Июнь зуруй Аьрасатнаву кIицI лагай Медициналул зузалал кьини. Аьдатравун дагьсса куццуй,
ва кьини пишалул байран барча дувай ва лахъа-хъун бай цинявппагу медициналул зузалт.

[dropcap]М[/dropcap]едицина язи дургьуну, агьалинал цIуллу-сагъшиву дуруччаврил ххуллий захIмат бихьлахьисса бусравсса хIакинтал чансса бакъар Ккурккуллал шяравагу. Ттун бусан ччива чIярусса шиннардий МахIачкъалаллал 1-мур роддомрай зузисса хIакин, отделениялул хъунмур ПатIима Сулаймановая.

---

Ва цуппагу ххаллилсса хIа­кин, медициналул элмурдал кандидат, госпитальный терапиялул кафедралул доцент, ДР-лул лайкь хьусса хIакин Сулайманов Сулайманнул душри.
Цила бусласимунийн бувну, хIакин хьунсса пикри ПатIиман оьрчIнийва хьуну бур. Ванин чIалай бивкIун бур циксса инсантал букIлакIиссарив цила буттачIан цIуллу-сагъшиврул ялув ва цуксса рязину, барчаллагьрай лагайсса бивкIссарив ми. ЧIалай бивкIун бур шяраваллил жяматрал буттачIансса хIурмат. Бутта кунма терапевт хьунна тIий бивкIун бур цуппагу. Амма Сулайманнул маслихIат бувну бур душнихь: «Медициналул ххуллу язи бувгьу­сса хъамитайпалун яла ххуймур пиша хъаннил хIакиннал пишари», – куну. ПатIимагу буттал тIутIимуницIун бавкьуну бур ва тачIав пашман къавхьуну бур.

«Ина кумаг буллай бура дунияллий цIусса оьрму байбишин. Мунияр тIааьнсса ци бикIайссар. Гьарицагу дунияллийн бувксса оьрчI ттула оьрчI кунмасса асарду бикIай», – тIий буслай бур ПатIима цила даврия. ПатIима школалий дуклакинийва дуккаврих гъира бусса душ бикIайва. ЧIявусса луттирдугу буккайва.
1989 шинал ххуйсса кьиматирттай къуртал бувссар ванил Ккурккуллал дянивмур даражалул школа. Цила бусласимунийн бувну, оьрмулувусса тIааьнсса дакIнийн бичавурттугу, ххаришивурттугу Ккурккуллал школалуцIун дархIусса дур. Вара шинал ПатIима бувххун бур Читалий Медициналул институтравун. Таний Сулайман тийх зий ивкIун ур.
Амма, яла ванан Дагъусттаннайн изан багьну, ПатIимал махъсса кIива курсгу, интернатура ва ординатурагу МахIачкъалалив бувккуну бур.
1998-ку шинал МахIач­къалаллал 1-мур роддомрай аку­­шер-ги­некологну зун був­кIун бур ва тания шихунмай хIакьи­ну­сса кьинигу шикку зий бур. Ларг­сса шинал ва отделениялул хъунмурну бивтун бур.
Цила даврияту, пациенткахъая, оьрчIая мукун гъирарай буслай бур ПатIима, чIалай бур ва мяйжаннугу ванил дакIнил лавсъсса пиша бушиву.

– ПатIимай, цукун­сса дур хIакьину Дагъус­ттаннай оьрчIру баврил тагьар?
– ОьрчIру баврил тагьар Дагъусттаннай тачIаврагу оькки­ну дакъассар. Амма дуссия чIунну кIи-кIива оьрчI бакъа къабуллалисса. Махъсса шиннардий, ниттихъал капиталданулшиврий буссарив къакIулли, бюхъай, жула инсантал диндалухун багьну бушивруцIун бавхIуну бикIангу, чIявусса оьрчIру буллан бивкIунни.
ОьрчIал дянивсса чIунгума жун, хIакинтуран, ччиссаксса гьан дитлай бакъар, лув-ялув буллай бур.
Экологиялул тагьарданийн ва личIи-личIисса азардайн бувну, чIявусса оьрчIру цIуллу-сагъшиврул чулуха хьхьара­сса бур. ЧIявусса бур оьрчIру чIумуяр ччяни бувсса ишру. Хъами цала цIуллу-сагъшиврул ялув бацIлай бакъар, му оьрчIал цIуллу-сагъшиврийнгу асар хъанай бур.

Ва чулуха совет чIумалсса медициналул оьрчI бан нани­сса хъаннил ялув бацIаву хъуннасса дия.
Таний бикIайва нинухъру хIадур байсса школарду, оьрчI бан нанисса хъами сияхIрайн лавсун, чIумуя чIумуйн хIа­кинначIан занази бувну, аякьалийн лавсун бикIайва. ЦIана мукунсса иш бакъар.
ОьрчI лякьлуву буссаксса хIаллай цалагу хIакинначIан къалавгун оьрчI бан бувкIсса хъами бикIай.
2021-ку шинал цIанасса чIумуйнин жул роддомрай бувну бур 2230 оьрчI. Миннава чIумуяр ччяни бувну бур 58 оьрчI. 732 оьрчI бувну бур операция бувну (кесарево сечение). Операцияртту бувсса ишру, цуксса хIайпнугу, ялу-ялун чIяву хъанай бур.
Шиккува ттун учин ччива, циксса перинатал центрду, роддомру тIитIирчагу, ччянивасса МахIачкъалаллал 1-мур роддомрал агьамшиву ва сий хъисрагу яларай къархьуссар. Ванил ца хъуннасса хъар лахълахъиссар республикалул цIуллу-сагъшиву дуруччаврил идарарттаву.

– Яла жагьилмур ва яла хъуннамур нину ци оьрмулувусса дур?
– Оьрмулул яла чIиримур нину 15 шинавусса дур. Ттула пикрилий, ва оьрмулуву оьрчI бан ччяссар, къахIадурссар ва оьрмулувусса хъамитайпа багьайкун нинушиврул хъар лахъан. Бур хъамитайпа 46 шинаву оьрчI бувссагу. ХьхьичIва хъаннин личIину чIявусса оьрчIру ччай бакъая. ЦIана хьунабакьлай бур 8,9 оьрчI бувсса хъами.

– Вила практикалуву яла дакIний личIансса иш цукунсса хьур?
– Ци дикIайссар дунияллий цIусса оьрму ляхъавунияр дакIний личIансса. Гьарицагу оьрчI бувсса иш цин лавхьхьуну дакIний личIансса, ляличIисса асардацIун бавхIусса бикIай. ТачIав хъама къабитай буттал шяравун отпускалий бувкIсса чIумал, канилу аьркинмур да­къана, учиннуча, «полевой условиярдай», тахлий родру кьамул дуллан багьсса чIун. Анавар­сса кумаграл машина бияннин ялугьлан пайда бакъая. ОьрчIал бакI тIайла дакъа дирхьусса, захIматсса иш бунугу, гьарзат ххуйну чулийн бувккуна. Га хъамитайпалул гъанчунал ттухь цимилагу увкуна: «Ина шяраву къабивкIссания, жул иш цукун багьанссияв къакIула»,– куну. Цамургу иш хьуна, ттула шяравудушнин кумаг бан бювхъуну, рязину ливчIсса. Ххютту ссур­ссулийх кай-кай хьуну, лякьлувусса оьрчI бугъ хьун нанисса кIаная ххассал бан бювхъуна.
Бувсса душнин ттул цIа дирзунни барчаллагьрайсса нитти-буттал.
Жу, хъаннил хIакинтурал, учайссар: «Лякьлуву оьрчI бу­сса хъамитайпа – янсаврал кьалир, ччимур хьун бюхъайсса», – куну.

– Пишалул ххуллий винма эбратну хьусса цуми хIакинтурал цIарду кIицI давияв?
– ХьхьичIва-хьхьичI жула цIанихсса Зоя Набиевна Зайдиева. Медициналул элмурдал доктор, профессор. Ванил сийгу, студентътурал, пациентътурал ва коллегахъал ваничIансса хIурматгу ккавккукун, ттун хъун­масса пахру багьуна, ттула пиша хъиннува ххира хьуна. КIицI лагавияв мукунма Тамара Хашаева, нава дахьва зун байбивхьусса чIумал ттула чIарав бавцIусса, жула роддомрал хIакинтал МахIаммад Чавтараев, Зухра МахIаммадовна, Марианна Ивановна.
– Зул кулпатраву цаймигу хIакинтал бур. Миннаягу бусарча ччива.

– Мяйжаннугу, жул агьлу-авладрайва чIявусса хIакинтал бур. Кув Москавлив, кув Ма­хIачкъалалив зий бур. Ттул уссу Саэдгу, на куна, Читалий увхссар Медициналул институтравун. Къуртал бан багьссар МахIачкъалалив. Ва стоматологри. Институт къуртал бувну махъ, ацIнияхъайсса шиннардий Красноярскаллал аьрали госпитальданий отделениялул заведующийну ивкIссар. Медициналул къуллугърал майорнал чин дуссар.
Мунияр махъ цаппара шиннардий МахIачкъалалив оьрчIал челюстно-лицевой хирургиялул отделениялий зий уссия. Махъсса шиннардий Москавуллал клиникалий челюстно-лицевой хирургиялул отделениялий зий ур.
Душнил, Нуцалал, гьашину Дагъусттаннал медициналул университетрал стоматологиялул факультетрал 4-мур курс къуртал бунни. Арснал 9-мур класс къуртал бунни. Вагу хIакин хьун ччай ур.

– Ци чIа учинна оьрчI бан нанисса хъаннин?
– Лякьлуву оьрчI бусса хъамитайпа яла авурмур бур. Цаппара хIаллава му хъиннува авур бантIиссар нинушиврул.
ОьрчI бан нанисса хъаннин на чIа учивияв цIуллушиву. Бигьану ялтту ликканнав, цIу­ллу-цIакьсса оьрчI хьуннав, оьрчIацIун бавхIусса къайгъурду так тIааьнсса хьуннав. Гьарицагу оьрчIал зул къушливун барачат кIункIу баннав.
– Барчаллагь , ПатIимай. Вингу цIуллушиву дулуннав жула хъанниха ва оьрчIаха къайгъурду буллан.

Ихтилат бувссар
Андриана Аьбдуллаевал