ДуркIунни жучIанна ЦIусса шин. Ванийн «ЦIиникьрал шин» тIий бур. «ЦIиникьрал» дуркуну, дакъа-къатIа данхьуви жула ялун лирксса ва кIул дакъа цIуцIавугу. Умуд бур. Гьай-гьай, цIусса шинацIун бавхIусса умудругу жула чанну къабикIай. Ми умудругу чIявуми, инсаннал, карчI къадурну, биттур булларча, бакIуйн буккай. Аьрасатнал Президент Владимир Путиннул гьашинусса шин баян бунни «Год культурного наследия РФ» тIий. Нагу, ва иш лалавсун, гьашинусса январь зурул 1-мур кьини, баргъ аьрщарай ликкайхту, сайрданий кьатIув увкссияв. Культура тIисса мукъувун, явара, гьарца зат духлахиссар: кувннал кувннащалсса багьу-бизу, нитти-буттал хIурмат, ми ахиратравун лавгун бухьурча, миннал цIарду, бувмур дакIния гьан къабитаву, миннал жунна кьадиртсса аьдатру ядаву, яни рувхIанийсса ххазина буруччаву. Шивунна духлахиссар лагмасса тIабиаьтгу. Вагур жунна дуруччин, узданну ядан аьркинсса. ТIабиаьтрал жунна бахшиш дуллалимургу кьиматрай дуруччин жува буржлувссару. ТIабиаьт жущалла гъалгъа тIун къабюхълай духьурчагу, цилла чIярусса ва цаннияр ца аьркинсса лишаннайну жува цихра вичIидихьлахьи бувару.
Нагу, ттучIара духларгсса, чяй дувайсса, къягъул тIама дувансса пикрилий, хIаятрава увккун, баргъбуккавал чулий­сса кIанттурдайн лавгссияв. Шяраваллил хьхьичIсса Оьмал-БакIулун ияйхту, ттун хьунадаркьуна балчантрал илхъи. Же­гъирххуллурдал чIаравппай гъанмигу бия, инсантал кунма, ттух буруглай бавцIуну. Ванахха балчантгума инсаннах къула­гъас дуллай. Укунну жувагу бикIан аьркинсса.
На яла, лагмасса тIабиаьтрал суратру рищунсса пикрилий, гьаз хьуссияв Оьмал-БакIул кьабакIравун. Караматсса, дакI ххари дуллалисса сурат дия лагмара: Хъарттай-РатIнил чIарав хьуну дия цIусса къатри. Тай къатригу, на куна, шагьрулия шяравун увкIсса Итнайлавхъал МахIаммадлулли. Жул Вихьуллал шяраву утти шанма кулпат хьуссар, ганиннин шагьрулий яхъанай бивкIун, буттал аьрщарайн зана хьу­сса: Щимахъал Рамазан, Итнайлавхъал МахIаммад ва нагу – МахIатIувхъал ХIажимурад. Хьунхьуви жул чIарав цаймигу. Суратругу рирщуну, Оьмал-БакIул кьунттая ттунна къягъул тIамагу дурну, шавайн зана хьу­ссияв. Ттул дакIгу, уттара дурккун, ваца лахъсса зунтту лахъан бюхъайсса кунна хьуна.
Вайнна Оьмал-БакIуя рирщусса суратру. Ва тIабиаьт жуйнна ирсирайри дирсса. Ядувара, дуруччара!