Ина бав, къабав ххалаххи?

Зубайдат Абакарова, ДР-лул ЗахIматрал ва социал хьхьичIуннайшиврул министерствалул отделданул хъунмур:

–На дахьва Аьрасатнава жучIанма вакцинартту бувкIсса чIумал, бувара тIий миннатру буллали къабувну, нава рязину лавгун бувссия. ТIайламур бусан, инсантурал вакцинартту бан къабучIиссар, анавар бувккун бура тIий нигьа бусан бувнугу бивкIра. Ттунмарив вакцина бувсса-къабувссавагу хIисав къавхьунни, Аллагьнайн щукру, тания шихунмай цалсса уттигу сагъну бура, къашавайгу къавхьунна. Лагма-ялттусса инсантуран коронавирус сававну хъана­хъисса баларду ккавккукун, ттул лас рязи хьунни вакцина буван. Нюжмардул хьхьичI муналгу бунни.  КIива-шанма гьантлул хьхьичI, къашавай хьунсса муттавагу къавхьуну, оьрмулуцIа хьунни жагьилсса ттул коллегал нину. Мунилгу, цийхра кьини дурккувкун, явара, гьарзат кьариртун, мугьлат бакъа вакцинартту бан насияра тIий, аманат бувну бия цила душваврайн.

Прививка дан,  ягу къадуван му цума-цагу инсаннал цалва пикри бувну байсса хIукму бур. Аммарив, ттун ттунма бувчIлайссаксса, коронавирусрал азардануща буруччинсса чаран цалсса так ца вакцина бавриву чIалай бур.

Муслимат Абакарова, хъаннил хIакин:

–Ттул сайки 7-8 шинни гьарца кIюрххил ва ахттакьунмай  МахIачкъалалия Буйнакскалийн занай даврийн. Буйнакскалий на зий бура шагьрулул поликлиникалий хъаннил консультациялий. Нагу, жул щала коллектив кунма, ларгмур шинал апрельданийва захIматну къашавай хьунав. Азардануща ххассал ан къавхьуну, цаппара зурдардива ттул ппу лавгуна ва дунияллия. Мунияту га чIумал ттунма ккавкмургу дакIнийну вакцина баврил ялув на хъунма хIал къабав. Гьарца кьини гьантлун кIийла ттун багьлай бур чIявусса халкь бу­сса кIивагу шагьрулул автостанциярдайн лага-букIлан, агьалинансса транспортрай аьрххилийн буклан ва хIакиннал пишагу чIявусса агьалинащал гъалгъа буллалисса, оьрчIру бансса хъаннин чIун харж дан багьай­сса бур. Мунияту вакцина баврийну чIалай дур ттун ттунна­сса мюхчаншиву.