Дагъусттаннал ЦIуллушиву дуруччаврил министерствалул баян бунни коронавирусрал азарданул оьрчIайгу рахIму буллай бакъашиву, муния цакуцну нигь душиву дахьва дунияллийн бувксса, шинавун бияннинсса мюрщултрангу, школардайн занан буваминнангу, школ-оьрчIангу.

РЦИБ и СПИД-рал оьрчIансса ковид-отделениялул хъунмур Саида Оьмаровал бувсмунийн бувну, цуксса ялув бавцIуну хъин бувансса хIарачат булларчагу, оьрчIру вирусрал ххяппурттаща ххассал буван къавхьусса ишругу хьуну бур. Му бакъассагу, коронавирусрал осложненияртту дуллай дур, мунияту чара бакъа духтуртурайн буккан маслихIат буллай бур, азарданул симптомру хIисав шайхтува. Ва ялагу, ванил бувсмунийн бувну, вирус бявкъу-гъили шаврия личIи дувангу бигьану бакъар, цакуццуйсса симптомру дур, мунияту хасъсса пишакартурайн буккан маслихIат буллай бур. ХьхьичIва кунма, вирусрая буруччинсса чаран так ца бур: прививка дуваву. Уттигу 12 шин хьуннинсса оьрчIансса вакцина бакъар, мунияту ичIува мюрщи оьрчIру буруччиншиврул хъуниминнан вакцинарду буваврил пикри буван багьлай бур. 12 шинава ливчуминнансса вакцинарив бур «Спутник М». Вакцина бувсса оьрчIругу ххуйну бур тIий бур хъирив бавцIуми. ЦIакьсса иммунитет дикIаншиврул ва азардания нигь къадикIаншиврул оьрчIангу прививкартту дувара тIий бур педиатртал.