Август зурул 17-нний АхIмад-хан Султаннул цIанийсса МахIачкъалаллал аэропортрай тIивтIунни цIуну бувсса терминал. Аэропортрай цIусса терминал тIитIлатIисса шадлугърай гьуртту хьунни Дагъусттаннал БакIчи Сергей Меликов, Аьра­сатнал транспортрал министр­нал хъиривчу Игорь Чалик ва МахIачкъалаллал аэропортрал директор Саид Рамазанов.

«Аэропортрай самолетрай лехханнин ва левххун бувкIун махъ пассажиртуран хIасул дурну дур ларайсса даражалий­сса шартIру», – увкунни Сергей Меликовлул. Республикалул БакIчинал мукунма кIицI лавгунни, МахIачкъалаллал аэропорт дунияллул даражалийсса, хъуннасса агьамшиву дусса аэропортну ккалли хъанахъишиву.
Ухссавнил Ккавкказуллал Федерал Округрайсса аэропортирдай, так ца ва аэропортрайсса цIуну тIивтIусса терминалданийри бусса телетрапру. Терминал бур 11 азарда квадратный метра дусса, шинай 300 азара инсан кьамул увансса шартIру дузал дурсса. Ссятрал мутталий аэропортрал терминалданувух кьамул буллантIиссар 190 пассажир. ЦIусса терминал зузи баврийхчIин аэропортрая левххун нанисса ва аэропортрайн левххун букIлакIисса пассажиртал архIал кьамул буллансса кьудрат ххишала хьуссар.
Терминалдануву пассажиртурал паспортру ххал бигьлан личIи бувну бур 10 кабина. Щала терминалданул строительство дарцIуну дур 1,6 млрд арцун. Терминалданул строительство дайдирхьуну диркIссар 2016 шинал.
Шиккува кIицI лаган, аэропортрай буллалисса терминалданул строительствалул даву ххал дигьин Дагъусттаннайн увкIун уссия АьФ-лул вице-премьер Михаил Мишустин.
ХIакьинусса кьини МахIач­къалаллал аэропортрая лехлай дуссар Туркнавун, Къазахсттаннайн, Аьрабнал Эмиратнавун ва Саоьдуллал Аьраб­навунсса самолетру. ЦIусса терминалданийхчIин цалчин­сса рейс дантIиссар август зурул 19-нний.
«Гьай-гьай, жу хъинну ххарину буру дунияллул халкьуннал даражалийсса цIусса терминал жучIава тIитIаврийну», – тIий, рязийну буслай бур «Слетать. Ру» турагентствалул сетирдал директор Альбина Мирзоева.
«ЦIусса терминал зузи баврийхчIин утти жуща дунияллул даражалийсса аэропортирдай кунма туристътал ва хъамал лайкьну кьамул буллан хьунтIиссар. Му бакъассагу, ва терминал баврийну, ттул коллегахъал личIи-личIисса билаятирттал туроператортуращал­сса даву хъиннура хьхьичIуннай хьунсса сант ххишала хьуссар. Барчаллагьрай ура хIакьину жунма укун ххаллилсса терминал бансса хъунмасса хIарачат бувсса Дагъусттаннал Президент Сергей Меликов бакIчисса республикалул каялувчитурайн ва цинявппагу терминалданул даву бакIуйн дуккан давривух гьуртту хьуну бивкIсса инвестортурайн», – увкунни путешествиярдал клубрал каялувчи Муртазааьли МахIаммадовлул.
«Дунияллул халкьуннал даражалийсса терминал тIитIаву, му буниялагу ххарисса, хIасил, тарихравун багьансса ишри. Утти жула аэропортращал дунияллул халкьуннал авиалинияртту хIала-гьурттуну зунсса сант ххишала хьуссар», – увкунни туризмалул аралувусса ишбажаранчи Камал Салмановлул.
«Дагъусттаннал туризмалул аралуву зузиминнан жула аэропортрай цIусса терминал тIитIаву буниялагу агьамшиву дусса иш хьунни.Чил билаятиртайнсса путешествиярду сакин давриха зузисса турагенстварду хъунмасса хIаллай ялугьлай диркIссар ва проект дузрайн дуккан даннин. Хъинну рязийну буру жула бикIу, жучIанма нанисса бикIу пассажиртуран цIусса терминал тIитIаврийнчIин хIасул хьусса къулайшиннардая», – увкунни «S-Travel» турагенствалул директор Сабина Мамаевал.