ЦIуссалакрал райондалий дан багьлагьисса 80,73% агьалинал дурну дур вакцинация. Коллективрал иммунитет хьуншиврул райондалий прививкартту дан багьлай бур 21 882 инсаннан.
ЦIанасса чIумал 17 666 инсан ур ми дурсса. Вай хъанай бур вакцина дан багьлагьиминнал 80,73%, райондалий ялапар хъанахъиминнал 49, 27%. Прививкартту дайсса пунктру бур райондалул кIивагу азарханалий – ЦРБ ва НРБ№1(Новострой). Вакцинация дуллай байбивхьуния шихунмай райондалул азарханардайн бувкIун бур 20 400 доза вакциналул, мукунма 12-18 шиннавусса оьрчIансса 30 доза. ХIакьинусса кьини коронавирусрая буруччинсса ва му азар ппив хьун къаритансса мюнпат бусса чаран бур прививкартту даву. КIулну бур прививкартту дурминнал азар бигьану лахъайшиву. Аьлимтурал бусласимунийн бувну, кIива ят1апрай байсса «Спутник V» бувсса инсантурайн коронавирус дирсса ишру хъинну чансса бур.
КIулну бикIан, вакцина дайхту, инсан азардания урувччуну акъассар. Инфекциялийнсса иммунитет кIилчинмур компонент бувну шанна нюжмар лагайхтур хIасул шайсса.
– Прививка дурминнан ряхра нюжмардий лахлан аьркинссар маска, ялув бацIан аьркинссар каруннил марцIшиврул, къабучIиссар чIявусса инсантал бусса кIанттурдай бацIлан. Гьарзат аьркинсса куццуй дарча, «Спутник V» вакциналул инсан 92% урувччуну ушиврийн вихшала дуссар, – тIий ур вирусолог Гинцбург.