Уттигъанну дунияллийн бувккунни Сиражуттин Илиясовлул завардансса футболданул лакрал жагьилтурал дянивсса «Лакку билаятрал Кубок» турнирданун ххюра шин шаврин хасъсса «Кубок Лакии» цIанилусса журнал. Му сакин бувну бур Руслан Жяъпаровлул ва Кайрав Кагермановлул. Журналданул тираж дур 500 экземпляр.
Журналданул ялувсса хъун бакъасса ихтилат хьунни мунил автортуравасса цаннащал – жула лакку оьрчI, Шахьуйннал шяравасса Руслан Жяъпаровлущал.
– «Кубок Лакии» турнирданун 5 шингу хъанай дунавхьур, мунил оргкомитетрал каялувчигу унавхьур нава, ларгсса шинал ахирданийва хьуна ва таварихран хасну журнал буккан бувансса пикри, ххюрагу шинал лажиндарай дурмур, хьумур хъамакъабитулун цачIун дуваншиврул кунма. Ттулва пикрилия на бувсъссия ттула дуснахь, республикалий цIа ларгсса журналист (спортрал), футболданул «Анжи» клубрал пресс-атташену ивкIсса Кайрав Кагермановлухь. Вагу авкьуна ттуцIун.
Мукун, дукIусса шинал ахирданий байбивхьуссияв жу ва журналдануха зий. Жул пикрилуцIун авкьуну, журнал буккан буван кумаг бувна «Кубок Лакии» лигалул чIарав ацIаву дурсса, МахIачкъала шагьрулул Депутатътурал мажлисрал председатель Марис Илиясовлулгу. Кайравлулгу, нагу цачIун дуварду ххюрагу шинай турнирданий гьуртту хьусса командарттаясса хъинну хъуннасса информация. Таблицалийн датIарду ххюра шинал лажиндарайсса статистика, суратиртталмур материал, хьунабавкьуру попечитель советрал вакилтуращал. Дуварду интервью Сиражуттин Илиясовлущал, махъ дуварду хъуннасса видеоинтервьюгу, цувгу вай гьантрай Ютуб-каналданийгу дирхьусса. Жунна дуван дакIниймур щаллу хьунни, – буслай ур Руслан.
Журналданий чивчуну бур лакрал щархъал жагьилтурал дянив хьусса «Лакрал Лига» ва «Сурхай ханнал Кубок» турнирдаягу.
Ва бур спорт, хаснурив футбол, Лакку кIану ххираминнансса журнал.
«Лакку билаятрал Кубок» байбивхьусса 2016-ку шиная шинмай, гьарца шинай гьарта-гьарзану бацIлай, бувсун бур вай бяст-ччаллайн багьайсса цимурцаннуя.
«ЦIанихсса инсантал» тIисса бутIуву бувсун бур лакрал турнирдавух чIун-чIумуй цалла-цалла шяраваллахлу буклакисса Олимпий чемпион Ширвани Мурадовлуя ва цIа дурксса ию Ислам МахIачевлуя. «Попечительтурал совет» тIимур бутIуву бувсун бур Марис Илиясовлуя, Эмил Ттаттаевлуя, ХIасан Аьлиевлуя ва Амирхан Амирхановлуя.
Лакрал турнирдал тарих дакIний личIанну цифрардайну буллуну бур таблицардай, цимил ххув ва бух хьуссарив, щил ва цими гол бавкьуссарив, цими лях гьан бувссарив ва м.ц.
