Июньдалул 28-нния июльданул 5-ннин жулла республикалий дикIантIиссар Дунияллул халкьуннал дянивсса ХIХ фольклорданул ва аслийсса культуралул «Горцы» фестиваль. Фестиваль дуллалиссар 2004-ку шиная шийннай. 2012-ку шиная шийннай тIурча – ЮНЕСКОлул эгидалулу.
Гьашинумур фестивальданий гьуртту хьунтIиссар Мексиканавасса, Ираннавасса, Азирбижаннавасса, Беларусьнавасса, Донецкаллал Халкьуннал Республикалиясса, Луганскаллал Халкьуннал Республикалиясса, Череповец, Орск, Рязань, Пермь шагьрурдаясса, Волгоградуллал областьраясса, Къалмукьнал ва Марий-Эл республикарттаясса коллективру ва Дагъусттаннал шагьрурдаясса ва районнаясса 50-нния ливчусса коллективру. Дистанцион кьаралданий цалламур магьирлугъ ккаккан дувантIиссар Индиянавасса, Италиянавасса, Венгриянавасса ва Къазахъисттаннаясса коллективирттал.
Фестивальданул программа дур хъинну авадансса, личIи-личIисса проектирдая, гала-концертирттая, арт-майданная, конкурсирттая, выставкарттая ва цаймигу шадлугъирттая сакин хьусса. Вайннувугу кIицI лаган ччива Жамалуттин Муслимовлул аьпалунсса Халкьуннал къавтIаврил Республикалул конкурс.
Фестивальданул лагрулийсса ишру хьунтIиссар МахIачкъала, Дарбант, Къизлар шагьрурдай.
Фестиваль дуллалиссар Аьрасатнал Федерациялул Культуралул министерствалул, ПаччахIлугърал В. Д. Поленовлул цIанийсса Аьрасатнал халкьуннал творчествалул къатлул, Дагъусттан Республикалул Культуралул министерствалул, Республикалул Халкьуннал творчествалул къатлул, МахIачкъала шагьрулул Администрациялул, материалный бакъасса культуралул ирсирал Комитетрал ва «Арт-инициатива» дунияллул халкьуннал дянивсса холдинг ООО-лул чIарав бацIаврийну.
Фестиваль хьунтIиссар Роспотребнадзорданул Дагъусттаннаймур отделениялул тIалавшиннарду биттур даврийну.
