ДР-лул ХIукуматрал председательнал цалчинма хъиривчу Батир Эмеевлул ххал диргьунни инвестициялул проектрал лагрулий МахIачкъалалив дуллалисса машлул ва логистикалул «Атриум» «А» классрал центрданул къатри. Ва проектрайн бувну Ленинкент поселокрай 25 гектар аьрщарай буллай байбивхьуну буссар 300 инсаннансса зузи кIану хIасул бан­сса центр.

Проектрал цалчинмур бутIуву бувну бур складирттан ккаккан бувсса 6500 кв. метра дусса къатри ва уттизаманнул холодильникирттансса складру бусса 1100 кв.метра дусса помещенияртту.
Центр буллалисса аьрщарай инвестортурал цала харжирах дунни щин экьидачин дансса ва марцI дуккан дансса сооруженияртту.
Проектрал кIилчинмур бутIуву дуллалисса давурттаву дур машлун аьркинсса 12, 5 азарда кв.метра дусса складирттал комплекс зузи баву. Укунсса складру бувну махъ, шиккун кьамул дуллантIиссар Ухссавнил Ккавкказуллал ва Азирбижан республикардаясса машлул объектирдал продукция.
Проектрал хъиривмур бутIа бур ца зивулийсса 11 азарда кв. м дусса Машлул центрданул къатри даву. ЦIанасса чIумал, ва центрданул къатрал гьану бивзун, муххал конструкцияртту дацIан дурну дур.

Проектрал мукьилчинмур бутIувун духлай дур автомобильлал центр баву.
Проектрал инвестор Игорь Исяев пикрилий ур аьмну ва инвестициялул проект дузрайн дуккан даврин 5 млрд арцул харж бан. Машлул ва логистикалул центр зузи баврийну хIасул хьун най бур 300 инсаннансса зузи кIану. Так шикку хIисав бан багьлай бур аьрщарал ва имуществалул налогран 5 млн арцул шинай, дулун багьлай бушиву.
Инвестортурал вакил Гъа­зимахIаммад ХIажиевлул бусаврийн бувну, центр дузал бантIиссар уттизаманнул техникалул оборудованиярттал. Ва объект нирхиравун багьну махъ, Дагъусттаннайсса ттучаннал даврил даража гьаз хьун­тIиссар.

Батир Эмеевлул кIицI лавгунни логистикалул центр баврийну Дагъусттаннал машлул рынокрайн хъунисса машлул сетьру кIункIу хьунтIишиву. Мунийн бувну, жула региондалий­сса производительтурач1а хъуни­сса машлул сетирдайхчIин Аьра­сатнал регионнай цалла продукция дахлансса сант ххишала хъанахъиссар.
Центрданул производствалущал кIул хьуну махъ, вице-премьернал кIиц лавгунни проектрал чIарав бацIан аьркиншиву.
Ванал мукунма хIисавравун лавсунни центрданул лагма-ялттусса кIанттурдайсса ххуллурдал тагьар къулай дакъасса душиву. Отраслирдал министерствардайн тапшур бунни кIицI лавгсса масъала анаварсса мутталий щаллу баву мурадрайсса программалувун бутаву.
Вара кьини Дагъусттаннал БакIчи Сергей Меликовлул Батир Эмеевлуйн тапшур бунни Дагъусттаннай буллалисса «Atlantis Marina» курортно-гостиничный комплексрал строительствалул даву ххал дигьаву. Шиккува кIицI лаган, Ухссавнил Ккавкказнаву ца яла хъунмур хъанахъиссар Да­гъусттаннал аьрщарай буллай байбивхьусса 3 млрд арцун бацIлацIисса комплекс.
Батир Эмеевлул проектрал инвестор Игорь Исяевлущал ва инвестортурал вакил ГъазимахIаммад ХIажиевлущал ххал бивгьунни комплексрал даву дузрайн дуккан давриву хьунабакьлакьисса масъалартту.
ХьхьичI ххуттай вайннал гьаз бунни шиккунсса ххуллурду бакьин баврил, газ буцаврил, ттукIрал ва щинал масъалартту анаварсса мутталий щаллу бан аьркиншиву.
Проектрал инвестортурал вакилнал бусаврийн бувну, цIанакул 3-мур Карамандалул чулухунмайсса Каспи хьхьирил зуманицIсса аьрщарай буллай байбивхьуну бур 8 идара ва цаймигу личIи-личIисса сооруженияртту. ЦIуну буллалисса комплексравун бухлай бур инсантал хъин буллансса ва реабилитация дуллансса медициналул центр, 3 гектар аьрщарайсса апарт-отель. Цинявппа шикку буллалисса корпусру бур хьхьирийн лажинну бувсса, караматсса тIабиаьт чIалачIисса.

Каспи хьхьирил зуманий­сса комплексрал лагма-ялттусса кIанттурдайгу хIасул дантIиссар инсантал бигьа лагансса шартIру. Му бакъассагу, инвестор пикрилий ур шикку, Дагъусттаннал агьалинан бакъассагу, цинявппагу хъамаллуран бигьа лагансса куццуйсса шартIру дусса пляж сакин буван. Мукунма, комплексрал проектраву дуллалисса давурттал лагрулий дур личIи-личIисса инфраструктуралул социал объектру баву.
Проект иширайну дачин дурну дур курортирттал шагьрурдал даву хIисавравун ларсун: ши­кку бикIан тIий бур тIивтIусса ва лавкьусса бассейнну, каферду, ресторанну, тренажерду дусса заллу, SPA-салон ва оьрчIру бялахъансса парк.

ЦIубутIуй проектрал давуртту дузрайн дуккан даврийну сакин хьунтIиссар 350 инсаннан­сса, 30-35 азарда къуруш харж бивхьусса, зузи кIанттурду.
Батир Эмеевлул кIицI лавгунни ва проектрал агьамшиву республикалийн инвестициярду дучIан давриву душиву. Вице-премьернал бувсунни х1адурну ушиву проект иширайну дузрайн дуккан даву мурадрай цимурцаннуву кабакьу баврийн.