Дагъусттаннал ХIукуматрал цалчинма вице-премьер Мурад Казиевлул, Медициналул зузалтрал профессионал байран барча дуллай, барчаллагь увкунни республикалул агьалинал цIуллушиврул цIаний буллалисса захIматрахлу.
ЦIуллушиву дуруччаврил министр Татьяна Беляевал докладраву бувсунни кутIасса чIумул мутталий дуван бювхъусса давурттая, республикалул шагьрурдайсса ва районнайсса азарханарду уттизаманнул ххуйсса медициналул техникалул дузал буван бювхъушиврия.
[dropcap]М[/dropcap]иккура хьхьичIунми медициналул зузалтран дуллунни хIукуматрал наградартту. Щалвагу Аьрасатнал «Лидер XXI века» конкурсрай, «Шинал яла хьхьичIунма каялувчи» тIисса номинациялий ххув хьусса республикалул диагностикалул центрданул (ГБУ РД «РДЦ») хъунама хIакин Заира Къапланован буллунни Ххувшаврил диплом. Ва конкурсрал хIасиллу дурну дур щалвагу Аьрасатнал лагрулийсса «Лидер XXI века» тIисса конференциялий Нижний Новгородрай.
Диагностикалул центрданул даву лавайсса даражалийн гьаз дурсса каялувчи хIисаврай, Заира лайкь хьуну бур му дипломран. Ва каялувшиву дуллай байбивхьуния мукьах Диагностикалул центрданул даву сантирай ва лябуккулий хьхьичIуннай хъит куну дур, къулайсса дахханашиннарду ва цIушиннарду хьуну дур.
[dropcap]З[/dropcap]аира Къапланова Дагъусттаннал лайкь хьусса хIакин, Аьрасатнал Федерациялул цIуллушиву дуруччаврил отличник, медициналул элмурдал кандидат бур. ЧIа тIий буру вания тинмайгу дуллалимуниву тIайлабацIу ва хьхьичIуннайшивуртту. ЛичIаннав ххари буллай оьрмулул ва вилва захIматрал.
