МахIаммадхIажи Макуев, АьФ-лул лайкь хьусса учитель, Республикалул педагог, Ветерантурал ва насихIатчитурал советрал председатель:
— Коронавирусрал инфекциялул азарданул къашай хьуну ивкIра на август зуруй 2020 шинал. АцIния арулва гьантлий уссияв Республикалул инфекциярдал азарханалий хъин хъанай. Хъин хьуну, увккун махъ анализру дуллай, антитела сакин хьуну бурив ххал буллай, ттула ялув авцIуну ивкIра. Иммунитет цIакь хьуну, лахъсса антитела бушиврух къаурувгун, мугьлат бакъа лавгун бував «Спутник V» вакцина ва хIакьинусса кьинигу, му баврия пашмангу къавхьура. БувчIлай бакъар циваннив инсантал вакцинартту къабансса ххуллу-чараннах луглагисса. Ковидрая мюхчан шаву мурадрайсса вакцина ттун лащай тархъаншиврул ца бутIуха. Вакцина баврийну ва лавмартсса азарданул къашавай хьунссара тIисса нигь дурккунни. Му бакъассагу, цайминная ттуйнна ягу ттуятура цайминнайн азар лахъанссар тIисса вас-ццах бухлавгунни.
Инсантал бур привикартту даврия зарал буссар тIисса, интернетравасса ва мива-тивасса аьркин бакъасса, щялусса, щялмахъсса хавардайн вих хъанай. МахIаттал къашарув, лажинни!
ЧIявуми ттухь цIухлан бикIай, цил багьайкун ахттар къабувсса вакцина буван циван анавар увкра тIий. Кьянкьану жаваб дулара, на мудангу вихссара жула элмулул ва Аьрасатнал аьлимтурал бияла хъунмасса бушиврийн куну.
Ва азар сававну хIасул хъанахъисса тагьар чIалан диркIувкун, инсантал цивппа байбивхьунни вакцинартту буллай. ХIакьинусса кьини, жунма чIалайсса куццуй, ялу-ялун къаних хъанай нанисса азардануща ххассал хьунсса чаран, так вакцина баврийнусса бакъа- бакъар. Мунияту, зувагу, зула мачча-гъанмигу бурувччуну бикIаншиврул маслихIат буллай ура, вакцинартту баврия махъаллил машару, — тIий.
