн. Ми ккаккиярттаягу кумаг хьуссар лябукку хьун.

В. Путин: Шяраваллил хозяйствалувугу тамансса дахханашивуртту хьуну дурхха?

С.Меликов: Дагъусттаннай шяраваллил хозяйствалул каширду (потенциал) мудангу тамансса диркIун дур, хIакьину жу хIарачат буллай буру ми каширду цIу дуккан дан ва лябукку буну зузи дан.
Дахханашивуртту хъанай дур къюмайтIутIи бугьаврил давурттавугу, чахир даврил иширттавугу, уттигъанну кьамул дурсса норматив актирдайну. Ми актирдайн чул бивщуну, жу кумаг буллалиссару Дагъусттаннал чахир дувултраяр ххишала чIаххувсса регионнангу – жуща бюхълай бур къюмайтIутIи тIайла буккан Къиримнавунгу, Ставрополлал улклуйнгу, Краснодардал улклуйнгу.

В.Путин: Ттун кIулли зучIа захIматшивурттугу душиву, учиннуча, щинал дузал баву. Микку ци тагьар дур ?

С.Меликов: Щин диялну дакъар МахIачкъалалив, Каспийскалий, Избербашлив ва цаймигу шагьрурдай. Щин диялсса дакъашивруцIун бавхIуну бур цаймигу масъалартту – ишла дурсса щин зана-кьулу даву ва марцI даву.
Вил кабакьулийну ларгсса шинал жуща бювхъунни дуруччин ХIукуматрал жунна дагьан дурсса инфраструктуралул кредит.

В.Путин: Мунил лагру цуксса дур?

С.Меликов: 10,5 млрд къуруш. Жу цIана байбихьлай буру щин дуцин Чиркейллал водохранилищалия МахIачкъалалив ва Каспийскалийн. Яла дуцинну Избербашлив ва Дарбантливгу.

В.Путин: Яла захIматми масъаларттавасса ца хъанай бур Ккавкказнавугу, Дагъусттаннайгу зузи кIанттурду бакъашиву. МуницIун бавхIуну, вил пикрилий, цуми инвестициярттал проектирттах къулагъас дуван, кабакьин аьркинни, цIусса зузи кIанттурду дузал буваншиврул?

С.Меликов: Владимир Владимирович, 2021-ку шинал давуртту дакъа ливчIми жучIа шамлий чан хьуну бия. Амма ми чан шаву хъунисса инвестпроектирттацIун дархIусса дакъаяча, ми дархIуну дия личIи-личIисса предприятияртту «ххютула» дуккан дав­рицIун.Тамансса инсантурал ларсуна цалла проектру, программартту дайдишинсса арцу. Миннуятугу хьуна кумаг давурттай бацIан инсантал.

Давуртту дакъашиврул даража хIакьинугу лахъсса бур.
Жу хъунмасса умуд бихьлай буру Дарбант шагьру лябуккан баврил программалийну таман­сса зузи кIанттурду дузал хьуншиврийн.

Читайте также: