Абакардул арс Султанов Киров

Цаппара чIумул мутталий къашавай шанийгу ивкIун, оьрмулул 85 шинаву жуятува личIи хьунни лакрал миллатрал лайкьсса арс, аьлимчу, педагог, жяматийсса ишкка­кку, жула агьалинайн багьай­сса гьарцагу иширал чялиш­сса гьурттучи, гьунар бусса публицист, политик, философ, лакку макьаннал ва балайрдал автор, Абакардул арс Киров Султанов.
Киров увну ур 1936 шинал Ккуллал шяраву. ЧIяйннал дянивмур даражалул школагу арцул медальданий къуртал бувну, дуклан увххун ур Дагъус­ттаннал паччахIлугърал университетрал физико- математикалул факультетрайн. Шиву дуклакисса чIумал Кировлул ласайсса бивкIун бур Сергей Кировлул цIанийсса стипендиягу.
Му бувккуну мукьах, 1958 шинал, Киров увчIуну ур Ккуллал райондалул комсомолданул цалчинма секретарьну. Муния махъ зий ивкIун ур Ккуллал дянивмур даражалул школалий физикалул ва математикалул дарсру дихьлай. Даврих гъира бусса жагьилсса специалист, чIал къавхьуну увххун ур Ленинградуллал аспирантуралувун. 1968 шинал ххаллилну диссертациягу дурурччуну, зана хьуну ур Дагъусттаннайн, зун ивкIун ур Дагъусттаннал пединститутраву. Му даврий зий ивкIссар оьрмулул биял­сса мутталий.
Цаппара хIаллай зий ивкIссар мува вузрал цIуну тIивтIусса музыкалул факультетрал деканнугу. Ванал хIалал дурссар СССР-данул просвещениялул отличник, РСФСР-данул халкьуннал просвещениялул отличник ва Дагъусттан Республикалул лайкь хьусса учитель тIисса цIарду.

АхIмадлул душ Султанова Гулизар

Лас ивкIуну ца гьантта ляхну (муксса хIаллай дакъа ссавур дан хъанай бакъахьунссия) ваналва хъирив хъит увкуну лавгунни жула миллатрал хъиннува ххаллилсса душ, Дагъусттанналгу, мунил кьатIувгу цIа дурксса театровед, аьлимчу, гьунар ялттусса публицист, критик, жяматийсса ишккакку, Лакрал театрданул кьимат лавайсса зузала, специалист, жунма гьарцаннангу бусравсса, ххирасса инсан, хъаннил «Дараччи» клуб тIивтIуния шинмай мунил циняв иширттавух ца яла хьхьичIунсса гьурттушинна дуллай бивкIсса хъамитайпа, АхIмадлул душ Гулизар Султанова.
Гулизар бувну бур 1940 шинал Кумиял шяраву. Буттал шяраву дянивмур даражалул школагу лайкьсса кьиматирттай къуртал бувну, бувххун бур Москавуллал Щукиннул цIанийсса лахъсса театральный училищалувун. Мугу бувккуну Дагъусттаннайн зана хьуну махъ цаппара хIаллай зий бивкIссар актрисану Лакрал драмтеатрдануву. Гулизар Султанова диялсса шиннардий зий бивкIссар Дагъусттаннал Литературалул, мазрал ва тарихрал институтраву, хьхьичIунсса элмий­сса специалистну.
Махъсса шиннардий ванил оьрму цIакьну бавхIуну бия А. Къапиевлул цIанийсса Лакрал музыкалул ва драмалул театрдануцIун.
Театрал критик хIисаврайгу, сценалул иширттал ххаллил­сса специалист, летописец хIисаврайгу, Гулизар Султановал цIа машгьурну диркIссар щалагу Дагъусттаннай ва цаймигу республикарттай.
Гулизар Султанова хъана­хъиссар АьФ-лул искусствалул лайкь хьусса ишккакку, ДР-лул ПаччахIлугърал премиялул лауреат, искусствоведениялул элмурдал кандидат.

Киров ва Гулизар Султановхъул аьпалухьхьун лагаврил хъуннасса дард-хажалат кIидачIлай буру арснахь Абакардухь, душнихь Светланахь ва щалагу агьлу-авладрахь. Цал бунагьирттал аьпа баннав, кIинналагу рухIру цачIу, ца кюр­ттарай дишиннав каши ххисса Заннал.
Ккуллал ва Кумиял жяматру