[dropcap]Ф[/dropcap]евраль зурул ахирданий Калининградуллал областьрайсса Большое Исаково тIисса шяравусса Вирттаврал Аллеялий цIусса кIира мармарчарил ула лархъунни: Совет Союзрал Виричу Якьув Сулаймановлул ва Совет Союзрал кIийла Виричу Николай Семейкол цIарду чирчусса.
Калининградуллал областьрал виваллил иширттал политикалул министрнал бувсмунийн бувну, ва даву дурссар Ватан дуруччултрал кьинилун хасну, Вирттаврал аьпалул хIурматран ва уттисса никираву патриот зумунусса асарду цIакь буваву мурадрай. КIиягу Виричу Машрикьуллал Пруссия фашистътурацIа марцI буллай виртталну талай ивкIун ур.
Украин ва дагъусттанчу, лаккучу, Николай Семейко талай ивкIун ур гьаваллаву, Якьув Сулаймановма – аьрщарай. Мармарчарил улттуй Якьув Сулайманов увсса шяраваллил цIагу архнияра итталун дагьанну хъунисса хIарпирдай чирчуну дур.
Аллея шанма зурул хьхьичI, декабрь зурул шамунний, тIивтIуну бур. УрчIа Виричунал цIа дур Аллеялий. Дагъусттаннал Вирттаврава, Якьув Сулайманов акъассагу ур цамагу Виричу – МахIаммад ХIамзатов. Гъумучатусса Якьув Сулайманов Буттал КIанттул цIанийсса Хъун дяъвилул цалчинсса гьантрайва лавгссар Ватан дуручлан. Ванайн шамийлла щаву дирссар, кIийлла контузия хьуссар. Гьуртту хьуссар Баргълагавал ва Белоруссиянал фронтирдай. 1945-ку шинал Норденбург тIисса шагьрулия арх бакъа Сулаймановлул цалла кьюкьлущал архIал ххит дуккан дурссар душманнал колонна, тикку бивкIссар 6 автомашина, 2 танк ва чIявусса немецнал саллатI ва хIаписартал.
Ми циняв бухлаган бувссар. Му гьунарданухлу СССР-данул Верховный Советрал Президиумрал ХIукмулийну жула ватанлувнан дуллуссар Совет Союзрал Виричунал цIа ва Лениннул орден, «Золотая Звезда» медаль. Совет Союзрал Виричу зий ивкIун ур Украиннал Донецкаллал областьрай, Красноармейск шагьрулий. Пенсиялийн увккун махъ зана хьуну ур Дагъусттаннайн. Буттал кIанттул цIанийсса Хъун дяъвилий уссурвалсса агьлу, динну, миллатру личIи къабуллай, душмантурайн данди бувккун буссия. ХIакьинугу кьянкьану бавцIуну бур, яхIлувсса ппухълуннал чувшиврул тарих мусил хатIлий чичлачисса, лакралгу, дагъусттанналгу аслансса арсру.
