Августрал 1-нний Табасараннал райондалий, «Арула уссил ва ца ссил къалалий», хьунтIиссар халкьуннал творчествалул «Мелодии Рубаса» цIанилусса фестиваль. Мунил сакиншинначиталну бур Да­гъусттан Республикалул Культуралул министерство, Республикалул Халкьуннал творчествалул къатта, Табасараннал райондалул каялувшиндаращал цачIу.

[dropcap]В[/dropcap]ай гьантрай Табасараннал райондалул бакIчи МахIаммад Кьурбановлул каялувшиндаралу хьунни ва фестивальданул сакиншиндарал комитетрал цалчинсса батIаву. Ва шадлугърал хьунийн дуванмур къачанни: фестивальданул логотипрая, гьур­ттучитурал сияхI сакин даврия байбивхьуну, сахIна ва Къалалул лагмасса кIанттурду багьай­сса куццуй хIадур баврийн бияннин. Райондалул бакIчинал бигарданийн бувну, сакин бувну бур 4 зузи группа.

[dropcap]Ф[/dropcap]естивальданул гьурттучитурал цалва номерду ккаккан бувантIиссар амфитеатрдануву. Сакин бувну бикIантIиссар райондалул шяраваллал майданну, цайгу халкьуннал канил пишарду, багьу-бизу ккаккан буллалисса.

[dropcap]Ф[/dropcap]естиваль дуллалиссар щалагу Аьрасатнал жагьилтурал проектирдал конкурсрал проект иширайну щаллу даврил лаг­рулий.
Совет Союз лиян хьхьичI ва фестиваль «Арула уссил ва ца ссил къалалий» хьуссар мукьийлла. Га чIумал, ца республикалул дакъа, щаллагу Союзрал музыкалул оьрмулуву хьу­сса агьамсса иширан ккаллину диркIсса фестивальданий гьуртту хьуссар СССР-данул халкьуннал артист Мурад Къажлаев, Аьра­сатнал халкьуннал артист Леонид Серебренников, цIа дурксса балайчитал Лариса Долина, Ирина Отиева ва м.ц.

Табасараннал караматсса тIабиаьтрай тамаша буван, халкьуннал балайрдая ва къавтIавурттая неъмат ласун, гьуртту хьияра зувагу ва шадлугърай.