Республикалул Халкьуннал творчествалул къатлул ва Республикалул дуккаврил ва методикалул центрданул сакиншиндарайну, Дагъусттан Республикалул Музыкантътурал ва Композитортурал союзирттал гьурттушиндарайну, МахIачкъалалив хьунни халкьуннал инструментирттал ансамбльлал каялувчитурансса мастер-класс. Ваний гьуртту хьунни Дагъусттан Республикалул халкьуннал артист Новруз Шахбазовлул каялувшиндаралусса Халкьуннал инструментирттал ПаччахIлугърал оркестр.
Мастер-класс баврил агьамми мурадругу бия коллективирттал каялувчитурал ва музыкантътурал пишакаршиврул даража лавай баву, цайнува цивппа хьусса коллективирттал репертуар хьхьичIуннай ва авадан даву.
Мастер-классрал давривух гьуртту хьуна МахIачкъала, Избербаш шагьрурдаясса, республикалул районнаясса ансамбльлал каялувчитал. Мастер-класс цуппарив хьуна халкьуннал музыкалул «Зунттал макьанну» тIисса цIанилусса форум-фестивальданул лагрулий.
Мастер-класс тIитIлай, махъ лавхъуна Республикалул Халкьуннал творчествалул къатлул директор Марита МухIадовал.
Новруз Шахбазовлул бувсуна оркестрданулмур даврия.
– Оркестрданущалсса даву хьхьичIра-хьхьичI дайдишайссар партитуралия. Агана камерный ягу симфонический оркестрданунсса партитура машан ласун бюхъайхьурча, жулмур оркестрданунсса партитура зун чувчIав къалякъинтIиссар. Ва хъанахъиссар ляличIиссава коллектив, цивугу симфонический оркестрданул инструментру (флейта, кларнет, скрипка), мукунма оьруснал халкьуннал оркестрданул инструментру (балалайка) ва жулва музыкалул инструментру (къумуз, тар) цачIун хьусса. Ванийн бувну жучIа хъанахъиссар ляличIиссара симбиоз. Жул составрансса партитурардугу хъунмурчIин чичайссар дирижертурал, – бувсуна ванал.
Мастер-классрай оркестрданул щаллу бувна Наби Дагировлул, Мурад Къажлаевлул ва цаймигу композитортурал произведенияртту. Вайннул мисаллайну Новруз Шахбазовлул ккаккан дурна пишакарсса оркестрданул ва цайнува цивппа хьусса коллективирттал дянив цукунсса дахIаву дуссарив.
Мастер-классрай ялагу махъру лавхъуна Республикалул дуккаврил ва методикалул центрданул директор Калимат Элдаровал, Дагъусттаннал Музыкантътурал ва Композитортурал союзирттал председательтал Хан Башировлул ва Рамазан Фаталиевлул.
Шиккува бусан, хIакьинусса кьини жулла республикалий буссар музыкалул 60 коллектив, вайннува 18-ннил дуссар «халкьуннал» тIисса цIа, вайннувагу 4 коллектив бур оьрчIалсса.
