Сайки 300 шинал лажиндарай законнал къаралданий бавцIуну, Аьрасатнал прокуратуралул хъуннасса хъар лахълай бур агьалинал ихтиярду ва мурадру буруччаврил ххуллий.

Аьрасатнал прокуратуралул органнан 300 шин шаврин хасну Каспийскаллал хъунмур библиотекалуву хьунни Аьрасатнал Виричув МахIаммад НурбахIандовлул цIанийсса «Отечество» тIисса жагьилсса патриотнал клубрал заседание. Шикку гьуртту хьунни М. ХIажиевлул цIанийсса Хьхьирил кадетътурал школа-интернатрай дуклакими, мукунма библиотекалул буккулт. Заседание тIитIлай, ихтилат бунни Каспийскаллал Библиотекарттал системалул директор, Каспийск шагьрулул Мажлисрал депутат Мадина Темировал.
-Аьрасатнал прокуратура – яла хьхьичIвасса паччахIлугърал институтирттавасса цар. Ва жула билаятрал цIакьгу, гужгу хъана­хъиссар.
300 шинал хьхьичI, Петр Цалчинманал заманнай кунма, хIакьинусса кьинигу, ведомствалул агьаммур мурад бур законнал ялув бацIаву, паччахIлугърал ва агьалинал ихтиярду ва мурадру буруччаву, — увкунни ванил.
Мадина Темировал мукунма бувсунни прокуратуралул тарихрал цIанихсса лажинтрая.
Заседание дайдирхьунни библиотекалул жагьилсса букку Мария Самыловал щаллу дурсса Аьра­сатнал гимнрайну.
Мажлис бачин бувминнал шикку кIицI лавгунни прокуратуралул цала гимнгу душиву. Бувсунни ва Илья Резниклул чирчушиву ва щаллу дайшиву Сергей Волчковлул ва генерал -майор Виктор Елисеевлул каялувшиннаралусса Нацгвардиялул ансамбльданул.
Ваних вичIи дирхьуну махъ «300 шин закондалул къаралданий» флешмобраву чялишсса гьурттушинна дурминнан дуллунни наградартту. Наградартту дуллуминнавух бия Хьхьирил кадетътурал школа-интернатрай дуклакисса Марат Шахшаев ва Сапар Сапаров. ДР-лул «Аьрасатнал нинухъру» суккушиннарал, Культуралул управлениялул, Каспийскаллал администрациялул чулуха вайннан дуллунни грамотартту.
Мероприятие къуртал хьунни Полина Самыловал сакин дурсса, оьрчIан жула билаятрал законну цукун кIулну дурив ххал дуллали­сса викториналийну.